කුඹුක් ගස කෙතරම් වටිනවද දන්නවද..?

Dec 25, 2023 at 10:58 AM

|

Lanka Leader

ටර්මිනලියා අර්ජුන යනු ටර්මිනාලියා කුලයට අයත් ගසකි. එය පොදුවේ හැඳින්වෙන්නේ ඉංග්‍රීසියෙන් අර්ජුන හෝ අර්ජුන් ගස, තෙළිඟු භාෂාවෙන් තේලා මඩි, සිංහලෙහි කුම්බුක්, දෙමළ භාෂාවෙන් මරුදා මාරම් සහ මලයාලම්හි නීර් මරුතු යනුවෙනි. කුඹුක් ශාකය ශ්‍රී ලංකාවේ වියලි කලාපයේ සශ්‍රීකව වැඩෙන ඉතාමත් වටිනා ශාකයක් වේ.කුඹුක් ශාකය කොම්බ්‍රෙටාසේ (Combretaceae) කුලයට අයත්ය. මෙය ශ්‍රී ලංකාවට සහ ඉන්දියාවට ආවේණික වූ ශාකයක්. 

කුඹුක් ගසේ තිබෙන්නා වූ මිල කළ නොහැකි හැකියාව වන්නේ ජලය පිරිසිදු කිරීමයි. මෙහිදී ජලය මෘදු කිරීම(ජලයේ කිවුල ගතිය අඩු කිරීම) හා පිරිසිදුකරණයද සිදුවන අතර ඒ මඟින් මනුෂ්‍ය වර්ගයාට සිදු කරන සේවය අති මහත්ය.

විශේෂයෙන්ම වියලි කලාපයෙ දැන් දකින්නට ලැබෙන වකුගඩු රෝග ඇතිවීමට එක ප්‍රධාන හේතුවක් වී ඇත්තේ, කිවුල් ජලය හෙවත් කඨින ජලය භාවිත කිරීම බව වෛද්‍යවරු පවසති. ජලයේ බහුලව අඩංගු වන කැල්සියම් අඩංගු ලවණ සාන්ද්‍රණයෙහි අධික බව මේ තත්වයට හේතු වී ඇත.

 කුඹුක් ගහ කියන්නෙ මේ ගැටළු විසඳා ගැනීමට ස්වභාවධර්මයා විසින් ලබා දී තිබෙන එක් දායාදයක්. කුඹුක් වැව් ලිං පොකුණු ගංගා ඇළආශ්‍රිතව වගා කිරීමෙන් පිරිසිදු පානීය ජලය ලබා ගැනීමට හැකිවනු ඇත.

මතක තියා ගන්න අපේ මුතුන් මිත්තො විශේෂයෙන් සෑම වැවක් හා අනෙක් සෑම ජල මූලාශ්‍ර ආශ්‍රිතවත් කුඹුක් ගස් සිටෙව්ව කියල.

හිතට ගන්න පරිසරයට හානි කරන අයට පරිසරයෙන්ම දඬුවම් ලැබීම ස්වභාවිකය. එම නිසා ස්වභාවධර්මයාට විරුද්ධව කටයුතු නොකිරීම මානව වර්ගයාගේ ප්‍රධාන යුතුකම හා වගකීම වන්නේය.

සැබෑ පරිසර හිතකාමියෙකු ලෙස විනාශ වෙමින් පවතින පරිසරය අනාගත පරපුර උදෙසා රැක දීම කළ යුතුය. ඒ සදහා එක් පියවරක් ලෙස සෑම වැවක් ආශ්‍රිතව මෙන්ම ළිං හා අනෙකුත් ජල මූලාශ්‍ර ආශ්‍රිතව හැකිතරම් කුඹුක් පැල සිටුවීම, පිරිසිදු පානිය ජලය ලබා ගැනීමටත් එමඟින් නිරෝගී සෞඛ්‍ය සම්පන්න භාවයත් ලබා ගැනීමටත් හේතු වනු ඇත.

කුඹුක් ගස ගැන කිවුවොත්

අඩි 40-50 ක් උසට වැවෙන මහත කඳක් සහිත ඉතා විශාල ගසකි. මෙහි අතු හරස් අතට විහිදී යයි. පොත්ත ඉතා ඝනය, සිනිඳුය, ළා රෝස පාටය. මෙම පොත්තේ පහසුවෙන් පතුරු ගැලවී යයි. ළපටි රිකිලිවල සියුම් බූවක් ඇත. පත්‍ර සම්මුඛය, ආනතය, අඟල් 3-6 අතර දිගැතිය. පත්‍රයේ දෙකෙළවරම වටකුරුය. පත්‍ර දාරය කරපත්‍රිකය. පත්‍ර නටුව ඉතා කෙටිය. කක්ෂීය ශුකිවල හෝ කුඩා අග්‍රස්ථ සංයුක්ත ඒකාක්ෂවල පුෂ්ප හට ගනී. සාමාන්‍යයෙන් පුෂ්ප දක්නට ලැබෙන්නේ අප්‍රේල් හා මැයි මාසවලදීය.

මේ පුෂ්පවලින් තද පැණි සුවඳක් හමයි. පුෂ්ප කොළ පාටට හුරු සුදු පාටයි. පුෂ්පයක රේණු 8-10 අතර ඇත. ඵලය තුඩක් සහිත නොපැලෙන අෂ්ටිලයකි. එහි මධ්‍යාවරණය මාංසලය. පිටට නෙරා සිටින දුඹුරු පාට පියාපත් 5 ක් ඵලයෙහි ඇත.

ලංකාවේ පහතරට ගං ඉවුරු අසල කුඹුක් ගස් බහුලව වැවේ. වියළි ප්‍රදේශවලද වැව් ආශ්‍රිතව දක්නට ලැබේ. කුඹුක් පොත්තේ අගනා ඖෂධීය ගුණයක් ඇත. කුඹුක් ලීය තදය, ශක්තිමත්ය. එහි අරටුව රතු පාටට හුරු දුඹුරු පාටය.

ඖෂධීය වටිනාකම....

කුඹුක් කසටය, සිසිල්ය, සෙම් පිත් නසයි, හෘදයට හිතකරයි, වණ ශුද්ධ කරයි. කැඩුණ බිදුණ ඇට සන්ධි කරයි, ශක්තිය වඩයි හෘදයාබාධ, ලේ මදිකම, විෂ, මේදය වැඩිකම, රුධිර දෝෂ, වණ හා මුත්‍ර අඩස්සිය යනාදිය සුවපත් කරයි. පිපාසය සමනය කරයි. එහෙත් වාතය කුපිත කරයි. ආයුර්වේදයේදීත් දේශීය වෙදකමේදීත් කෂාය, පත්තු, මැල්ලුම් හා ආලේප රැසකට කුඹුක් පොතු හා මුල් භාවිතා වෙයි.

පැරැන්නන් විසින් කුඹුක් ගසෙන් ගත් ප්‍රයෝජන.....

කුඹුක් පොත්තෙන් ලබා ගන්න අළු ගර්භනී මව්වරුන්ට සාම්ප්‍රදායික ඖෂධයක් වශයෙන් ලබා දීම.( වර්ථමානයේදී ගර්භනී මව්වරුන් ට කැල්සියම් පෙති ලබාදීමෙන් බලාපොරොත්තු වන කලලයේ වර්ධනය මෙමඟින් ඉටුකරගෙන ඇත)

කුඹුක් පොතු කුඩු කර ලේ ගලන තුවාල වලට තැබීමෙන් සුව කර තිබෙන අතර, සමේ ඇතිවන රෝග සඳහාද ඖෂධයක් වශයෙන් භාවිතා කර ඇත.

කුඹුක් පොතු හීනියට කුඩු කර දත් මැදීමෙන් දත් දිරා යාම වළක්වා දත් ශක්තිමත් කර ගැනීම සිදු කර ඇත.

මුඛයේ ඇතිවන ආසාදනයන් සඳහා කුඹුක් පොතු තැම්බු වතුරෙන් කට සෝදා ගැනීම කර ඇත.

 ඓතිහාසිකව ගත්තොත්.....

අලව්ව, පරමාවුල්ල අම්බලම අසල පිහිටි ඓතිහාසික ගැට කුඹුක්‌ ගස දුර්ලභ ගණයෙහි ශාකයක්‌ ලෙස මධ්‍යම පරිසර අධිකාරියෙන් නම්කර තිබේ. මෙම ශාකය ක්‍රි. ව. 1200-1300 සමයේ III විජයබාහු රජු විසින් ඉදිකරවන ලද වැවේ බැම්මෙහි මෙම කුඹුක්‌ ගස පිහිටි බව සැලකේ.

අටවිසි බුදුවරුන් අතරින් යසවන්න රජු හා යශෝධරා දේවිය මවුපියන් වු අනෝමදස්සී බුදුරජාණන් වහන්සේ මාසයක් පමණ කෙටිකලක් දුෂ්කර ක්රියා කොට කුඹුක් ගස සෙවණේදී බුදු බවට පත්වූ බව සාසන ඉතිහාසයෙහි වේ....

කූඹුක් භාවිතයෙන් සුව කරගත හැකි ලෙඩ රෝග 10 ක්....

කුකුභ යන නමින් හදුන්වනු ලබන කුඹුක් ශාකය ආයුර්වේද ප්‍රතිකර්ම කිරීමේදී බහුලව භාවිතා කරන ඖෂධයකි. දේශීය ශාකයක් වන මෙම ශාකය ආයුර්වේදය තුළ අර්ජුන නමින් හදුන්වයි. එනම් Combretacea උද්භිද කුලයට අයත් කුඹුක් ශාකය මීටර් 25ක් පමණ උසට වැඩෙන සුදු හෝ රෝස පැහැයෙන් යුතු පොතු පතුරු මෙන් ගැලවී යන කඳක් සහිත ශාකයකි. මෙහි පත්‍ර සරල සම්මුඛව හෝ උප සම්මුඛව පිහිටා ඇති අතර පත්‍ර හැඩය ආයත සිට අණ්ඩාකාර ලන්සාකාරවේ. සංයුක්ත ඒකාක්ෂ  පුෂ්ප මංජරියේ හටගනු ලබන මල් වෘන්ත රහිත  කොළ හෝ කහ පැහැති මල්වේ.අෂ්ටලයක් වූ ඵලය නොපැලෙන සුළුය. තනි දුඹුරු පැහැති බීජයක් එම ඵලය තුළ අඩංගුවේ.

කුඹුක් ශාකයේ ඖෂධීය ගුණ...

පණු රෝගයට අධි රුධිර පීඩනයට වණ සමනයට පෙනහලු රෝග වලට විදුරුමසින් ලේ ගැලීමට පාණ්ඩුවට සුදු කබර රෝගයට දියවැඩියාව ඉදමුමටහෘද රෝගවලට රක්ත අතීසාරයට  රක්ත අර්ශස් රෝගයට

මේ ආදී වූ නොයෙක් රෝග සමනය කිරීමට ආයුර්වේදයේදී කුඹුක් ශාකයේ සුඹුළු ,ගෙඩි, කුඹුක් කොළ, කුඹුක් පොතු, බහුලව භාවිතා කරයි. යම් ප්‍රතිකාරයකට කුඹුක් ශාකයේ පොතු භාවිතා කරන විට රතු හෝ රෝස පැහැ වූ මේරූ  පොතු භාවිතා කළ යුතු බව දේශීය වෛද්‍යවරු සඳහන් කර තිබේ.

 කුඹුක් ශාකයේ ඖෂධීය භාවිතය...

පපුවේ දැවිල්ල සමනයට-බොහෝ දෙනෙකුට පවතින පපුවේ දැවිල්ල වැනි රෝග තත්ත්වයකදී කුඹුක් ශාකය භාවිතා කරමින් එම රෝග තත්ත්වය සඳහා ප්‍රතිකාර කළ හැකිය. එනම් කුඹුක් පොතු චූර්ණය පාවට්ටා කොල යුෂවල රැයක්  බහා තබා පසුදින උදෑසන අඹරා ගිතෙල් සමග ආහාරයට ගැනීම මගින් පපුවේ දැවිල්ල සමනය කරගත හැකිය. ඊට අමතරව මෙම ඖෂධය ක්ෂය රෝගයට ,රක්ත පිත්ත වැනි රෝග තත්ත්වයන්ට ද ගුණදායකය.

ශුක්‍ර මේහයට, සහ ශ්වේත ප්‍රදරයට-ශුක්‍ර මේහයට මෙන්ම කාන්තාවන්ට වැළඳෙන සුදයාමේ රෝග තත්ත්වයට කුඹුක් ශාකය ඖෂධයක් ලෙස භාවිතා කළ හැකිය එනම් කුඹුක් පොතු සුදු හඳුන් සමව ගෙන කෂාය කර පානය කිරීම මගින් එම රෝගයන්ට සහනය සලසා ගත හැකිය.

මීට අමතරව අමතරව ඉරුවාරදයට චර්ම රෝග වලට ශරීර ශක්තිය වර්ධනය කිරීමට කුඹුක් පොතු කෂාය කර පානය කිරීම යෝග්‍යවේ.

වන සමනය කිරීමට.වණ සමනය කිරීම සඳහා ආයුර්වේදයේ බොහෝ ඖෂධ භාවිතා කරන අතර කුඹුක් ශාකය ද වණ සමනය කිරීමට යොදා ගත හැකිය. එනම් කුඹුක් කොළ තම්බා වන සේදීම සහ කුඹුක් ගෙඩි තම්බා අඹරා වනය මත ගැල්වීම හා කුඹුක් කොලයකින් වණය වසා තැබීම මගින් වණය ඉක්මනින් සුව කරගත හැකිය.

රක්ත අතීසාරය සමනයට-රක්ත අතීසාරය සමනය කිරීම සඳහා කුඹුක් පොතු කිරි කෂාය කර පානය කිරීම ගුණදායක බව ආයුර්වේදයේ සඳහන්වේ.

ශරීරගත ඉදිමුම් සමනය කිරීමට.ශරීරගත ඉදිමුම් සමනය කිරීමට කුඹුක් මල් අබරා එම ප්‍රලේපය එම ස්ථානවල ආලේප කිරීම මගින් ඉදමුම් සමනය කරගත හැකිය.

දන්ත රෝග සුව කරයි.විදුරුමස්වලින් ලේ ගැලීම, දත් කැක්කුම වැනි රෝග සඳහා  කුඹුක් සුඹුළු කුඩු කර දත් මැදීම මගින් එම රෝග සුවකර ගත හැකිය.

කුරුලෑ සමනය කරයි.බොහෝ තරුණ තරුණියන්ට පීඩා ගෙන දෙන කුරුලෑ රෝග සමනය කිරීම සඳහා කුඹුක් පොතු කුඹුක් ශාකය ඖෂධයක් ලෙස භාවිතා කළ හැකිය. එනම් කුඹුක් පොතු මී පැණියෙන් ගලගා කුරුලෑ ඇති ස්ථානවල ආලේප කිරීමෙන් කුරුලෑ සමනය කරගත හැකිය.

පිළිකා සෛල විනාශ කරයි.මාරාන්තික රෝගයක් වන පිළිකා රෝගය ඇතිවීමට හේතුවන පිළිකා සෛල විනාශ කිරීමට කුඹුක් උපකාර වන බව කරන ලද නවතම පරීක්ෂණවලින් තහවුරු වී තිබේ. එනම් ඒ සඳහා කුඹුක් පොතු කඳේ සංඝටක සහ පොතුවල සංඝටක මේ සඳහා හේතුවේ.

යටි පතුල් පැලීම සමනය කරයිශරීරයේ උෂ්ණාධික බව හේතුවෙන් යටි පතුල් පැලීම ඇතිවේ. මේ සඳහා ඖෂධයක් ලෙස කුඹුක් ශාකයේ පොතු කුඩු කර කෝපි මෙන් පානය කිරීම ගුණදායකවේ.

මල බද්ධය සමනය කරයි.බොහෝ දෙනෙකුට බහුලව ඇතිවන මලබද්ධය වැනි රෝග තත්ත්වයන් සඳහා ද කුඹුක් ගුණදායකය. එනම් කුඹුක් දලු මැල්ලුමක් ලෙස සකසා ආහාරයට ගැනීම මගින් මල බද්ධය සමනය කරගත හැකිය.

මීට අමතරව දැව නිෂ්පාදන සිදු කිරීම සඳහා මෙන්ම බොහොමයක් ග්‍රාමීය ප්‍රදේශවල ජලය සිසිල් කර ගැනීම සඳහා මෙන්ම ජලය පිරිසිදු කර ගැනීම සඳහා කුඹුක් ශාකය ළිං ආශ්‍රිතව සිටුවා තැබීම සිදු කරයි. එමෙන්ම කුඹුක් ගසක් ළග ඇති ජලය ස්නානය කිරීමෙන් ශරීරය සිසිල් කර ගත හැකි බව ද බොහෝ ජනයාගේ විශ්වාසයයි...

උපුටාගැණීම අන්තර්ජාලය ඇසුරෙනි.....