88 - 89 මතකද?

Sep 12, 2024 at 08:21 AM

|

Lanka Leader

👉 අද 88-89 මතකදැයි අසන්නෝ බොහෝය. ඒ ගැන මතකය අවදි කරගැනීමට කැමති අය පක්ෂ පාට පසෙක තබා මෙහි එන සැබෑ ඉතිහාස සිදුවීම් ගැන අවබෝධයෙන් සිටීම ඉතා වැදගත්ය.

👉 88-89 යනු එක් තනි සිදුවීමක් නොව වසර කීපයක් තිස්සේ පෙළ ගැසුණු සිදුවීම් මාලාවක නිර්මාණයකි. එහි වැදගත් අවස්ථා මෙහි ඉතා කෙටියෙන් සාරාංශ කර තිබේ.  

👉 1977 ජුලි 22 පැවති මැතිවරණයෙන් එක්සත් ජාතික පක්ෂය ජය ගැනීමත් සමග විරුද්ධවාදීන්ට එරෙහිව මහා පරිමාණයෙන් ප්‍රචණ්ඩත්වය මුදා හැරිණි. මෙහිදී  මිනිස් ඝාතන 6ක්, නිවාස ගිනි තැබීම් 37ක්, පහරදීම් හා මංකොල්ලකෑම් 1400ක්, දේශපාලන පලිගැනීම් ලෙස සේවයෙන් පහකිරීම් 18462ක්, ස්ථාන මාරු කිරීම් 7288ක් වාර්තා විය.   

👉 1977 අගෝස්තු 17 වැනිදා ඇතිවූ ජාතිවාදී කෝලාහලවලින් විශාල පිරිසක් පීඩාවට පත් වූ අතර, එහිදී ඝාතන 100ක්, ස්ත්‍රී දූෂණ 284ක්, නිවාස ගිනි තැබීම් 8088ක්, දේපල මංකොල්ලකෑම් 20776ක්, පහරදීම් 40000ක් වාර්තා විය. 

👉 1978 පෙබරවාරි 4 වැනිදා ජේ. ආර්. ජයවර්ධන ප්‍රථම විධායක ජනපති ලෙස දිවුරුම් දුන් අතර නව ව්‍යවස්ථාවක් සම්මත කර ගැනීම සිදුවිය. 

👉 1978. 11. 20 ගෙන ආ පළමු ව්‍යවස්ථා සංශෝධනය මගින් සිරිමාවෝ බණ්ඩාරනායකගේ ප්‍රජා අයිතිය අහෝසි කොට තම ප්‍රධාන දේශපාලන ප්‍රතිවාදියා අක්‍රිය කෙරිණි.

👉 සරසවි සිසුන් මර්දනය සඳහා 1978 වසරේදී නව විශ්වවිද්‍යාල පනත සම්මත කර ගැනීම සිදුවිය. මේ කාලයේදී ශිෂ්‍ය මර්දන ක්‍රියා, පාතාල මැර පිරිස් යොදවා කළ පහරදීම්ද සුලබව වාර්තා වූ අතර රනිල් වික්‍රමසිංහ ඊට සක්‍රියව දායක වී ඇත.

👉 1978 මාර්තු 16 වැනිදා කැලණි සරසවියේ සිසුන්ට පහරදීමට පැමිණි ක්‍රිස්ටෝපර් ජයතිලක නමැති මැරයා ගැටුමකින් මරණයට පත්වූ අතර ජනාධිපතිවරයා ඔහුගේ අවමගුලට පවා සහභාගී විය.

👉 ස්ත්‍රී දූෂණයක් නිසා සිරගතව සිටි ගෝනවල සුනිල්ට ජනාධිපති සමාවක් ලබා දී සාම විනිසුරු පදවියක් පිරිනැමීමද මෙකල සිදුවූ අතර, ගෝනවල සුනිල් රනිල් වික්‍රමසිංහගේද සමීප මිතුරෙක් බව බටලන්ද කොමිෂන් සභා වාර්තාවේ සඳහන්ව තිබේ. 

👉 පඩි වැඩිවීමක් ඉල්ලා 1980 ජුනි 5 වෙනිදා සිදුකල පිකටින් ව්‍යාපාරයට මැර ප්‍රහාර එල්ල කෙරුණු අතර, එහිදී ඩී. සෝමපාල මහතා ඝාතනයට ලක් විය.

👉 1980 ජූලි 17 වැනිදා රුපියල් 300ක පඩි වැඩි වීමක් ඉල්ලා පැවති ජූලි වර්ජනයෙන් 40356 කට හිටි හැටියේ රැකියා අහිමි කිරීම සිදුවූ අතර, මෙහිදී පහරදීම්, සිරගත කිරීම් නිසා සිත් තැවුලට පත් වර්ජකයෝ 39 දෙනෙක් සිය දිවි හානි කොට ගත්හ.

👉 1981 ජනවාරි 21 වැනිදා අධ්‍යාපන ධවල පත්‍රිකාවට එරෙහිව පැවති උද්ඝෝෂණයට බරපතළ ප්‍රහාරයක් එල්ල වූ අතර,  මෙහිදී අශ්වයන් ලවා පෑගීමෙන් සිසුහු කීප දෙනෙක් සදාකාලික අබ්බගාත තත්ත්වයට පත්වූහ.

👉 1981 දිස්ත්‍රික් සංවර්ධන සභා ඡන්දයේදී ඇතිවූ ගැටුම් අතරතුර ආණ්ඩුවේ මැර පිරිස් දකුණු ආසියාවේ විශාලතම පුස්තකාලය වූ යාපනය පුස්තකාලයට ගිනිතැබූහ. වටිනා පොත් 90000ක් එහිදී විනාශයට පත්විය. 

👉 ඡන්ද පෙට්ටි අතුරුදන්වීම්, හොර ඡන්ද දැමීම්, බිය ගැන්වීම් රැසක් යටතේ 1981 සංවර්ධන සභා ඡන්දය පැවැත්වුණ අතර, මෙය මහා පරිමාණයෙන් අයථා ක්‍රියා සිදුවූ ලංකාවේ පළමු මැතිවරණය ලෙස ඉතිහාසයට එක් වෙයි.

👉 විරුද්ධ පක්ෂ නායිකාවගේ ප්‍රජා අයිතිය අහෝසි කොට, නියමිත කාලයට පෙර 1982 ඔක්තෝබර් 21 වැනිදා ලංකාවේ පළමු ජනාධිපතිවරණය පැවැත්වීමට ජේ. ආර්. ජයවර්ධන කටයුතු යෙදීය. මෙහිදී විරුද්ධ අපේක්ෂකයා වූ කොබ්බෑකඩුවගේ ජන්දය පවා වංචනික ලෙස භාවිතා කර තිබිණි.

👉 1982 ජූලි 22 වැනිදා බෞද්ධ සම්මේලන ශ්‍රවණාගාරයේ පැවති දේශනයකදී මහාචාර්ය සරත්චන්ද්‍ර ඇතුළු පිරිසකට මැර ප්‍රහාරයක් එල්ල විය.

👉 ලසසපයේ මන්ත්‍රීවරියක වූ විවියන් ගුණවර්ධනට කොල්ලුපිටිය පොලීසියේදී බිම දමා පහර දීමේ සිදුවීමක්ද මෙකල වාර්තා වූ අතර, උසාවියෙන් වරදකරු වූ පොලිස් පරීක්ෂකවරයාට ආණ්ඩුව උසස්වීමක් පිරිනැමීය.

👉 හතරවැනි ව්‍යවස්ථා සංශෝධනය මගින් පාර්ලිමේන්තු නිල කාලය මැතිවරණයකින් තොරව දීර්ඝ කර ගැනීමට ජේ. ආර්. ජයවර්ධන කටයුතු කළේය. 

👉 නක්සලයිට් කුමන්ත්‍රණ කතාවක් නිර්මාණය කොට ඒ යටතේ විජය කුමාරතුංග, හෙක්ටර් කොබ්බෑකඩුව, රත්නසිරි වික්‍රමනායක ඇතුළු පිරිසක් අත්අඩංගුවට ගැනුනු අතර, මැතිවරණ කල් දැමීමට හේතුව ලෙස එජාපය භාවිතා කළේද මේ නක්සලයිට් කතාවය. 

👉 මහ මැතිවරණයක් අවශ්‍යද නැද්ද යන්න විමසීමට 1982 දෙසැම්බර් 22 වැනිදා ජනමත විචාරණයක් පවත්වා ඡන්ද කල් දැමීම සිදුවිය. 

👉 රට පුරා හදිසි නීතිය පැනවීම, ශ්‍රිලනිප සංවිධායකවරුන් ඇතුළු විසිදෙනෙක් අත්අඩංගුවට ගැනීම, ඇත්ත පුවත්පතට සහ යාපනයේ පළවූ සුදන්ධිරන් පුවත්පතට සීල් තැබීම, ශ්‍රිලනිප පක්ෂ මූලස්ථානයට සීල් තැබීම, මැර බලය යෙදවීම, ඡන්ද මංකොල්ලකෑම්, බිය ගැන්වීම් ආදී ක්‍රියා මෙහිදී විශාල ලෙස වාර්තා විය. ඡන්ද කොමසාරිස්වරයා පසු කලෙක නිකුත් කළ වාර්තාවක ඒ කරුණු දැක්වේ.

👉 1983 ජූලි 24 වැනිදා එජාපයේ අනුග්‍රහයෙන් දෙමළ ජනයාට එරෙහිව ප්‍රචණ්ඩ ක්‍රියා රාශියක් දියත් විය. කළු ජූලිය ලෙස හැඳින්වෙන මේ ඛේදජනක අවස්ථාවේ නිවාස ගිනි තැබීම්, කොල්ලකෑම්, ස්ත්‍රී දූෂණ, පහරදීම්, මිනීමැරුම් රාශියක් වාර්තා විය.

👉 කළු ජූලියේ වගකීම වමේ පක්ෂ මත පැටවූ එජාප රජය ජවිපෙ, කොමියුනිට්ස් පක්ෂය, නව සමසමාජ පක්ෂය සහ අන්තර් විශ්ව විද්‍යාල ශිෂ්‍ය බල මණ්ඩලය තහනම් කළේය. (1983 ජූලි 30)  

👉 පක්ෂ තහනම ඉවත් කරගැනීමට ජවිපෙ දැරූ උත්සාහය දිගින් දිගටම ව්‍යර්ථ වූ අතර, තහනමට ලක් කොට දියත් කරන ලද මර්දනය ඔස්සේ ප්‍රජාතන්ත්‍රවාදී ප්‍රවාහයට පිවිස සිටි දේශපාලන ව්‍යාපාරයක් නැවත සන්නද්ද දේශපාලනයට ඇද දමනු ලැබීය. 

👉 1983 දෙසැම්බර් 27 වැනිදා පේරාදෙණිය සරසවිය තුළ පොලීසියක් ඉදිකළ අතර, ඊට එරෙහිව පැවති උද්ඝෝෂණවලදී  පද්මසිරි අබේසේකර (ජුනි 19) සහ රෝහණ රත්නායක (ජුනි 21) යන සිසුහු දෙදෙනා ඝාතනයට ලක්වූහ.

👉 1987 දී ඉන්දු ලංකා ගිවිසුමට අත්සන් තබමින් ලංකාව පෙඩරල් රාජ්‍යයක් කිරීමට පසුබිම සැකසිණි. මේ දේශද්‍රෝහී ගිවිසුම අත්සන් තැබීමට පෙර සරසවි සිසුන් 88ක් ඇතුළු ඊට විරෝධය පළ කළ පිරිස් විශාල වශයෙන් අත්අඩංගුවට ගනු ලැබිණි.

👉 1987 ජූලි 28 වැනිදා ඉන්දු ලංකා ගිවිසුමට එරෙහිව කොටුවේ පැවති උද්ඝෝෂණයට වෙඩි තැබීමෙන් 121 දෙනෙක් මහ පාරේ මරාදැමීම සිදුවිය. අනතුරුව රට පුරා ඇතිවූ කලබලවලින් 132ක් ඝාතනයට ලක්ව 712ක් අත්අඩංගුවට පත්විය. 

👉 රනිල් වික්‍රමසිංහගේ මැදිහත්වීමෙන් මේ භීෂණ සමයේදී බටලන්දේ වධකාගාරයක් පවත්වාගෙන ගිය අතර, ඒ තුළ පුද්ගලයන් 100කට අධික ප්‍රමාණයක් ඝාතනයට ලක්ව ඇත.

👉 1988 පළාත් සභා මැතිවරණය, 1988 ජනාධිපතිවරණය, 1989 පාර්ලිමේන්තු මැතිවරණය යන මැතිවරණ තුනම පවත්වන ලද්දේ භීෂණ සමයේ දැඩි ප්‍රජාතන්ත්‍ර විරෝධී පසුබිමක් යටතේය. ගිනි අවි රැගත් මැරයන් ඡන්ද පත්‍රිකා සියල්ල රැගෙන පෙට්ටි පිරවීමේ සිදුවීම් ගණනාවක් වාර්තා විය.

👉 1977 සිට පෙළ ගැසුණු මේ සිදුවීම් දකුණේ දැවැන්ත සන්නද්ධ අරගලයකට පවා පසුබිම සකසමින් රට මහා ඛේදවාචකයට ගොදුරු කළේ එසේය.

👉 88 - 89 මතකදැයි අසන්නෝ මේ අතීත කාරණා ගැන දැනුවත් වීම ඉතා වැදගත්ය.  

- ඉසුරු ප්‍රසංග