සමගි ජන බලවේග පක්ෂය සහ එක්සත් ජාතික පක්ෂය පළාත් පාලන මැතිවරණය සදහා එක්ව තරග කිරීමට වන සාකච්ඡා පසුගිය දිනවල පැවැත්විණ. එහෙත් නායකත්වය හා ලාංඡනය පිළිබඳව සාකච්ජා කළද සමගි ජන බලවේගය විසින් ටෙලිෆෝනය මිස වෙනත් කිසිදු ලාංඡනයකට එකඟ නැතැයි එක්සත් ජාතික පක්ෂයට දැනුම් දී ඇති බව වාර්තා වේ.

රජයේ සහතික මිලට වඩා වැඩි මිලකට පෞද්ගලික අංශය වී මිලදී ගනිමින් සිටින බැවින් එයින් අදහස් වන්නේ රජයට සැලසුම් කර ඇති පරිදි වී තොග සුරක්ෂිත කර ගැනීමට නොහැකි වනු ඇති බව සමස්ත ලංකා කුඩා හා මධ්‍ය පරිමාණ මෝල් හිමියන්ගේ සංගමයේ සභාපති යූ.කේ.සේමසිංහ පවසයි.

මෙරට දිගු කාලීන ණය ශ්‍රේණිගත කිරීම ඉහළ දැමීමෙන් පසුව ඇමෙරිකාව පදනම් කරගත් ණය ශ්‍රේණිගත කිරීම් ආයතනයක් වන ෆිච් රේටින්ග්ස් මෙරට රක්ෂණ සමාගම් 4 ක ජාතික රක්‍ෂක මූල්‍ය ශක්තිය ශ්‍රේණිගත කිරීම ඉහළ දමා ඇත.

මූල්‍ය අපරාධ විමර්ශන කොට්ඨාසය (FCID) ආරම්භ කිරීමට අදාළ මූලික කටයුතු මේ වනවිට සිදු කරමින් පවතින බව මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල ප්‍රකාශ කළා.

ජාතික ගොවිජන එකමුතුවේ සභාපති අනුරාථ තෙන්නකෝන් මහතා පවසන්නේ රුපියල් 120ට නොව 130ට වී ගත්තද දැන් පවතින මිලට වෙළඳ පොළට සහල් ලබාදීමේ හැකියාව පවතින බවයි. ඒ සදහා මිල සූත්‍රයක්ද ඔහු විසින් ඉදිරිපත්කළ අතර වැඩිදුරටත් පැවසුවේ. රජයන් විසින් වී මෝල් හිමියන් සදහා පනවා ඇති අධික බදු ඉවත් කරන්නේනම් තවත් අඩුවෙන් සහල් නිෂ්පාදනය කිරීමේ හැකියාව පවතින බවයි.

විදේශයන්හි පිහිටි ශ්‍රී ලංකා දූත මණ්ඩලවලට කරන දේශපාලන පත්වීම් පිළිබඳව ශ්‍රී ලංකා විදේශ සේවා සංගමය දැඩි කනස්සල්ල පළ කරන බව එම සංගමය නිවේදනයක් නිකුත් කරමින් පවසයි.

මන්නාරමේ ඉදිකිරීමට යෝජිත මෙගාවොට් 50ක සුළං විදුලි බලාගාරයේ ටෙන්ඩරය ලබාදීමට සුදුසුකම් සහිත සමාගමට ලබා නොදී දේශපාලන හිතවත්කම් මත වෙනත් ප්‍රසිද්ධ සමාගමකට ලබා දීමට කැබිනට් අනුමැතිය ලබාගෙන ඇතැයි වාර්තාවේ.

යූටියුබ් නාලිකාවක සම්මුඛ සාකච්ඡාවකට එක්වෙමින් යාපනය දිස්ත්‍රික් පාර්ලිමේන්තු මන්ත්‍රී අර්චුනා රාමනාදන් මහතා පවසන්නේ පාර්ලිමේන්තු මන්ත්‍රීවරයෙකු ලෙස තමා මසකට රුපියල් 56,000ක වැටුපක්, රුපියල් 125,000ක ගමනාගමන දීමනාවක් ඇතුළුව රුපියල් 275,000ක පමණ වැටුප් සහ දීමනා ලබාගන්නා බවයි.

පාර්ලිමේන්තු මන්ත්‍රීවරුන්ගේ විශ්‍රාම වැටුප අහෝසි කළ යුතු බවට ඉදිරිපත් කෙරුණු පෞද්ගලික මන්ත්‍රී යෝජනාව පාර්ලිමේන්තුවේදී අද (7) පස්වරුවේ සම්මත විය.