ලෝක සිනමාවේ සලකුණක් වූ බ්‍රිජිට්.. බිජිට් බාදෝ

Dec 30, 2025 at 06:06 PM

|

Lanka Leader

ලතා වල්පොල මහත්මිය ගැන අද අපි හැමෝම කතාකරනවා.

ලතා කියන්නෙ ලංකාවේ සංගීත ක්ශේස්ත්‍රයේ අයිකොන් එකක්. ඒ වගේම තමයි බ්‍රිජිට් බාදෝ කියන්නෙ ලෝක සිනමාවේ අයිකොන් එකක්.

  1980 දශකයේ තරුණයා පත්තරය බොහොම ජනප්‍රියයි. මේ පත්තරයේ මැද පිටු දෙක වෙන්වෙලා තියෙන්නෙ බොහොම ලස්සන බටහිර තරුණියන්ගෙ පෝස්ටර් වෙනුවෙන්. 

ඒ කාලෙ ගොඩාක් තරුණයො මේ මැද පිටු දෙකේ තියන පිංතූර නිදන කාමරේ බිත්තියේ අලවනවා.

මේ ආකාරයට නිතර නිතර පලකෙරෙන රූප අතර මතකයේ රැඳෙන මූනක් තිබුනා බ්‍රිජිට් කියන නමින්.

එක දවසක් තරුණයා පත්තරේ ලිපියක් පලවෙලා තිබුනා "බටහිර තිරයේ කාමදේනුව" කියන නමින්.

ඒ සඳහා පාවිච්චි කරලා තිබුනේ වෙරළක අශ්වයෙක් සමග පිංතූරයකට පෙනී ඉන්න බ්‍රිජිට් බාදෝ.

ඒ ලිපියට අනුව ප්‍රංශ ජාතික තරුණියක් වූ බ්‍රිජිට් හොලිවුඩයේ නිලියන්ට අභියෝග කරනවා විතරක් නෙවෙයි ඔවුන්ව අභිබවා යනවා. ලෝකයේ ඕනෑම කඩවසම් නළුවෙක්.. ධනවතෙක් වශී කරගන්න බ්‍රිජිට්ට පුළුවන් බවත් ඒ ඕනෑම අයෙක් සමග යහන්ගත වෙන්න බ්‍රිජිට්ට හැකි බවත් ඒ ලිපියේ සඳහන් වුනා වගේ මතකයි.

සෙන්ට් ත්‍රොපේ වෙරළ තීරයේ ගත් ඒ පිංතූරය බොහොම ලස්සනයි.  සෙන්ට් ත්‍රොපේ වෙරළ තීරය බලන්න දවසක යන්න ඕනෙ එදා හිතුනා.

මේ කියන කාලයේ මම තරුණයා පත්තරේ කියවන්නෙ අපේ අසල්වැසියන්ගේ ගෙදරදි.  

ඇත්තටම මේ කියන තරම් බ්‍රිජිට් කාමදේනුවක්ද?

බ්‍රිජිට් උපදින්නෙ පැරීසියේ ධනවත් පවුලක. ඒ 1934 අවුරුද්ද. බොහොම තද නීති රීති පනවන තාත්තා යටතේ බ්‍රිජිට් ගෙවන්නෙ අසීරු ළමා කාලයක්. ඒත් එක්කම පැරීසිය නාසීන්ගේ පාලනයට යටත්වෙනකොට බ්‍රිජිට් කුඩා දැරියක්. බැලේ රංගනයත් ගායනයත් ඉගෙනගන්න බ්‍රිජිට් බොහොම බැගෑපත් වෙනවා දෙමාපියන් ඉදිරියේ. අන්තිමේදී බැලේ හා සංගීත ගුරුවරියන් තමන්ගෙ  නිවසටම ගෙන්වලා පාඩම් ලබාදෙන්න එයාගෙ සීයා ඉදිරිපත්වෙනවා.

යුද්ධයෙන් පස්සෙ පැරීසිය බොහොම වෙනස්. යුද්ධයෙන් පීඩාවට පත්වූ පැරිස් වාසීන් නිදහස උපරිමයෙන් භුක්ති විඳින අතර සිනමාව.. වේදිකාව.. සංගීතය බොහොම ඉහල තලයකට ගමන් කරනවා.

1950 අවුරුද්දේ Elle  කියන ප්‍රංශ සඟරාවේ මුල් පිටුව සරසන්න බ්‍රිජිට්ට අවස්ථාව ලැබෙන්නෙ අහම්බෙන්. ඒ වෙනකොට ඇයට වයස අවුරුදු 15 අවසන් වුනා විතරයි.

එක දවසකින් පැරීසියේ විතරක් නෙවෙයි මුළු ප්‍රංශයේම අවධානය දිනාගන්න තරුණ බ්‍රිජිට්ට හැකිවෙද්දි සිනමාවෙන් හා වේදිකාවෙන් ආරාධනාවන් ගලාගෙන එනවා.

දෙමව්පියන් බොහොම තදින් විරුද්ධ වුනත් තමන්ගෙ සීයාගෙ බලවත් මැදිහත්වීම මත මේ කුඩා තරුණියට හැකිවෙනවා නිලියක් බවට පත්වෙන්න.

1950 දශකය කියන්නෙ ලෝක සිනමාවේ වගේම කලාවේ ස්වර්ණමය දශකය විදිහට හැඳින්වෙන කාල වකවානුවක්. යුද්ධයෙන් පස්සෙ බිහිවෙන නිර්මාණ බලන්න ලස්සනයි. ඒ වගේම තඟකාරීයි.

කවුද මේ කාලෙ ඉන්න බලවත් නිලියන්.?

ඔද්‍රෙ හෙප්බර්න්.. මැරිලින් මොන්‍රෝ..  ග්‍රේස් කෙලී .. එලිසබෙත් ටේලර්..  සොෆියා ලොරේන්..  ඩොරිස් ඩේ.  මේ නම් අහපු ගමන් අපිට හිතෙනවා මේ කාලය කොයිතරම්  තරඟකාරීයිද කියලා. මේ නම්  ලෝකය පුරාම ප්‍රසිද්ධයි. මේ අය අතරින් ග්‍රේස් කෙලී හා මැරිලින්  හැරෙන්න අනිත් හැමදෙනාව ඉතාම දිගු කාලයක් සිනමාවේ රැඳෙනවා. මැරිලින් අවාසනාවන්න්ත විදිහට අකාලයේ  මිය යද්දි ග්‍රේස් කෙලී මොනාකෝ රජු සමග විවාහවෙලා ගතකරන්නෙ නිහඬ ජීවිතයක්.

මෙන්න මේ වගේ සුපිරි නිළියන් එක්කයි  බ්‍රිජිට්  බාදෝට තරඟ කරන්න වෙන්නෙ.

ගායනයේත්.. නර්තයේත්.. රංගනයේත් එක වගේ දක්ශ කුඩා බ්‍රිජිට් බාදෝ වැඩිම මිළක් අයකරන නිළියන්ගේ ලයිස්තුවේ ඉහලටම ගමන් කරනවා. 

විවිධ හැල හැප්පීම් නැතුවාම නෙවෙයි. නමුත් වසර විස්සක් පමණ කාලයක් තුල හොලිවුඩ් තිරයේ වගේම යුරෝපයේත් .. ලෝකය පුරාමත් බ්‍රිජිට්ව සලකන්නෙ ඉහලම තත්වයේ නිළියක් විදිහට.

1972 වසරට ලඟාවෙද්දි බ්‍රිජිට් බාදෝට වයස  අවුරුදු 39ක්. ඇය ඉහලම ගෙවීම් ලබන ජනප්‍රිය නිලියක්. නමුත් එයා කියනවා ලබන වසරින් පස්සෙ රඟපෑමෙන් වගේම ප්‍රසිද්ධ ජීවිතයෙන් සම්පූර්ණයෙන්ම සමුගන්න බව.

රූපවාහිනී සාකච්ඡාවකදී ඇය කියනවා මෙන්න මේ වගේ කතාවක්.

" සිනමාවට එනකොට මට අවුරුදු පහලව අවසන් වුනා විතරයි.  හැමදේම අළුත්. මම සිනමා ලෝකෙ ගැන.. ජනප්‍රියත්වය ගැන කිසිම දෙයක් දන්නෙ නෑ. හරියට හා බෙනේ ඇතුලට වැටුණු ඇලිස් වගේ.

මම මේ මගේ ජීවිතේ ගැන හෝ සිනමාව ගැන කං කෙඳිරිගානවා නෙවෙයි. 

සතියකින් දෙකකින් මම යන යන තැන පැපරාසීන්.. ධනවත් බලවත් පිරිමින්.. දේශපාලකයන්.. රජවරු.. කුමාරයො හැමතැනම. ඇත්ත..  මම ඇතිවෙන්න විනෝද වුනා. රඟපෑම.. ගායනය.. වේදිකාව.. ලෝක සංචාර.. අතට පයට මෙහෙකාරයො.. මේ හැමදේම දවසේ කොටස් බවට පත්වුනා.   ඉඳහිට පුවත් පත් කියවන මම පුදුම වෙනවා.

යුරෝපයේ සෙක්ස් සිම්බල් එක..  සුරූපී කාමධේනුව.. තරුණයන් වසඟකරන හෙරෝයින්..  සෙක්ස් සහ බ්‍රිජිට්. .. මොකක් ? මේ මම ගැනද කියන්නෙ. 

අවුරුදු පහලවක් විස්සක් ගතවුනා තමයි නොදැනීම. එතකොට මම කවුද?

පත්තර කාරයො කියන විදිහට සෙක්ස් සිම්බල් එකක්ද.?  මට ඒ මිනිස්සු එක්ක තරහක් නෑ.

මම රඟපෑවාට.. පිංතූරවලට පෙනී හිටියාට මම සෙක්ස් සිම්බල් එකක් නෙවෙයි. නිළි රැජිණකුත් නෙවෙයි. මේ වගේ පට්ටම් දෙන්නෙ ඔබ වගේ පත්තර මහත්තුරු. මේ ඔක්කොම ඇති. හොඳටම ඇති.

මට දැන් හිතෙනවා මේ ඔක්කොම මගේ පිට බලෙන් පැටවුවා වගේ.

දැන් මම මගේ ජීවිතේ හොයාගෙන යන්න ඕනෙ. මට ඕනෙ නිදහස. මගෙ බල්ලො තුන්දෙනයි.. පූසො හය හත්දෙනයි එක්ක මට ඕනෙ නිදහස් ජීවිතයක්.

සෙන්ට් ත්‍රොපේ වෙරල තීරයේ තියෙන මගේ ගෙදර හැරෙන්න මට වෙන කිසිදෙයක් ඕනෙ නෑ.

මේ තමයි මගේ සමුගැනීම."

නළු නිලියො ඔය වගේ තමයි.. හිටපු ගමන් සමුගන්නවා. වසර කීපයකට පස්සෙ ආපහු එනවා.

ඔහොම ගියාට ඒ අයට ඉන්න බෑ ලෝක  අවධානය නැතුව.. රතු කාපට් එක නැතුව.. ෆ්ලෑශ් ලයිට් නැතුව.

බ්‍රිජිට් බාදෝ කියලා වෙනසක් නෑ. ආපහු එනවා සැකයක් නෑ.

අන්න එතන තමයි අපිට වැරදුනේ.

1973 අවුරුද්දෙන් පස්සෙ  බ්‍රිජිට් කිසිම දවසක ආපහු සිනමාවට එන්නෙ නෑ.

සිනමාවට තියා කිසිම ප්‍රසිද්ධ  උත්සවයකට එයා සහභාගිවෙන්නෙ නෑ. 

කලාතුරකින් පුවත්පත් හෝ රූපවාහිනී සකාච්ඡාවකට එක්වුනත් ඒ එයා පෙනී සිටින සත්ව අයිතිවාසිකම් වෙනුවෙන් පමණයි. 

කොරිදා ද තොරොස් සටන් නවත්වන්න බ්‍රිජිට් විශාල මෙහෙයක් කරනවා.

අත් හැර දැමූ සුනඛයන් හා පූසන් වෙනුවෙන් ආරක්ශිත නිවාස හදන්නත් ඒ වෙනුවෙන් අරමුදලක් පිහිටුවන්නත් පියවර ගන්න බ්‍රිජිට් ජීවිතේ වැඩි කොටසක් ගෙවන්නෙ සතුන්ගේ සුවපහසුව හා  අයිතිවාසිකම් වෙනුවෙන්.

කොයිතරම් ආරාධනා ආවත් බ්‍රිජිට් නෙවෙයි තමන්ගේ තීරණේ වෙනස් කරන්නෙ.

" ආපහු සිනමාවට එන්න.. අපොයි ඔබට කිසිම අදහසක් නෑ මම ගෙවන නිදහස් ජීවිතේ ගැන.

බැල්කනියට වෙලා මධ්‍යදරණී මුහුදේ ඉර ගිලෙන හැටි බලන් ඉන්න.. මගෙ සුරත්ල් බල්ලන් එක්ක වෙරළෙ ඇවිදින්න යන්න.. ගහක ගෙඩියක් කඩාගෙන කන්න ලැබෙන නිදහස ගැන ඔබ දන්නෙ නෑ.

ඒකයි මේ ප්‍රශ්ණ සේරටම මුල. ෆ්ලෑශ් ලයිට් නැති.. මේකප් නැති.. කොණඩ විලාසිතා නැති.. පැපරාසීන් නැති.. එලාම් එකට අවදිවෙන්න නැති ජීවිතේ ගැන ඔබ දන්නෙ නෑ. "

ඇයට චෝදනා නැතුවාම නෙවෙයි. විශේෂයෙන්ම අණවසර සංක්‍රමණවලට.. අරාබි සංස්කෘතික ආක්‍රමනයර බ්‍රිජිට් තදින්ම විරුද්ධයි. ඇයගෙ අදහස් බොහෝවිට දක්ශිණාංශික බව විචාරකයන් කියනවා.

" පැරීසිය කියන්නෙ විලාසිතා අග නගරය. තරුණ කෙල්ලකට බැරිනම් කොට කලිසමක් ඇඳන් පාරෙ යන්න... මොකද්ද මේ නිදහස.. මොකද්ද මේ විලාසිතා ලෝකය.

තරුණියකගේ පාද දැකලා ඔබගේ හිරි ඔතප් බිඳෙනවා නම් ඔබ කරුණාකරලා ඔබේ ගෙදරටවෙලා ඉන්න. එක්කො ඔබගෙ රටට ආපහු යන්න. නමුත් පැරිස් සංස්කෘතියට ඒ විදිහට තියෙන්නෙ දෙන්න"

1973 අවුරුද්දෙ කියපු විදිහට බ්‍රිජිට් කවදාවත් ආපහු ප්‍රසිද්ධ ජීවිතයට එන්නෙ නෑ.

අද .. ඒ කියන්නෙ 2025 දෙසැම්බර් 28 වෙනිදා බ්‍රිජිට් ජීවිතයෙන් සමුගන්නෙ වයස අවුරුදු 91 දී.

ලෝකය පුරාම එක වගේ ජනප්‍රිය වුනු බ්‍රිජිට් .. සෑම රටකම වගේ තරුණයන්ගෙ සිහින කුමාරිකාව වුනා.

නිදන කාමර බිත්ති.. ලොකර් රූම් දොරවල් බ්‍රිජිට්ගෙ පිංතූරවලින් හැඩවුනා. එයාව අපි හැමෝම දැක්කෙ දක්ශ නිලියක් හෝ සෙක්ස් සිම්බල් එකක් වගේ. 

නිදහස ගැන.. නිදහස්  ජීවිතය ගැන බ්‍රිජිට් කියපු කතාව අපිට හිතන්න ගොඩාක් දේ ඉතිරි කරනවා.

"කාම ධේනුව".. බලෙන් පටවපු මේ තණතුරු පට්ටම් ඇත්තට වලංගුද.?

කුඩා කාලෙ හිතුවා වගේම සෙන්ට් ත්‍රොපේ වෙරළ තීරයට නම් කීප සැරයක්ම ගියා. ඒර්ග් බ්‍රිජිට්ව නම් හමුවුනේ නෑ. 

සුභ ගමන් බ්‍රිජිට්.

(මුහුණු පොතෙන් උපුටා ගන්නා ලදී)