බෞද්ධ සංස්කෘතියට ගහන අය බෞද්ධ දර්ශනයට මෙච්චර ආදරේ ඇයි?

May 27, 2024 at 08:28 AM

|

Lanka Leader

👉 උතුරේ කොටි සැමරුම්වලට සහභාගී වෙමින් මල් පහන් පූජා කරන අය, බුදුන්ට මල් පහන් පූජා කිරීම විද්‍යාත්මක නැති බව අපට කියාදීමට උත්සාහ දරති.  

👉 ගංජා, මත්පැන්, කාන්තාවන් ආදියේ ඇලී සිටිමින් ජීවිතය විඳීමේ රසය ගැන කවි කතා ලියන අය  බෞද්ධ පිළිවෙත්වල නොඇලී සිටීමේ වැදගත්කම ගැන අපට දේශනා පවත්වති. 

👉 සෑම දෙයකදීම අයිතිය ගැන, අයිතිවාසිකම් ගැන, අත්කරගැනීම ගැන කතා කරන අය බෞද්ධයාගේ ප්‍රශ්නවලදී පමණක් අතහැරීමේ අගය ගැන කතා කරති.   

👉 පීඩාවන්ට එරෙහිව නැගී සිටීමේ සටන් කිරීමේ වැදගත්කම ගැන හෑලි ලියන අය බුදු දහමට අපහාස කිරීමේදී, බෞද්ධ සිද්ධස්ථාන වැනසීමේදී අප ඉවසීමෙන් සිල් රැකිය යුතු ආකාරය අපට දේශනා කරති. 

👉 අනෙක් ආගම් ගැන කතා කිරීමේදී අනෙකාගේ සංස්කෘතික අයිතියට ගරු කළ යුතු යැයි කියන අය බෞද්ධ සංස්කෘතිය ගැන කතා කිරීමේදී එය විචාරශීලීව විද්‍යාත්මකව ප්‍රශ්න කළ යුතු බව අපට උගන්වති. 

👉 මානවයාගේ උසස් සංස්කෘතික ජීවිතයක් ගැන හෑලි ලියන අය බෞද්ධයාගේ සංස්කෘතික කටයුතු වෙනුවෙන් යොදවන මුදලින් ඉස්පිරිතාල සෑදිය යුතු බව අපට උගන්වති. 

👉 මේ ආකාරයට නොඇලී සිටීම, අතහැරීම, ඉවසීම, මෛත්‍රිය, විචාරශීලීත්වය, පරිත්‍යාගය ආදී බුදු දහමේ එන සංකල්පම මේ පිරිස බෞද්ධ සංස්කෘතියට පහරදීම සඳහා අතිශය වංචනික ලෙස අවභාවිතයේ යොදවන ආකාරය ගැන තව උදාහරණ අපමණය.  

👉 ඔවුන්ගේ අරමුණ වන්නේ බෞද්ධ දර්ශනය වටිනා ගැඹුරු දර්ශනයක් බව කියමින් බෞද්ධ සංස්කෘතියේ සියලු අංග හෙළා දැකීමට අපගේ මනස පුහුණු කරවීමය.  

👉 එය කරනුයේ බෞද්ධ දර්ශනය ගැන ඇති ආදරයක් නිසා නොව, බෞද්ධ දර්ශනයට පැවැත්මක් ඇත්තේ බෞද්ධ සංස්කෘතිය තුළ පමණක් බව ඔවුන් හොඳාකාරවම දන්නා නිසාය. 

👉 බෞද්ධ දර්ශනය ගැන බොරු වර්ණනා කරමින්, බෞද්ධ දර්ශනයේ එන කාරණාම තියුණු ආයුධ ලෙස යොදා ගනිමින්, බෞද්ධ සංස්කෘතියට පහරදීම නූතන බෞද්ධ විරෝධීන්ගේ ප්‍රධානතම උපක්‍රමයකි. 

👉 අප ඒ සටකපට උපක්‍රමය තේරුම් නොගැනීමේ ප්‍රතිඵලය විය හැක්කේ ඊනියා විචාරශීලී බෞද්ධ සමාජයක්  බිහිවීම නොව බෞද්ධ සංස්කෘතියත්, බෞද්ධ දර්ශනයත් යන දෙකම දිනෙන් දින විනාශ මුඛයට ඇදී යාමය. 

- ඉසුරු ප්‍රසංග