ගංවතුර ආපදාව හැසිරවීමට අපොහොසත් වීමෙන් ගෙදර ගිය වැලෙන්සියා නායකයා..

Dec 7, 2025 at 05:18 PM

|

Lanka Leader

ස්පාඤ්ඤයේ වැලෙන්සියා කලාපයේ ජනාධිපති කාර්ලෝස් මාසෝන් පසුගිය වසරේ දී ක්ෂණිකව ඇතිවූ දරුණු ගංවතුර ආපදාව හැසිරවීමට අපොහොසත් වූ බවට පිළිගනිමින් සිය ධුරයෙන් පසුගියදා ඉල්ලා අස්වී තිබේ.

ඒ සම්බන්ධයෙන් මාස ගණනාවක් තිස්සේ පැවති මහජන පීඩනය, විරෝධතා හේතුවෙන් ඔහු මෙලෙස ඉල්ලා අස්වී ඇති බවයි බීබීසීය ඇතුළු විදෙස් වාර්තා පවසන්නේ.

වැලෙන්සියා යනු ස්පාඤ්ඤයේ ස්වයං-පාලන කලාපයක්. වැලෙන්සියා යන නමින් එහි පළාතක්, නගරයක් සහ එහි ජනතාව ද හඳුන්වනු ලබයි. 1982 දී ස්පාඤ්ඤ රජය විසින් වැලෙන්සියා ජාතීන්ට ස්වයං පාලනයක් ලබාදුන්නේය. ඒ අනුව තමන්ටම වෙනම වූ ආණ්ඩුවක් පිහිටුවා ගනිමින්, තමන්ටම වෙනම ජනාධිපතිවරයෙක් පත්කරගෙන වෙනම රාජ්‍යයක් පවත්වාගෙන යාම සඳහා ස්වාධීන රාජ්‍යයක අයිතිය වැලෙන්සියා ජාතීන්ට හිමිව තිබිණි. ඒ ජූලි 1, 1982 වැලෙන්සියානු ප්‍රජාවේ ස්වාධීනත්වය පිළිබඳ ප්‍රඥප්තිය මගින්. කෙසේවෙතත් එහි ස්වයං පාලන ක්‍රමය අර්ධ වශයෙන් ආරම්භ කර තිබුණේ 1977 දී ස්පාඤ්ඤය ප්‍රජාතන්ත්‍රවාදය වෙත සංක්‍රමණය වන අතරතුරයි. 1982 සිට වැලෙන්සියා වෙනම රාජ්‍යයක් ලෙස සියලු නීතිමය තත්ත්වයන් තුළ කටයුතු කරමින් සිටී.

2024 ඔක්තෝබර් 29 වන දින වැලෙන්සියා කලාපයේ පුද්ගලයන් 229 දෙනෙකු ගංවතුරෙන් මියගොස් තිබිණි.

අසල්වැසි ප්‍රදේශවල තවත් අටදෙනෙකු මියගිය අතර, මෙය දශක ගණනාවකට පසු ස්පාඤ්ඤයේ සිදු වූ දරුණුතම ස්වභාවික විපත ලෙසයි සැළකෙන්නේ.

කෙසේ වෙතත්, ගංවතුර විනාශය සිදුවෙමින් තිබියදීත්, කලාපීය ජනාධිපතිවරයා මාධ්‍යවේදිනී මැරිබෙල් විලාප්ලානා සමඟ පැය හතරකට ආසන්න කාලයක් ආපන ශාලාවක ගත කර ඇති බව අනාවරණය වී තිබිණි.

ඔහු දවසේ වැඩි කාලයක් හදිසි රැස්වීම්වලට සහභාගී නොවී සිටි බවයි චෝදනා එල්ල වුණේ.

මාසෝන්ගේ රජය හදිසි අනතුරු ඇඟවීමක් හෝ උපදෙස් වැලෙන්සියා වැසියන්ගේ දුරකථන වෙත නිකුත් කිරීමට අපොහොසත් වූ අතර, එය නිකුත් කෙරුණේ රාත්‍රී 20:00 න් පසුවයි.

ඒ වන විටත් මිනිසුන් දුසිම් ගණනක් මිය ගොස් සිටියේය.

මාරාන්තික ගංවතුර කළමනාකරණය සම්බන්ධයෙන් කොන්සර්වේටිව් ජනතා පක්ෂයේ (PP) මාසෝන් ඉල්ලා අස්විය යුතු බවට වැලෙන්සියාවේ බහුතර ජනතා මත විමසුම්වලදී ඉල්ලා තිබිණි.

ඔහුගේ ඉල්ලා අස්වීම ඉල්ලා අඛණ්ඩ විරෝධතා පැවැත්වූ අතර, මෑතකදී ඔක්තෝබර් 25 වන දින පමණ 50,000 ක් පමණ ජනතාව වැලෙන්සියා වීදිවලට රැස්වුණා. ඉන්පසුව පසුගිය නොවැම්බර් 03 වැනිදා මොහු සිය ධුරයෙන් ඉල්ලා අස්විය.