රෝහණ විජේවීර රුසියාවේ අධ්‍යාපනයට යැවූ ඊලියන් නානායක්කාර

Jan 28, 2026 at 09:38 AM

|

Lanka Leader

කඹුරුපිටිය ආසනයේ ඇති දිගම පාසල් ගොඩනැගිල්ල යටියන මහා විද්‍යාලයට ලබාදීම කළ ඊලියන් නානායක්කාර

අප කඹුරුපිටියේ  ඊලියන් නානායක්කාර නමැති දේශපාලනඥයා පිළිබඳව අසා තිබුණි. දේශපාලනයට පිවිසීමට පෙර මාතර උසාවි වල නීතිඥ වෘත්තියේ යෙදී සිටි ඊලියන් මහානාග නානායක්කාර මහතා මෙලොව එළිය දුටුවේ 1922 සැප්තැම්බර් 18 වැනි දිනය. ඒ ගිරුවා පත්තුවේ නාකුළුගමුවේදීය. ගල්කිස්සේ ශාන්ත තෝමස් විද්‍යාලයේ සිය ප්‍රාථමික අධ්‍යාපනය හැදෑරූ ඔහුට දෙවැනි ලෝක මහා සංග්‍රාමය පටන් ගැනීම නිසා දෙටු පෙළ විභාගයට පෙනී සිටීමට ඔන්න මෙන්න කියා තිබියදී කොළඹට බෝම්බ දමයි යන බියෙන් ශාන්ත තෝමස් විද්‍යාලයෙන් ඔහු ඉවත් කර ගැනිණි.

ඉන්පසුව ඔහු පන්නිපිටිය ධර්මපාල විදුහලටත්, මාතර රාහුල මහා විද්‍යාලයටත් ඇතුළත් කෙරුණු අතර අවසානයේ කොළඹ ආනන්ද විද්‍යාලයේදී සිය දෙටු පෙළ විභාගය සහ මෙට්‍රි කියුලේෂන් විභාගය ද ඉහළින් සමත් විය. 1945 දී නීති විද්‍යාලයට ඇතුළත්වී එහි අධ්‍යාපනය හමාර කළේ ප්‍රථම පන්තියේ ගෞරව සාමාර්ථයක්ද සහිතවය. නීතිඥ විභාගය සමත් වුවද වාමාංශික දේශපාලනයට එක්වීම නිසා නීතිඥයකු ලෙස දිවුරුම් දීමට හැකි වූයේ 1949 දීය. තම වෘත්තියේ යෙදීමට තමා උපන් ගම් ප්‍රදේශයම තෝරාගත් අධිනීතිඥ ඊලියන් නානායක්කාර මහතාට මාතර උසාවියේ ප්‍රමුඛ පෙළේ නීතිඥයකු වීමට ගතවූයේ ඉතාමත් සුළු කාලයකි. වයෝවෘද්ධ වීම හා අසනීප වීම හේතුකොට මාතර උසාවි සංකීර්ණය හැර යන තෙක්ම කවර නගරයක, කුමන උසාවියක පෙනී සිටියද සිය වෘත්තියේ යෙදීමේදී ඔහුට සුවිශේෂී තත්ත්වයක් තිබූ බව නොකියාම බැරිය.

ශ්‍රී ලංකා කොමියුනිස්ට් පක්ෂයේ නිර්මාතෘ දොස්තර එස්. ඒ. වික්‍රමසිංහ මහතාගේ දේශපාලනයට හිරිමල් වයසේදීම එක් වූ නානායක්කාර මහතා කොමියුනිස්ට් පක්ෂය ජනතාව අතරට ගෙන යන්නට කැපවී ක්‍රියා කළේය.  අප කුඩා කලම ඔහු ගැන දැන ගත්තේ ඔහුගේ මෙම වාමාංශික දේශපාලන වැඩ කටයුතු හේතුවෙනි. රාජ්‍ය මන්ත්‍රණ සමයේ සිටම වාමාංශික හා මාක්ස්වාදී දේශපාලනය දකුණෙන් මාතර දිස්ත්‍රික්කය දක්වාත්, දිවයිනේ ඉතාම නොදියුණු මට්ටම පැවැති කැලණිවැලි මිටියාවතහා බිබිල වැනි ප්‍රදේශ දක්වාත් ව්‍යාප්ත වී තිබුණි. දොස්තර එස්. ඒ. වික්‍රමසිංහ මහතා හැරුනු විට ප්‍රේමලාල් කුමාර සිරි, ඩොරින් වික්‍රමසිංහ, හැරී අභය ගුණවර්ධන, මහානාම සමරවීර, පර්සි වික්‍රමසිංහ, බී.වයි. තුඩාව, සරත් මුත්තෙට්ටුවේගම, ඊලියන් නානායක්කාර යන අයත්, පසුව ඊ. ඒ. සමරසිංහ,චන්ද්‍රසිරි ගජධීර.විරසුමන වීරසිංහ  ඉන්දික ගුණවර්ධන වැනි අයත්, කොමියුනිස්ට් පක්ෂය නියෝජනය කරමින් පාර්ලිමේන්තුවට තේරී පත්වූ අතර අනෙක් ප්‍රධාන වාමාංශික පක්ෂය වූ ලංකා සමසමාජ පක්ෂය කොළඹ, ගාල්ල, මාතර, කෑගල්ල, රත්නපුර, බදුල්ල, මොනරාගල, කළුතර, ගම්පහ ආදී දිස්ත්‍රික්කවල ආසන බොහොමයක් දිනා ගත්තේය.

කඹුරුපිටිය ආසනයේ ඇති දිගම පාසල් ගොඩනැගිල්ල යටියන මහා විද්‍යාලයට ලබාදීම, තම ආසනයේ බොහෝ ප්‍රදේශවල මහා මාර්ග විදුලිය ලබාදීම වැනි කටයුතු මගින් තම ප්‍රදේශයේ අධ්‍යාපනය නගා සිටු වීමට ඔහු කළ සේවය කිසිදා අමතක නොවේ. 

අප බිරිඳත් කුඩා දියණියන් තිදෙනාත් සමග උත්සවයකට සහභාගි වීමට යමින් සිටියදී මාතර නගරයට පිවිසීමට පෙර හදිසියේ පාර හරහා දිවගිය හරකකුගේ ඇකේ හැපීමෙන් මගේ මෝටර් රථයේ ඉදිරිපසට හානි සිදුවූ අතර වාහනයේ එන්ජිම සිසිල් කිරීමට ඇති වතුර රඳවනය කැඩියාමෙන් නිතර වතුර වත් කරමින් වාහනය පැදවීමට මට සිදු විය. මේ අවස්ථාවේදී අපට පිහිටට ආවේ එතෙක් කවදාවත් දැක හෝ දැන නොසිටි ඊලියන් නානායක්කාර මහතාය. කිසිදු දැන හැඳුනුම්කම් අපට ඒ වනතෙක්ම ඔහු සමග නොවීය. අබලන්ව තිබූ මගේ රථය වෙනුවට එතුමාගේ බෙන්ස් රථය අපට දුණි. එතුමාගේ රථයෙන් ගොස් මඟුලට සහභාගි වී එන විටත් මගේ රථය අලුත්වැඩියා කිරීම අවසන් කර නොතිබුණෙන් අපේ පවුලේ අයටත්, මා සමග එම මංගල්‍යයට සහභාගි වීමට ගිය මගේ සොයුරාටත් එදින රාත්‍රී නවාතැන් හා කැම බීම සැපයීමද ඊලියන් නානායක්කාර මහතා අතින් සිදුවිය. පසුදා වාහනය අලුත්වැඩියා කර අප වෙත ලැබුණු අතර කොළඹට පිටත් වීමට පෙර අප නිසා වැයවුණු අධික මුදලට තිසියම් සම්මාදමක් වීමට සැරසෙද්දී ඊලියන් නානායක්කාර මහතා එය ද එක හෙළා ප්‍රතික්ෂේප කළේය.

1960 මාර්තු මැතිවරණයේදී දෙවිනුවර අසුනට තරග කර සාර්ථකත්වයට පත්විය නොහැකි වුවත් 1970 මහ මැතිවරණයේදී කඹුරුපිටිය ආසනයට ශ්‍රී කොමියුනිස්ට් පක්ෂයෙන් තරග කොට ඉතා විශාල වැඩි ඡන්ද සංඛ්‍යාවකින්

ආසනය ජයගත් ඊලියන් නානායක්කාර මහතා මෙතෙක් ශ්‍රී ලංකාවේ දක්නට ලැබුණු දක්ෂතම, බුද්ධිමත් හා උගත් දේශපාලඥයන්ගෙන් සමන්විත වූ 1970 දශකයේ මහජන නියෝජිත සභාවල මන්ත්‍රීවරයකු වන්නට වාසනාවන්ත විය.

1977 දී ලද දරුණු පරාජයෙන් පසුව නැවතත් කොමියුනිස්ට් පක්ෂත්, වාමාංශයත් ගොඩ නැගීමට උරදුන් නානායක්කාර මහතා පළාත් සභා ආරම්භක මැතිවරණයට පෙනී සිට දකුණු පළාත් සභාවට තේරී පත්විය. ප්‍රතිපත්ති ගරුක, අවංක දේශපාලනඥයන් අතහැර දමමින් ඉන්පසු මැතිවරණ වලදී ජනතාව බොරු ශොභනකාරයන් වෙතට හැරෙද්දී 1993 න් පසුව ක්‍රියාකාරී දේශපාලනයෙන් වෙන්වී ගියත් ඊලියන් නානායක්කාර මහතා කොමියුනිස්ට් පක්ෂයේ දිගටම රැඳී සිටියේය.

කඹුරුපිටිය පාර්ලිමේන්තු මන්ත්‍රීවරයා වශයෙන් සිටියදී විශේෂයෙන් තම ආසනයටත්, පොදුවේ දකුණු පළාතට රටටත් ප්‍රයෝජනවත් සේවා වලට අත හිත දුන් ඊලියන් නානායක්කාර මහතා කඹුරුපිටිය විවිධ සේවා සමුපකාර සමිතිය රටේ ප්‍රමුඛ පෙළේ සමිතියක් බවට දියුණු කිරීමට කටයුතු කළේය. විශ්ව විද්‍යාලයෙන් පිටවී රැකියා විරහිතව සිටි උපාධිධාරීන්ට රැකියා ලබාදීමේ ලා ඔහු විශිෂ්ට සේවාවක් ඉටු කළේය. එදා රැකියාවක් නොමැතිව සිටි  පසුව උසස් අධ්‍යාපන අමාත්‍යවරයා බවට පත්වූ  එස්. බී. දිසානායක මහතාට පවා කඹුරුපිටිය විවිධ සේවා සමුපකාර සමිතියේ රැකියාවක් ලබාදීමට ඊලියන් නානායක්කාර මහතා

ක්‍රියා කළේය. 1980 දශකයේ ජ.වී. පෙ. සාමාජිකයකු ලෙස කටයුතු කළ හිටපු  වෘත්තීය පුහුණු කටයුතු අමාත්‍ය ඩලස් අලහප්පෙරුම මහතාටද, නොයෙක් අවස්ථා වලදී ඊලියන් නානායක්කාර මහතාගේ සහාය ලැබුණි. ජනතා විමුක්ති පෙරමුණු නායක රෝහණ විජේවීර මහතා රුසියාවට යවා අධ්‍යාපන කටයුතු කිරීමට මුල් වූයේද ඔහුය. සටන්කාමීන් ලෙස පෙනී සිටි වාමාංශික දේශපාලඥයන්ගෙන් පන්නරය ලැබූ මහින්ද විජේසේකර හා එස්. බී. දිසානායක වැන්නන්  එදා සිටි දේශපාලනයේ නොසිටියත් ඔවුන්ට මෙන්ම මංගල සමරවීර, ඩලස් අලහප්පෙරුම, ඊ. ඒ. සමරසිංහ, ඩැනී හීත්තැටියගේ වැනි දේශපාලනඥයන්ට ද කිසියම් හෝ මග පෙන්වීමක් ඊලියන් නානායක්කාර මහතාගෙන් ලැබුණු බව නොරහසකි.

1993 දී පළාත් සභාවට තරග කිරීමද නතර කළ ඔහු දේශපාලනයෙන් සම්පුර්ණයෙන්ම ඈත්වී පසුව රුහුණු විශ්ව විද්‍යාලයීය පාලක සභාවේ සාමාජිකයකු ලෙසත්, ගුවන් තොටුපොළ හා ගුවන් සේවා අධිකාරියේ අධ්‍යක්ෂවරයකු ලෙසත් සේවය කළේය.

ඔහුට නිවන්සුව පතමු

හිටපු පුවත්පත් කොමසාරිස්

එස්. දම්මුල්ල තැබූ සටහනක් ඇසුරෙන්