ඉන්දීය අක්ෂි දියර වර්ග එකොළහක් භාවිතයෙන් ඉවතට..

Aug 12, 2026 at 01:23 PM

|

Lanka Leader

ඉන්දියාවේ ප්‍රමුඛතම ඖෂධ නිෂ්පාදන සමාගමක් වන 'සන් ෆාමා' (Sun Pharma Distributors Ltd) මගින් නිෂ්පාදිත අක්ෂි දියර (Eye Drops) වර්ග 11ක් වෙළඳපොළෙන් වහාම ඉවත් කර ගැනීමට පියවර ගෙන තිබේ. 

ඉන්දියාවේ අක්ෂි වෛද්‍යවරුන් 27,000කට අධික පිරිසක් නියෝජනය කරන 'සමස්ත ඉන්දියානු අක්ෂි වෛද්‍ය සංගමය' (AIOS) මගින් සිදුකළ පරීක්ෂණවලදී, අදාළ ඖෂධ කාණ්ඩ තුළ 'සියුඩොමොනාස්' (Pseudomonas) නමැති බැක්ටීරියාව අඩංගු බවට තහවුරු වීමත් සමඟ මෙම තීරණය ගෙන ඇත. මෙම බැක්ටීරියාව ශරීරගත වීමෙන් හෝ ඇසට ඇතුළු වීමෙන් බරපතළ අක්ෂි ආසාදන මෙන්ම පෙනීම අහිමි වීමේ දැඩි අවදානමක් පවතින බව විශේෂඥයෝ පෙන්වා දෙති.

ඒ අනුව සමාගම විසින් බෙදාහරින්නන් වෙත නිවේදනය කර ඇත්තේ Depopred 2ML, Brinolar (BKC FREE), Brinzotim Eye Drops 5ML BKC FREE, Lotepred-5ML, Lotepred 1%, Lotepred LS 0.2%, Lotepred T, Nepalact OD Eye Drops 3ML, Nepalact-Z, Toba-F සහ Nepalact E/D 5ML යන අක්ෂි දියර වර්ග අලෙවිය වහාම අත්හිටුවා නැවත භාරදෙන ලෙසයි. 

කෙසේ වෙතත්, මෙම ඖෂධ බොහොමයක් ග්ලුකෝමා තත්ත්වයන් සහ අක්ෂි සැත්කම්වලින් පසු භාවිතයට නියම කරන ඒවා බැවින්, දැනට මෙම අක්ෂි දියර භාවිතා කරන රෝගීන් එකවරම භාවිතය නතර නොකර වහාම තම අක්ෂි වෛද්‍යවරයා හමුවී විකල්ප ඖෂධ ලබාගත යුතු බව විශේෂඥ වෛද්‍යවරු උපදෙස් දෙති.

මෙම ඖෂධ වර්ග කිහිපයක් ශ්‍රී ලංකාවේ රජයේ සහ පෞද්ගලික රෝහල්වල ද බහුලව භාවිත වන බැවින්, සෞඛ්‍ය අමාත්‍යාංශය සහ ජාතික ඖෂධ නියාමන අධිකාරිය (NMRA) මේ පිළිබඳව වහාම පරීක්ෂා කර අදාළ ඖෂධ කාණ්ඩ මෙරට වෙළඳපොළේ පවතින්නේ නම් ඒවා ඉවත් කිරීමට කඩිනම් පියවර ගත යුතු බවට වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානයේ සභාපති විශේෂඥ වෛද්‍ය චමල් සංජීව මහතා අදහස් දක්වමින් අවධාරණය කරයි.