සමාජය බිඳවට්ටවා රාජ්‍ය අත්පත්කර ගැනීමේ දැවැන්ත මෙහෙයුම ගැන ජ්‍යෙෂ්ඨ මාධ්‍යවේදී මොහාන් සමරනායකගෙන් හෙළිදරව්වක් (වීඩියෝ)

Jul 9, 2024 at 07:42 AM

|

Lanka Leader

සමාජය බිඳවට්ටවා රාජ්‍ය අත්පත්කර ගැනීමේ දැවැන්ත මෙහෙයුමක් මෙරට තුළ සිදුවූ බව ජ්‍යෙෂ්ඨ මාධ්‍යවේදී, ප්‍රවීන දේශපාලන විචාරක මොහාන් සමරනායක මහතා පවසයි.

මෙරට සිටින අමෙරිකානු එක්සත් ජනපද තානාපතිනිය ජුලි චන්ග් මහත්මිය පසුගිය දිනෙක මෙරට මැතිවරණ කොමිසමට ගොස් රටේ මැතිවරණ සිදුකරන ආකාරය පිළිබඳ සොයාබලා ඇති බවත්, අමෙරිකාවේ වොෂින්ටන් නුවර සිටින මෙරට තානාපති මහින්ද සමරසිංහට අමෙරිකානු රාජ්‍ය දෙපාර්තමේන්තුවට හෝ මැතිවරණ බලධාරීන්ගේ ආයතනයකට ගොස් එසේ සොයාබැලීම් කිරීමට හැකියාවක් පවතිනවාදැයි මොහාන් සමරනායක මහතා ප්‍රශ්න කරයි.

2024 නොවැම්බර් මස පැවැත්වෙන අමෙරිකාවේ ජනාධිපතිවරණය හරියට කෙරෙනවාදැයි සොයා බැලීමට ඔහුට හැකිදැයි ප්‍රශ්න කරන ඒ මහතා, එය කිසිසේත් කළ නොහැකි දෙයක් බව පෙන්වා දෙයි.

අමෙරිකාවේ පමණක් නොව ඉන්දියාව හෝ චීනය මෙන්ම රුසියාවේත් මෙය සිදුකළ නොහැකි නමුත් මේ රටේ එලෙස හැකියාවක් ඇතිවී තිබෙන බවත් මොහාන් සමරනායක මහතා සඳහන් කරයි.

2022 අවුරුද්දේ මෙරට සිදුවූ අරගලය නමින් හැඳින්වූ ක්‍රියාදාමය තමන් හඳුන්වන්නේ අරගලයක් ලෙස නොව රාජ්‍ය පෙරළා දැමීමේ වර්ණ විප්ලවයක් ලෙස බවද, මෙය රටවල් බිඳවැට්ටවීම සඳහා භාවිතා කරනු ලබන මෙවලම්වලින් එකක් බවද ඒ මහතා සඳහන් කරයි.

මෙහිදී මහජන ඡන්දයෙන් පත්වූ ජනාධිපතිවරයා පළායන අතර, පසුව පාර්ලිමේන්තුවෙන් ජනාධිපතිවරයෙක්  තෝරාගැනීමේ ඡන්දය පැවැත්වෙන දිනට පෙරදින කොළඹ සිටින බටහිර රටවල තානාපතිවරු සහ මහ කොමසාරිස්වරු කතානායක හමුවී මේ කාර්ය සිදුකෙරෙන්නේ කෙසේ දැයි සාකච්ඡා කරන බවත්, එය බලපෑම් කිරීමක්  බවත්, ඒ රටවල මෙසේ තානාපතිවරුන්ට හෝ රාජ්‍ය නායකයන්ටවත් බලපෑම් කළ නොහැකි බවත් ඒ මහතා පෙන්වා දෙයි. 

සවිස්තරාත්මක වීඩියෝව නරඹන්න...