1950 දී අමෙරිකාව සහ 2024 දී අමෙරිකාව

Apr 26, 2024 at 06:30 PM

|

Lanka Leader

👉 මේ රූපය ගැන ඔබට හිතෙන්නේ මොනවාද? 

👉 මේ උඩ රූපයේ ඇත්තටම තියෙන්නේ 1950 දශකයේ අමෙරිකාවේ නගරයක පින්තූරයක්. පහළ රූපයේ ඇත්තටම තියෙන්නේ 2024 අමෙරිකාවේ නගරයක පින්තූරයක්.

👉 මේ පින්තූර දෙකම වියුක්තව ඇත්ත වුණත් 1950 ඉතා සශ්‍රීක රටක්ව තිබූ අමෙරිකාව 2024 වන විට නන්නත්තාර වී ඇති බවක් මෙයින් කිසිසේත්ම අදහස් වෙන්නේ නෑ. 

👉 යමෙක් මෙයින් එවැනි අදහසක් හැඟවීමට උත්සාහ කළොත් එය බරපතළ විහිළුවක් බව අමුතුවෙන් කිව යුත්තක් නොවෙයි. 

👉 එහෙත් ලංකාව හා ලෝකය පිළිබඳ එවැනි අදහස් ප්‍රකාශ කිරීමට මේ වර්ගයේ අතිශය නොමඟ යවන සුළු පින්තූර, මීම්ස් සමාජ මාධ්‍ය තුළ ඉතා බහුලව භාවිත කෙරෙනවා. 

👉 භාවිත කෙරනවා විතරක් නෙමෙයි බොහෝ දෙනා කිසිදු විචාරයකින් තොරව ඒ අදහස් සාදරයෙන් පිළිගන්නවා. ඒවා ඇත්ත යැයි සිතාගෙන ඒවාට ආවේගශීලීව ප්‍රතිචාර දක්වනවා. 

👉 ඊට පස්සේ මුහුණු පොතෙන් ලෝකය දකින ප්‍රජාව ලෝකය ගැන නිගමනවලට එළැඹෙන්නේ කරුණු කාරණා හෝ හැදෑරීම් මත නොවෙයි මෙවැනි අතිසරල රූපමය උසි ගැන්වීම් මත. 

👉 කාටූන් හෝ ඡායාරූප කියන්නේ යමක් පිළිබිඹු කළ හැකි ප්‍රබල සන්නිවේදන මාධ්‍යයක් බව ඇත්ත.

👉 නමුත් රටක සංවර්ධනය, සමාජ ආර්ථික තත්ත්වය, සංස්කෘතික පසුබිම වගේ අතිශය සංකීර්ණ කාරණා ගැන සම්පූර්ණ අදහසක් ලබාගැනීමට මේ සරල පින්තූර එකකින් දෙකකින් කිසිදු හැකියාවක් නෑ.

👉 දත්ත සංඛ්‍යා ලේඛනවලින් පවා රටක් ගැන නිගමනවලට ඒමේදී මතු වන ගැටලු පරස්පරතා අප්‍රමාණයි. එවැනි තත්ත්වයක් තුළ මෙවැනි සරල පින්තූර ඔස්සේ නිගමනවලට ඒම කෙතරම් මුළාවක්ද යන්න අමුතුවෙන් කිව යුතු නෑ. 

👉 අන්තර්ජාලය, සමාජ මාධ්‍ය භාවිතය කෙතරම් ඉහළ ගියත් සමාජ දේශපාලන සාක්ෂරතාව අතින් අපේ තරුණ පරපුර සහ ඊනියා උගත් ප්‍රජාව පහළ මට්ටමක ඉඳීමට එක් ප්‍රබල හේතුවක් මේක. 

👉 ඒ කියන්නේ කරුණු සොයා බැලීමකින් හෝ හැදෑරීමකින් තොරව හුදු පින්තූර, කාටූන්, සරල වාක්‍ය කෑලි, ව්‍යාජ කාව්‍ය අලංකාර ආදිය ඔස්සේ ලෝකය ගැන කඩිනම් නිගමනවලට එළැඹීම.  

👉 මේවා ගැන කරුණු කාරණා සහිතව ලියන කියන කතා කරන අය සමාජ මාධ්‍ය තුළ සිටියත් ඒ අදහස් ගැන විමසා බලන්න බොහෝ දෙනා කාලය වැය කරන්නේ නෑ. 

👉 බොහෝ දෙනා සංකීර්ණ ඇත්තට පයින් ගසා සරල බොරු පසුපස දුවනවා.

👉 රටේ ප්‍රධාන මාධ්‍යවල පළවන කුණු කන්දල් ගැන ගල් පැලෙන විවේචන කරන මිනිස්සුම සමාජ මාධ්‍ය තුළ බොහෝ විට කරන්නේ බාල කුණු කන්දල් හඹායාම පමණයි. 

👉 මේ නිසා කිසිදු මහන්සියකින් තොරව හුදු පින්තූර කෑලි, වාක්‍ය කෑලි, කවි කතන්දර ඔස්සේ අපේ රටේ මිනිස්සුන්ව රවට්ටමින් ජන මතය වෙනස් කිරීම ඕනෑම අයෙකුට පහසුවෙන් කළ හැකි දෙයක්.

👉 නූතන යටත්විජිතවාදයේ ඒජන්තයන් බොහෝ විට ඔවුන්ට අවැසි ලෙස තරුණ පරපුරේ මතවාද සැකසීම සඳහා භාවිතා කරන ප්‍රධානතම උපක්‍රමය වන්නේ ඒක. 

👉 ඒ කියන්නේ කරුණු කාරණා, දත්ත, සංඛ්‍යාලේඛන ඔස්සේ කිසිසේත්ම ඔප්පු කළ නොහැකි පට්ටපල් බොරු සමාජ මාධ්‍යවල අතිසරල මීම්ස් ඔස්සේ සමාජගත කිරීම. 

👉 ඒ දේවල් දිගින් දිගට දකින කොට ඒවා අතිශය සාමාන්‍යකරණය වෙලා ක්‍රමයෙන් සාමාන්‍ය ජනමතය බවට පත්වෙනවා. එවැනි දේවල් ගැන අවශ්‍ය නම් උදාහරණ සහිතව කතා කරන්න පුළුවන්.  

👉 අපි මේ විදිහට අමෙරිකාවේ ඡායාරූප දෙකක් ඉදිරිපත් කළෙත් මීම්ස්වලින් ලෝකය දැකීමේ විකෘතිය ගැන පැහැදිලි කරන්න මිසක් ලංකාවේ කිසිදු ප්‍රශ්නයක් නෑ කියන්න නෙමෙයි. 

👉 අපි කියන්නේ ලංකාවේ හා ලෝකයේ සැබෑ තත්ත්වය ගැන හරියට දැනගන්න අවශ්‍ය නම් මීම්ස්වලින් ලෝකය කියවීමට සීමා නොවී චුට්ටක් හරි ඒ ගැන කරුණු කාරණා හොයාබලන්න කියන එක විතරයි.