හිමාලයා ප්‍රකාශනය මගින් සත්‍ය සෙවීමේ හා වගවීමේ පනත ගේන්න ජනපති රනිල් දෙමළ මන්ත්‍රීවරුන්ට ප්‍රතිඥා දී තිබෙනවා - ගෝලීය ශ්‍රී ලාංකික සංසදයේ විධායක කමිටු ලේකම් යසස් ධර්මදාස

Jan 3, 2024 at 07:37 AM

|

Lanka Leader

2022 මාර්තු මාසයේ දී පැවැත් වූ මානවහිමිකම් සැසියේ දී ශ්‍රී ලංකාව එරෙහිව ඉදිරිපත් කළ යුද අපරාධ චෝදනා සම්බන්ධයෙන් ගන්නා ක්‍රියාමාර්ගය කුමක්දැයි එවකට ජනාධිපතිවරයාව සිටි ගෝඨාභය රාජපක්ෂ මහතාගෙන් විමසූ විට ඔහු පැවසුවේ දෙමළ මධ්‍යස්ථ ඩයස්පෝරාව සම්බන්ධකර ගනිමින් එයට විසඳුම් සපයා ගනු ලබන බව යැයි ගෝලීය ශ්‍රී ලාංකික සංසදයේ විධායක කමිටු ලේකම් යසස් ධර්මදාස මහතා සඳහන් කරයි.

එම අදහස ගෝඨාභය රාජපක්ෂ මහතාට ලබාදුන්නේ ජී.එල්. පීරිස් මහතා විසින් බව තේරුම්ගත හැකි බවත්, එහෙත් ගෝඨාභය රාජපක්ෂ මහතාට වැරදුනේ ද දෙමළ ඩයස්පෝරාව සම්බන්ධ කරගැනීමට යාමෙන් බවත් යසස් ධර්මදාස මහතා පවසයි.

යුද අපරාධ චෝදනාවලින් ගැලවීමට ස්වභාවික යුක්තිය යොදා ගත්තේ නම් ප්‍රශ්නය මෙතරම් දුරදිග නොයන බවත්, අද වෙන විට දෙමළ ඩයස්පෝරාව ක්‍රියාත්මක කරමින් සිටින බෙදුම්වාදී ව්‍යාපෘතිය වර්ධනීය තැනකට ගෙන ඒමට ගෝඨාභය රාජපක්ෂ මහතා එදා ගත් තීරණය ද බලපා ඇති බවත් ඒ මහතා පෙන්වා දෙයි.

හිමාලයා ප්‍රකාශනය මගින් සත්‍ය සෙවීමේ හා වගවීමේ පනත ගෙන ඒමට ජනාධිපති රනිල් වික්‍රමසිංහ මහතා දෙමළ මන්ත්‍රීවරුන්ට ප්‍රතිඥා දී ඇති බවද, ප්‍රශ්නය ඇත්තේ යුද්ධය අවසන් කිරීමට දායක වූ හිටපු ජනාධිපතිවරුන් වන මහින්ද රාජපක්ෂ මහතා හා ගෝඨාභය රාජපක්ෂ මහතාද මෙහිදී නිහඬව පසුවීම බවත් යසස් ධර්මදාස මහතා වැඩිදුරටත් පවසයි.

ඒ මහතා මේ බව පැවසුවේ 2009 ජනවාරි 02 දින මානුෂික මෙහෙයුම මගින් කිලිනොච්චිය මුදාගැනීම සමරා ඊයේ(02) දිනයේ බොරැල්ල එන්.එම් පෙරේරා මධ්‍යස්ථානයේ දී පැවති වැඩසටහනක දී  මාධ්‍ය වෙත අදහස් දක්වමිනි.

සවිස්තරාත්මක වීඩියෝව නරඹන්න...