හැකරයා එවු අවසන් පණිවිඩය..

Apr 25, 2026 at 09:09 AM

|

Lanka Leader

ආචාර්ය හාන්ස් සිය මැක්බුක් තිරය දෙස දෑස් නොපියා බලා සිටියේ ය. 

හැකරයා විසින් අවසන් වරට එවන ලද ඊමේලය දෙස ඔහු බලා සිටියේ කිසිදු කලබලයකින් තොරව ය.

“ඩොක්ටර්, මොකද හිතන්නේ?” අනුරගේ හඬින් ආචාර්ය හාන්ස්ගේ කල්පනාව බිඳිනි.

“මම තාම කල්පනා කරනවා,” ආචාර්ය හාන්ස් පැවසුවේ තිරය වෙතින් ඇස් ඉවතට නොගෙන ය.

“මගේ යටතේ තියෙන මුදල් අමාත්‍යාංශය ම හැක් කරලා ඩොලර් මිලියන ගානක් හොරකම් කළා ම කොහොමද ඩොක්ටර් අපි රාජ්‍ය ඩිජිටල්කරණය ගැන කථා කරන්නේ!” අනුරගේ ස්වරය දුක්මුසු ය.

ආචාර්ය හාන්ස් පිළිතුරු දුන්නේ නැත. හැඟීම් සමග මෙවැනි ප්‍රශ්න විසඳීමට නොහැකි බව ඔහු දනී. 

හැකරයා විසින් එවන ලද ඊමේලයේ සෑම අකුරක් ම, සෑම විරාම ලකුණක් ම, සෑම ඉලක්කමක් ම විමසිල්ලෙන් බැලූ ආචාර්ය හාන්ස්ට එම ලියමනෙහි කිසියම් සැඟවුණු කේතයක් පෙනෙන්නට විය. 

“මට කඩදාසියක් දෙන්න,” හාන්ස් ඉල්ලුවේ සිය කමිස සාක්කුවෙන් පාකර් පෑන අතට ගනිමිනි.

සිය මේසයේ පසෙක තිබෙන ෆොටෝකොපි කඩදාසි ගොන්නෙන් එකක් ගත් අනුර එය සිය ඩිජිටල් උපදේශකයාට දික් කළේ උනන්දුවෙනි.

තිරය දෙස වරින් වර බලමින් කඩදාසිය මත අකුරු ලියන්නට වූ ආචාර්ය හාන්ස් අවසානයේ කට කොනින් සිනහා පෑවේ ය.

“මොකද ඩොක්ටර් හිනා වෙන්නේ?” අනුර ඇසුවේ නොරිස්සුමෙනි.

හැකරයා විසින් එවන ලද අවසාන ඊමේලයේ සඟවා තිබූ පණිවිඩය සොයා ගත් ආචාර්ය හාන්ස් කඩදාසිය අනුර වෙත දිගු කළේ ය.

වෙව්ලන දෑතින් කඩදාසිය අතට ගත් අනුර ආචාර්ය හාන්ස් විසින් පරිවර්තනය කර තිබූ පණිවිඩය කියවූ සැණින් පුටුවෙන් බිමට වැටුණේ ය.

‘“ජනතාවට ව්‍යවස්ථාව උල්ලංඝනය කළ හැකිය” - නිර්මාල් දේවසිරි (2022)’ යනුවෙන් එහි ලියා තිබිණි.

එරන්ද ගිනිගේ

2026 අප්‍රේල් 24

(මුහුණු පොතෙන් උපුටා ගන්නා ලදී)