2024 වසර රුසියාවේ පවුලේ වසරයි-රුසියානු ජනාධිපති වැලැදිමිර් පුටින් අලුත් අවුරුදු උදාවේදී රුසියානු ජනයාට අවධාරණය කරයි.

Jan 1, 2024 at 10:54 PM

|

Lanka Leader

රුසියාවේ පුරවැසියනි! මිතුරනි!,

අපි 2023 වසරට සමුදෙන්නෙමු. ඉතා ඉක්මනින් 2023 වර්ෂය ඉතිහාසයේ කොටසක් බවට පත්වනු ඇති අතර අනාගතය නිර්මාණය කිරීම පිණිස අපට ඉදිරියට යාමට සිදුවනු ඇත.

පසුගිය වසර තුළ අපි ඉතා වෙහෙස මහන්සි වී වැඩ කර බොහෝ දේ ඉටු කර ඇත්තෙමු. අපි අපේ පොදු ජයග්‍රහණ ගැන ආඩම්බර වෙමින් අපගේ සාර්ථකත්වයන් ගැන සතුටු වූවෙමු. අපගේ ජාතික අවශ්‍යතා, අපගේ නිදහස සහ ආරක්ෂාව අපගේ අත්හල නොහැකි පදනම බව ගැඹුරින් වටහාගෙන අපගේ වටිනාකම් ආරක්ෂා කරගනිමින් අපි පසුගිය වසර තුළ නොසැලී සිටියෙමු.

අපව එක්සත් කළ ප්‍රධානම සාධකය වන්නේ මාතෘ භූමියේ ඉරණමයි. රුසියාව පසුකරමින් සිටින ඓතිහාසික කාලපරිච්ඡේදයේ අතිශය වැදගත්කම, රුසියානු සමාජය මුහුණ දෙන එම අභිලාෂකාමී අරමුණු සහ අප සෑම කෙනෙකුටම දැනෙන මාතෘභූමිය පිළිබඳ දැවැන්ත වගකීම පිළිබඳව ගැඹුරු අවබෝධයක් අප සතුව ඇත.

මෙම කාල පරිච්ඡේදය තුළ අප මත පැටවී තිබෙන වගකීම , අප පවත්වාගත යුතු  ධනාත්මක ආකල්පයන් මෙන්ම වචනයෙන් සහ ක්‍රියාවෙන් එකිනෙකාට සහයෝගය දැක්වීමට අප තුළ ඇති ගැඹුරු අභිලාෂය පිළිබඳව අපි තියුණු මෙන්ම පැහැදිලි අවබෝධයකින් සිටිමු.

පොදු යහපත සඳහා වැඩ කිරීම රුසියානු සමාජය එක්සේසත් කිරීමට හේතු වී ඇත. අපගේ සිතුවිලි සහ අපගේ හැසිරීම් මගින් අප සටනේදීත්, සතියේ දිනවල හෝ නිවාඩු දිනවලදීත් අපි එක්සත්ව සිටියේ  සහයෝගීතාවය, දයාව, ධෛර්යය රුසියානු ජනතාවගේ ප්‍රධාන ලක්ෂණ බව විදහා දක්වමිනි.

මම අපේ හමුදා නිලධාරීන් ඇමතීමට මෙය අවස්ථාවක් කර ගනිමි. රාජකාරියේ යෙදී සිටින, සත්‍යය සහ යුක්තිය වෙනුවෙන් සටන් කරන ඉදිරි පෙළේ සිටින සියලු හමුදා නිළධාරී සගයිනි, ඔබ අපේ වීරයන් වන්නෝය. අපේ හදවත් ඔබ සමගයි. අපි ඔබ සම්බන්ධයෙන් ආඩම්බර වන අතර ඔබේ ධෛර්යය අපි ඉහළින්ම අගය කරමු.

ඔබගේ සමීපතම සහ ආදරණීයයන්ගේ ආදරය, මිලියන සංඛ්‍යාත රුසියානු පුරවැසියන්ගේ බලවත් හා අවංක සහයෝගය, සමස්ත ජනතාවගේ සහයෝගය ඔබට දැන් දැනෙන බව මම දනිමි.

දුෂ්කරම කර්තව්‍යයන් සමඟ සාර්ථකව කටයුතු කිරීමට අපට හැකි බව අපි නැවත නැවතත් ඔප්පු කර ඇති අතර, අපව බෙදීමට, අපගේ පියවරුන්ගේ මතකය හා ඔවුන්ගේ අභිලාශයන් අපට අමතක කරවීමට හෝ අපගේ සංවර්ධනය නතර කිරීමට කිසිදු බලවේගයක් නොමැති බැවින් අපි කිසි විටෙකත් පසුබට නොවන්නෙමු.

මිතුරනි,

සෑම විටම, අලුත් අවුරුදු සැමරුම් දීප්තිමත් බලාපොරොත්තු සමඟ සම්බන්ධ වී ඇති අතර ඔබ ආදරය කරන ඥාති හිතමිත්‍රාදීන්ට සතුට සහ සැනසුම ගෙන ඒමට අවංක ආශාවක් අප තුළ ඇත.

එළඹෙන 2024 වසර අපේ රටේ පවුලේ වසර ලෙස දැනටමත් ප්‍රකාශයට පත් කර ඇත. සැබෑ විශාල පවුලක් යනු ඇත්ත වශයෙන්ම ඔබට රැකවරණය සහ අවධානය ලැබෙන දරුවන් සිටින පවුලකි. එම පවුල තුළ උණුසුම් හදවත් සහ දෙමාපියන් සඳහා රැකවරණය පමණක් නොව එකිනෙකා කෙරෙහි ආදරය සහ ගෞරවයද සොයාගත හැකිය.

මේ ආකාරයේ පරම්පරාගත ඥාතිත්වය සහ කෙනෙකු තම නිවස කෙරෙහි දක්වන ආදරය මව්බිම කෙරෙහි වන භක්තිය පෝෂණය කිරීමට ඉවහල් වේ.

සියලුම රුසියානු පවුල්වලට නව වසර සඳහා මගේ සුභ පැතුම් පිරිනැමීමට මම මෙය අවස්ථාවක් කර ගනිමි. ඇත්ත වශයෙන්ම, අපගේ අතිවිශාල, පුදුම සහ ආදරණීය මාතෘ භූමියේ ඉතිහාසය සෑම පවුලකම ඉතිහාසයෙන් සමන්විත වේ. අපි, රුසියාවේ බහුජාතික ජනතාව, රුසියාවේ අනාගතය හැඩගස්වන්නෙමු.

අපි එක රටක්, එක ලොකු පවුලක් වන අතරම අපි මව්බිමේ ස්ථාවර සංවර්ධනය, අපගේ පුරවැසියන්ගේ යහපැවැත්ම සහතික කරන්නෙමු! එපමණක් නොව අපි තවත් ශක්තිමත් වන්නෙමු.

අපි සියළු දෙනාම එක මිටට එකතු වන්නෙමු. මෙය රුසියාවේ අනාගතය පිළිබඳ වඩාත්ම විශ්වාසදායක සහතිකයයි.

 මිත්‍රවරුනි! 2024 සුභ අලුත් අවුරුද්දක් වේවා!

https://www.rt.com/russia/589982-putin-new-year-address-english/