ඇමරිකාවෙන් දෙන යානය පිළිගන්න ආරක්‍ෂක ලේකම් තුයියකොන්ත සහ ජුලී චන්ග් එති

Oct 12, 2024 at 07:40 AM

|

Lanka Leader

ඇමරිකානු එක්සත් ජනපද රජය විසින් ප්‍රදානයක් ලෙස ශ්‍රී ලංකාවට ලබාදෙනු ලැබූ ශ්‍රී ලංකා ගුවන් හමුදාවේ නිරීක්ෂණ ගුවන් යානා සංචිතයට එක්වන නව බීච් ක්‍රාෆ්ට් කින්ග් එයාර් 360ER (Beachcraft King Air360 ER {Extended Range) වර්ගයේ නිරීක්ෂණ ගුවන් යානය පිළිගැනීමේ අවස්ථාවට ආරක්ෂක ලේකම් විශ්‍රාමික එයාර් වයිස් මාර්ෂල් සම්පත් තුයියකොන්ත මහතා, ශ්‍රී ලංකාවේ ඇමරිකානු එක්සත් ජනපද තානාපතිනි ජුලී චන්ග්, ශ්‍රී ලංකා ගුවන් හමුදාධිපති එයාර් මාර්ෂල් උදේනි රාජපක්ෂ මහතා සහ ඇමරිකානු එක්සත් ජනපද නාවික හමුදාවේ පැසිෆික් බලඇණියේ ආඥාපති අද්මිරාල් ස්ටීවන් කෝලර් මහතා (10දා) කටුනායක ශ්‍රී ලංකා ගුවන් හමුදා කඳවුරේ දී එක්වූහ.

ශ්‍රී ලංකා ගුවන් හමුදා අංක 03 සමුද්‍රිය බලඝණයට (No 3 Maritime Squadron) අනුයුක්තව රාජකාරි ඇරඹීමට නියමිතව මෙම නව බීච් ක්‍රාෆ්ට් කින්ග් එයාර් 360ER (Beachcraft King Air 360 ER) ගුවන් යානය ගුවන් හමුදා සම්ප්‍රදායානුකූලව ජල ආචාරය (Water Salute) සිදුකරමින් පිළිගනු ලැබිණි.

ඇමරිකානු එක්සත් ජනපද රජය විසින් ප්‍රදානයක් ලෙස ශ්‍රී ලංකාවට ලබාදෙනු ලැබූ මෙම බීච් ක්‍රාෆ්ට් කින්ග් එයාර් නිරීක්ෂණ ගුවන් යානය නිල වශයෙන් භාර දීමේ සහ භාර ගැනීමේ ලේඛනයන් සඳහා ඇමරිකානු එක්සත් ජනපද නාවික හමුදාවේ පැසිෆික් බලඇණියේ ආඥාපති අද්මිරාල් ස්ටීවන් කෝලර් මහතා සහ ශ්‍රී ලංකා ගුවන් හමුදාධිපති එයාර් මාර්ෂල් උදේනි රාජපක්ෂ මහතා විසින් අත්සන් තබන ලදී.

ශ්‍රී ලංකාවේ සමුද්‍ර නිරීක්ෂණ සහ ආපදා ප්‍රතිචාර දැක්වීම වැඩිදියුණු කිරීම වෙනුවෙන් සමුද්‍රිය නිරීක්ෂණ වර්ගයේ ගුවන් යානාවක් ලබා ගැනීම පිළිබඳ අවධානය යොමු කරමින් 2019 වර්ෂයේ සිට ශ්‍රී ලංකාව සහ ඇමරිකානු එක්සත් ජනපද රජය අතර සාකච්ඡා වට කිහිපයක්ම පවත්වනු ලැබූ අතර එහි ප්‍රතිඵලයක් ලෙස ඇමරිකානු එක්සත් ජනපද රජය විසින් නව බීච් ක්‍රාෆ්ට් කින්ග් එයාර් 360ER වර්ගයේ ගුවන් යානයක් ප්‍රදානයක් ලෙස ශ්‍රී ලංකාවට ලබාදීමට කැමැත්ත ප්‍රකාශ කරන ලදී.

- දිවයින