රාජාංගනේ සද්ධා

Jun 11, 2024 at 08:20 AM

|

Lanka Leader

මම රාජාංගනේ සද්ධා  කියන්නේ ජුලම්පිටියේ අමරේ, කඩුවල වසන්ත, මාකදුරේ මදුෂ්, කිඹුලාඇල ගුණේ, අංගොඩ ලොක්කා, දෙමටගොඩ චමින්ද ,කොස්ගොඩ තාරක වගේ පාතාල මැරයෝ හදුන්වන  අර්ථයෙන් මිසක් භික්ෂුවක් ආමන්ත්‍රණය කළ යුතු  චිරාගත සම්ප්‍රදාය අනුව නොවේ. රාජාංගනේ සද්ධාගේ චර්යා රටාව වඩාත්  නෑකම් කියන්නේ ශ්‍රමණ සාරුප්තියකට  නොව යට කී චණ්ඩි ප්‍රතිරූපකයන්ට බව මේ වෙද්දී බොහෝ දෙනා නොදන්නවා වෙන්න බැහැ. සුව කළ නොහැකි මනෝ ව්‍යාධියකින් පෙළෙන   රාජාංගනේ සද්ධා සමාජ මාධ්‍ය ජාලවල  කැරෙන විගඩම් සහගත හැසිරීම  ලාභ ජනප්‍රියත්වයක්  උදෙසාම කැරෙන්නක්  බැවින් අපි  ඔහු ගැන මිට පෙර නොලිව්වේ  එය පවා ඔහුට  අනවශ්‍ය ප්‍රචාරයක් වෙතැයි සිතූ නිසාය.

එහෙත් ෆේස්බුක් පේජ්  සහ යූ ටියුබ් හසුරුවන  ලයික් සහ   views හිගන්නන් විසින් මේ  අඥාන භික්ෂුවගේ ගොං කතා විවිධ සිරස්තල යටතේ පාවිචි කරමින් තිබෙන නිසාත්,  ඒවායින් චූන් වෙන පිරිසක්ද  සිටින නිසා මේ මදාවි භික්ෂුවට වැළදී ඇත්තේ මොන ජාතියේ පිස්සුවක් දැයි හෙළිදරව් කිරීම වැදගත් යැයි සිතමි.

රාජාංගනයේ සද්ධා සිටියේ  ශ්‍රාවස්තිපුර අලුත්වැව බෝධිරුක්ඛාරාමයේය. මිට අවුරුදු 2 කට පමණ ඉහත විහාරාධිපති බෝධිරුක්ඛාරාමය නමින් ෆේස්බුක් ගිණුමක් තනාගෙන මේ ආකාරයේම පිස්සුවක් නැටුවේය. විටෙක ඔහු බෙල්ලට පිහිතල දෙකක් තබාගෙන එය තව කෙනෙකු ලවා පොටෝ ගස්සවා  බෙල්ල කපාගෙන මැරෙන්නේ  යැයි ෆේස්බුක් දැමිය. එම අශිලාචාර දසුන් භික්ෂුවකට සුදුසුදැයි මිනිස්සු ප්‍රශ්න කළ විට "අඩෝ.. පඩෝ.. තොපි දැනගනිව්" යනුවෙන් භික්ෂුවක් තබා පාතාල මැරයන්වත් භාවිත  නොකරන භාෂණයකින් ෆෙස්බුක් එකේ හැසිරෙන විට රිපෝට් වැදී ගිණුම වැඩිකලක් නොයාම අතුරුදහන් විය. ඊට පසු මොහු විවිධ නම් වලින් ෆේස්බුක් ගිණුම් හත අටකට වඩා හදන්නට ඇත. ඔහුගේ හැසිරීම අනුවම ඒවාට වැඩි ආයුෂ නැතත් නව ගිණුමක් අටවා පිස්සු නැටීම නවතින්නේද  නැත. මෙහි ස්ක්‍රීන් ෂොට් එකක අමුණා ඇත්තේ ෆේස්බුක් ගිණුම් 7 ක් එසේ නඩත්තු කළ ආකාරයයි.

කාගේ හරි උදව්වකින් පවුල් කීපයකට වියළි ආහාර බඩුමලු ටිකක් බෙදා  මොහු  හිතාගෙන ඉන්නේ  ඒ ප්‍රදේශයටම ඉන්න "සඝ රජු" තමන් කියන මරි මෝඩ මානසිකත්වයකින් . ඇත්තටම එහෙම තමන් ගැන  තමන්ම  මවාගත් වීරකමකින්  "අපේ  සංඝ රජු " යැයි  ලොකු අකුරෙන්  එයාම  පොටෝ දාලත් තිබුනා. ඒ සියල්ලට අදාළ සාක්ෂි අප සතුව තිබේ. එවැනි දේවලින් මේ භික්ෂුවට  වැළදී තිබෙන  පිස්සුවේ තරම යම් පමණකට තේරුම්ගත හැකියි. මොහු ෆේස්බුක් එකට වීඩියෝ මුදාහරින්නේ ද රජරට සිටින "සංඝ රජු"  තමන් යන මානසිකත්වයෙනි. එහෙව්  සංඝ රජකමට ඇඳගෙන ''ඒයි ..ඥානසාර'' උඹ කවුද මොකක්ද කරන්නේ අහනවා. අබේතිස්ස උඹ මොනාද කලේ අහනවා. මාගල්කන්දේ සුදත්ත සාසනේ කන්න එපා කියනවා. මහානායක නායක හාමුදුරුවරුවරුන්ට කාලකන්ණි කියලා බනිනවා. සියලු රාජපක්ෂවරුන්ට හෙණ ගහපන් කියනවා. අඩු මාත්‍රාවකින්  සජිත්ටත් බනිනවා. ගුරු-විදුහල්පති අරගලය මෙහෙයවපු ජෝසොප් ස්ටාලිංටත්  බනිනවා. කිසි අදහසක් මතවාදයක් දැක්මක් නැති මේ භික්ෂුවගේ අඥානකම කොච්චරද කියනවා නම්  පුත්තු 4 ක් හදලා නැවතුන එක ලොකු දෙයක් කියලා රාජපක්ෂලාගේ දෙමව්පියන්ටත් බනින  සද්ධා වෙනත් පේජ් එකක  'පිංබර පුත්තු ටිකක් හදපු පිනම ඇති දවසක නිවන් දකින්න'' යැයි  වාක්‍යක් ගහලා ෆේස්බුක් දාපු පොටෝ එකකුත් share කරනවා. මේ මෝඩ සද්ධා දන්නේ නැහැ ඒ ඉන්නේ ඩි.ඒ රාජපක්ෂ සහ දන්දිනා හාමිනේ කියලා. මේ භික්ෂුව මොනවගේ මරිමෝඩ ගොං වහන්සේ කෙනෙක් ද යන්න තේරුම් ගැනීමට එයම  ප්‍රමාණවත්. 

2024 දී තමන් අනිවාර්යෙන්  ජනාධිපතිවරණය  පැමිණ "අම්මපල්ලා මේ රට හදනවා" යැයි දිවුරා පොස්ට් දමමින්  ජනාධිපති උන්මාදයකිනුත්  පෙළෙන මේ  

 මෝඩ භික්ෂුවගේ විකාර කතාවලින් අද වැඩිමනක් යැපෙන්නේ ජවිපෙ නුගතුන් වීමද  විශේෂයි. සිහි බුද්ධියක් ඇති කිසිවෙක් මේ මනෝ ව්‍යාධියකින් පෙළෙන්නෙකුගේ කතා අසා  අහවලාට දෙහි කපයි,මෙයාට දෙහි කපයි, අහවලාගේ රෙදි ගලවයි වැනි බාල සිරස්තල යොදමින් කෙළවරක් නැති ගොං කතාවලට ප්‍රචාරක් නොදෙයි. එහෙත් ජවිපෙ කාඩරයට මේ මොහොතේ යැපීමට පිස්සෙකුගෙ ප්‍රකාශයක් වුවද කම්නැති බව පෙනෙන්නට තිබෙන නිසා  රාජාංගනේ සද්ධා ජවිපෙ ගැනද  share කර තිබූ පොස්ට්වල තිර පිටපත් කිහිපයක් අමුණන්නේ මොහු මොනවගේ පිස්සෙක් ද යන්න ඔවුන්ටත් තේරුම් ගැනීම පිණිසය. 

මේ මෑතක සිට දැන් මේ අඥාන භික්ෂුව ඔසවා තබන්නේ සුදත්ත තිලකසිරි නම් කලාකරුවාය. ඔහු මේ ආණ්ඩුව බලයට ගෙන ඒමට වැඩකොට පසුව ආණ්ඩුව ගැන විවේචනාත්මක අදහස් පළ කිරීමෙන් කට උත්තරයක් ගැනීමට කියා අපරාධ පරීක්ෂණ දෙපාර්තමේන්තුවට කැඳවීය. අපිදු එය අනුමත නොකරමු. එය නොකළ යුතුව තිබුණකි. නමුත් මේ සිදුවීම වෙස් වලාගත් ආශිර්වාදයක් සේ  විශාල සමාජ අවධානයකට පෙරළා ගැනීමට තැත් කළ සුදත්ත තිලකසිරි මෙවන් අඥාන භික්ෂුවකගෙනුත්  කුඩය ඉහළා ගැනීමට තරම් බංකොලොත් වීම ලැජ්ජාවට කරුණකි. දැන් තමන් වෙනුවෙන් කොළඹ පැමිණ එදින පෙනීසිටියාට කෘත ගුණ දැක්වීමක් ලෙස මේ භික්ෂුවට ආශ්‍රමයක් තනා දීමට සල්ලි සම්මාදම් කිරීමට ද ඉදිරිපත්වී තිබේ. දැනටමත් ලක්ෂ 30 ක් පමණ ගිණුම් දෙකකට එකතුවී ඇති බවද පැවසුවා මතකය. තම රුචි අරුචිකම් මත ආශ්‍රමයක්  මන්දිරයක් තනා දුන්නද අපට කම් නැත. මුදල් දැමීමට ද  ඕනෑම කෙනෙකුට නිදහස තිබේ. නමුත් මේ රට, ජාතිය, ආගම වෙනුවෙන් පෙනී සිටින භික්ෂුවක් ලෙස මේ පිස්සව  හඳුන්වා දෙමින් මිනිස්සු නොමග යැවීම සුදුසු නැත. මොහුට ආරාමයක්  සකස්කර දිය යුත්තේ අනුරාධපුරයේ නොව අංගොඩ මානසික රෝහල් පරිශ්‍රයේය. මොහු අද ෆේස්බුක් එකේ යන බොරුවක් වුවද  විශ්වාස කරමින් සංඝ රාජ මානසිකත්වයෙන් ප්‍රතිචාර දක්වමින් ඔප්පු කරමින් සිටින්නේ වදුරකුට දැලි පිහිය අහුවුණාට  වැඩි හානියක්  පිස්සෙකුට ස්මාර්ට් පොන් එකක් ලැබීමෙන් සිදුවිය හැකි බවයි. සද්ධාගේ  රාජපක්ෂ විරෝධයෙන් චූන් වී  මුදල් බැරකරන මිනිසුන්ට ද දෙවියන්ගේ පිහිටය. 

- රත්තනදෙණියේ මේධානන්ද හිමි -
(සමාජ මාධ්‍යයෙන් උපුටා ගැණිනි)