පාර්ලිමේන්තු වරප්‍රසාද අවභාවිත කරමින් කටයුතු කරන ජීවන් තොණ්ඩමන් තේ කර්මාන්තයේ උන්නතියට තර්ජනයක්... ඔහු ගැන නිසි ක්‍රියාමාර්ග ගන්න - සමාජ ක්‍රියාකාරිනි ශර්මිලා ගෝනවෙලගෙන් කතානායකට ලිපියක්

Jul 10, 2024 at 01:05 PM

|

Lanka Leader

වෘත්තීය සමිති ක්‍රියා කාරයෙකුට හෝ නොගැළපෙන පරිදි ප්‍රසිද්ධ ස්ථානයක හැසිරීමට  නුසුදුසු ආකාරයට ඉතාමත් ප්‍රචණ්ඩකාරී ලෙස හැසිරුණු ජීවන් තොන්ඩමන් අමාත්‍යවරයා පිළිබඳව  අවධානය යොමු කළ යුතු බවත්, ඔහු විසින් අවස්ථා ගණනාවක දී නඟන ලද චෝදනා හා හැසිරීම්  මෙරට තේ කර්මාන්තයට හානිදායක ලෙස සිදු කරන්නක් ලෙස පෙනී යන බවත් සඳහන් කරමින් සමාජ ක්‍රියාකාරිනි ශර්මිලා ගෝනවෙල මහත්මිය විසින් කතානායක මහින්ද යාපා අබේවර්ධන මහතා වෙත ලිපියක් යොමුකර තිබේ.

ඔහු රටේ පවතින නීතියට අවනත නොවීමත් සමාජය පිළිගත් විනයට හා සාමයට ගරු නොකිරීත් නිසා නීතිය සමව ක්‍රියාත්මක වීම පිළිබඳව  සමස්ත සමාජයේම අවිශ්වාසයට  හා අගෞරවයට හෙතුවන බවත් ඇය එම ලිපිය මගින් පෙන්වා දී තිබේ.

අදාළ ලිපිය පහළින්...

කතානායකතුමා
ගරු, මහින්ද යාපා අබේවර්ධන මැතිතුමා,
ශ්‍රී ලංකා පාර්ලිමේන්තුව ශ්‍රී ජයවර්ධනපුර කොට්ටේ 

ගරු කතානායකතුමනි,

ව්‍යවස්ථා දායකයේ නියෝජිතයින් සමස්ත ජනතාවට ආදර්ශමත් චරිත වුවද  රටේ පවතින නීතියට අවනත නොවීමත් සමාජය පිළිගත් විනයට හා සාමයට ගරු නොකිරීත් නීතිය සමව ක්‍රියාත්මක විම පිලිබදව  සමස්ත සමාජයේම අව්ශ්වාසයට  හා අගෞරවයට හෙතුවනවා ඇත .

පාර්ලිමේන්තු වරප්‍රසාද  අභාවිතා කරමින් මහජන වාදී තීන්දු තීරණ වෙනුවට තම පෞද්ගලික ලාභ ප්‍රයෝජන සඳහා හෝ මැතිවරණය ඉලක්ක කර ගනිමින් තම දේශපාලන  ප්‍රතිරූපය නංවාලිම  ඉලක්ක කර ගනිමින්  පහත් ස්වභාවයේ හැසිරීම් සමාජයට ප්‍රදර්ශනය කිරිම හෙලා දැකිය යුතුය .

වෘත්තීය සමිති ක්‍රියා කාරයෙකුට හෝ නොගැළපෙන පරිදි ප්‍රසිද්ධ ස්ථානයක හැසිරීමට  නුසුදුසු ආකාරයට ඉතාමත් ප්‍රචණ්ඩකාරී ලෙස හැසිරුණු ජීවන් තොන්ඩමන් අමාත්‍යවරයා පිළිබඳව ඔබගේ අවධානය යොමු කරනුයේ  ඔහුගේ ප්‍රචණ්ඩකාරී හැසිරීම පළමු වරට සිදුකරනු ලැබූවක් නොවන බැවින් හා එම සිද්ධින් දෙකම  පිළිබඳව ජීවන් තොණ්ඩමන් විසින් පාර්ලිමේන්තුව නොමග යවන ලෙස කරන ලද අසත්‍ය ප්‍රකාශයන් පදනම් කරගෙනය.

වසර ගණනාවකට පසුව දේශීය තේ සඳහා ඉහළ මිලක් ලැබීම හා ඉහල  අස්වැන්නක්ද ලැබෙන අවස්ථාවක ජීවන් තොන්ඩමන් විසින් නඟන ලද චෝදනා හා හැසිරීම් රටාව ඔහු ඉන්දියාවේ ඉපදී අධ්‍යාපනය ලද ඉන්දියානු ලැදි පුද්ගලයකු ලෙස සිතාමතා අපගේ තේ කර්මාන්තයට හානිදායක ලෙස සිදු කරන්නක් ලෙසද සාදනීය සිතිමටද කරුනු ඇත.

මෙයට ප්‍රථමවද  පිටස්තර පුද්ගලයන් රැගෙන ගොස් ඇල්කඩුව වතුයායේ සාමාන්‍ය අධිකාරීවරයාට මැර තර්ජනය කිරීම හා CWC වෘත්තීය සමිති සාමාජිකයන්  විසින් කඳපොළ පාර්ක් වතුයායේ සහ ඇල්ටන් වතුයායේ විධායක නිලධාරීන්ට එල්ල කරන ලද  මැර ප්‍රහාරයද   වතු කම්කරුවන් ඉදිරියේ පාලන අධිකාරිය හෑල්ලුවට ලක් කරමින් අදාළ සමාගමෙහි නීති රීති හා විනය අභියෝගයට ලක් කරන්නේ වතු පාලන වෘත්තිය තවදුරටත් ආරක්ෂිත රාජකාරියක් නොවන බව සමාජයට ඒත්තු ගන්වමින් සමස්ත තේ කර්මාන්තයටම හා  විදේශ විනිමය උත්පාදනයටද අභියෝග කරමින්ය.

නුවරඑළිය සහකාර කම්කරු කොමසාරිස් කාර්යාලයේදී පෞද්ගලික ආයතනයක් මගින් පාලනය කරන්නා වූ තේ කර්මාන්ත ශාලාවක සේවකයන්ට  අදාළව ගන්නා තීරණ අමාත්‍යවරයා  අසාධාරණ ලෙස අභියෝගයට ලක් කිරීමත් පාලක මණ්ඩලය විසින් ගන්නා තීරණ  ඔහු හොබවන අමාත්‍ය ධුරයට ගරු කොට වෙනස් කළ යුතු යැයි පැවසිමත් ඔහුගේ සීමාව ඉක්මවා ක්‍රියා කරන්නේ පාලන අදිකාරිය අපහසුතාවයට පත් කිරිමටය.

කම්කරු කාර්යාලය ඉදිරිපිටදීම අදාළ පෞද්ගලික ආයතනයේ විධායක නිලධාරීන්ට තම සගයන් තර්ජනය කරමින් පහරදීමට සැරසෙන්නේ  ඔහුගේ උසිගැන්විමෙන් හා අමාත්‍යවරයා නිහඬව බලා සිටීම තේ කර්මාන්තයේ උන්නතියට එරෙහිව ගන්නා ක්‍රියා මාර්ගයන් ලෙස අවශ්‍ය නම් පෙන්වා දිය හැක.

එදිනම පස්වරුවේ තොන්ඩමන් අමාත්‍යවරයා පිටස්තර මැරයන්ද සමග පේදුරු වතුයායට ඇතුළු වන අතර  තේ කර්මාන්ත ශාලාව නැරඹීමට දිනපතා විදේශකයන් පැමිණෙන බව දැන දැනම ප්‍රධාන ප්‍රවේශ මාර්ගය බලහත්කාරයෙන් අගුළු දමමින්  ඇතුලතට  පැමිණීමත් ඇතුලත  සිටින පිටස්තර  පිරිස පිටත් විම  අවහිර කරමින්  සේවකයන් හා පාලක මණ්ඩලය පමණක් නොව පිටස්තරයන්ද බිය ගන්වමින් ප්‍රචණ්ඩකාරී ලෙස හැසිරී ඇතිබවට වීඩියෝ දර්ශන ඇත.

තවදුරටත් කිසිදු පාලනයකින් තොරව හැසිරෙමින් මෙම කර්මාන්ත ශාලාවේ එදින සේවයේ යෙදී සිටි සේවකයන් පිටතට පන්නා දමා  තේ වෙන්දේසි සදහා ප්‍රවාහනයට සූදානම්ව තිබූ ලොරි රථයේ ටයර්වල හුළං අරින ලෙසට කලහකාරීන්ට නියෝග දුන්නේද  එදින නෙලන ලද අමු තේ දළු කර්මාන්ත ශාලාව තුළට ගෙන ඒමට ඉඩ නොදුන්නේද අමු තේ දළු  ප්‍රමාද කිරීම එහි ගුණාත්මක භාවයට බලපාන බව නොදැන විය නොහැක.

මම පෞද්ගලික ආයතනය කම්කරු කාන්තාවන්ගේ අයිතිවාසිකම් පිළිනොගෙන එම කාන්තාවන්හට ඔවුන්ගේ සංස්කෘතිමය අයිතියක් වන රතු මොට්ටුව පැළඳීමට ඉඩ නොදෙන බවට ඇමැතිවරයා  චෝදනා කරත් එය එසේ නොවන බවත් සින්දුර් පාවිච්චි කිරීමේ කිසිදු තහනමක් නොමැති අතර "අලවන මොට්ටු" පමණක් තහනම් කර ඇත්තේ ලෝක වෙළඳපොලේ සෞඛ්‍යා හා තත්ත්ව නිර්ණායකයන්ට අනුව බව සේවක සේවිකාවන්ද දැන සිටී බැවින්ය.

කැබිනට් අමාත්‍යවරයකු විසින් අප රටට විදේශ විනිමය ගෙන එන ලොව හොඳම තේ යන සන්නාමය හිමි  ක්ෂේත්‍රයක් මෙසේ අභියෝගයට ලක් කරන්නේ හිතාමතාමද යන සැකය  අසාධාරණ නොවේ.

මේ ලිපිය ඔබතුමා වෙත යොමු කරන්නේ මෙම ඇමතිවරයාගේ  හැසිරීම පිළිබඳව නිසි ක්‍රියාමාර්ගයන් නොගැනීම වැරදි පූර්වාරදර්ශයක් විමට හැකිය,  මැතිවරණ ආසන්නයේ ඇති බැවින් අමාත්‍යවරුන් ඡන්ද ආකර්ෂණය කර ගැනීම සඳහා තම විෂය පථයට අයත් ක්ෂේත්‍රයන්ට මෙසේ බලපෑම් කිරීමට යොමු වුවහොත් විනයක් නීතියක් නැති රටක් බවට අප රට පත් විමට පුලුවන.

මෙයට විශ්වාසි,
ශර්මිලා ගෝනවෙල
සමාජ ක්‍රියාකාරිනි.