මානව විද්‍යා පර්යේෂණයක් කළ යුතු මාලිමාවේ මන්ත්‍රීලාගේ අධි මාන්නය..

Dec 6, 2025 at 10:11 AM

|

Lanka Leader

ආපදා අවස්ථාවේදී ආපදාවට පත් ජනතාවගේ සෝසුම් මැදින්   තමන්ව පුම්බවා ගැනීමට සහ තමන්ගේ ජනප්‍රියත්වය ඉහළ දමාගැනීම සඳහා වෙර දරන  මාලිමාවේ මන්ත්‍රීලා ගැන එරන්ද ගිනිගේ සිය මුහුණුපොතේ සටහනක් තබා තිබේ.

එම සටහන පහළින් දක්වා ඇති අතර, ඒහා සම්බන්ධ වීඩියෝවක් ද මෙහිදී අප විසින් පළකරනු ලබන්නේ ඔවුන්ගේ අධි මාන්නය සහ විපතකදී ක්‍රියාකළ යුතු ආකාරය මෙලෙසදැයි අප පාඨකයන්ගේ අවධානයට යොමු කිරීම පිණිසය.

එරන්ද ගිනිගේ ගේ සටහන සහ එම වීඩියෝව පහළින්..

මොනවා වුණත් මාලිමා මන්ත්‍රීවරුන්ගේ අහංකාරය ඔවුන්ට එක්තරා විදිහක ශක්තියක්. මේක ඇත්තට ම මානව විද්‍යා පර්යේෂණයකට සුදුසු නිරීක්ෂණයක්. මෙවැනි බිහිසුණු ආපදාවක් වුණාම සාමාන්‍ය මනුෂ්‍යයෙක් නම් පළමුව තැති ගන්නවා. දෙවනුව ශෝකයට පත් වෙනවා. තෙවනුව නිහතමානීව විසඳුම් සොයනවා. නමුත් මාලිමාවේ මන්ත්‍රීවරු එයට ඉඳුරා වෙනස්. ඔවුන් කිසිම අවස්ථාවක තැති ගත් බවක් පෙන්නුවේ නැහැ. අංශු මාත්‍රයක කනගාටුවක්, සහකම්පනයක් ශෝකයක් පෙන්නුවේ නැහැ. හිටියටත් වඩා අධි මාන්නයෙන් තමයි ඔවුන් ප්‍රතිචාර දක්වන්නේ. මේක හරි අසාමාන්‍ය තත්ත්වයක්.

මේක අපට පැහැදිලි කරන්න පුළුවන් එක විදිහක් තමයි Dunning Kruger ආචරණය. එනම් කිසියම් ක්ෂේත්‍රයක දැනුම හෝ නිපුණතාවය අවම පුද්ගලයන් බොහෝ විට තමන් ගැන අධිතක්සේරුවෙන් හිතනවා. උදාහරණයක් හැටියට කාලයක් ප්‍රසිද්ධව සිටි රැට්ටා ගන්න. ඔහු රාජ්‍ය පාලනය තියා පවුලක්වත් රැකලා අත්දැකීමක් නැති මෝඩ හිස් කවටයෙක්. නමුත් ඊනියා අරගලයේ ඔහු හැසිරුණේ හරියට රටේ ජනාධිපතිකම කරන්න පුළුවන් වගේ. ඔහු එය ඇත්තටම විශ්වාස කළා.

අනෙක් පැත්තෙන්, කිසියම් ක්ෂේත්‍රයක ප්‍රවීනයන් හැම වෙලාවෙම තමන් ගැන අවතක්සේරුවෙන් තමයි හිතන්නේ. බුද්ධිය වැඩි වෙන්න වෙන්න එම පුද්ගලයා සිය තීරණ ගැන සිය වාරයක් හිතනවා. කයිවාරු ගහන්න බයයි. නමුත් මාලිමාවේ මන්ත්‍රීවරු එහෙම නැහැ. ඔවුන් හැසිරෙන්නේ හරියට මේ ආපදාව තමන් ඉතා ම හොඳින් පාලනය කරනවා වගේ. ඒකම තමයි ඔවුන්ගේ ශක්තියත්.

නමුත් මට හිතෙනවා මේක DK ආචරණයට එහා ගිය මනෝ විකාර තත්ත්වයක් කියා. මාලිමාවේ ඉන්නේ තරමක් sociopathic පිරිසක්. ඒකට කියන්නේ Antisocial Personality Disorder. ඔවුන් සමාජ විරෝධීන්. ඔබ බලන්න මාලිමාවුන් කිසිම හිරිකිතයක් නැතුව මේ ව්‍යසනය තුළ ඔවුන්ව ප්‍රවර්ධනය කර ගන්නවා නේද? ඒ කියන්නේ පොදු සමාජයේ වේදනාව ගැන ඔවුන්ට සත පහක වගක් නැහැ. ඔවුන් හිතන්නේ ඔවුන්ගේ ආත්මාර්ථය ගැන පමණයි. අපට පේනවා වෙනත් අය කෑම ආධාර අරගෙන ගියාම මාලිමාවුන් ඒවා බලහත්කාරයෙන් ඩැහැ ගෙන තමන්ගේ වගේ බෙදනවා. ඔවුන්ට ඒක වරදක් ලෙස පෙනෙන්නේ නැහැ. ඔවුන්ට ඒ ගැන කිසිම ලැජ්ජාවකුත් නැහැ. ඔවුන් හරිම impulsive. කටට එන දේ කියනවා. ඇඟට කඩා පනිනවා. අන් මත ඉවසන්නේ නැහැ. එහෙම කරලා ඒ ගැන කිසිම පසුතැවීමකුත් නැහැ. මේවා තමයි sociopathic ලක්ෂණ.

මේකට හේතුව ඔවුන් බොහෝ දෙනා කුඩා කල සිට ලද කටුක අත්දැකීම් විය හැකියි. නැත්නම් ඒ ප්‍රවර්ගයේ මිනිස්සු එකතු වෙන්නේ මාලිමාවට. මොකද එතන ඔවුන්ට ඔවුන්ගේ මනෝ ව්‍යාධිය උපරිමයෙන් බලගන්වන්න පුළුවන්. උදාහරණයක් හැටියට ඔවුන්ගේ කුණුහරුප බලකාය වගේ එකක් වෙන කිසිම පක්ෂයකට හදන්න බැහැ. මොකද එවැනි සමාජ විරෝධී චර්යාවකට අනුබලය සහ අනුග්‍රහය ලැබෙන්නේ මාලිමාවෙන් පමණක් නිසා.

කොහොම වුණත් මාලිමාවේ ශක්තියත් මේකමයි. ඔවුන් හැසිරෙන්නේ කිසිම ව්‍යසනයක් සිදු වුණේ නැති ගාණට. තවමත් හරියට ගණන් කරන්න බැරි තරම් දරුවන් සහ වැඩිහිටියන් ගණනාවක් පස් යට වැළලිලා. නමුත් මාලිමාවුන් හිනා වෙනවා. Photoshoot කරනවා. පාරම් බානවා. අභියෝග කරනවා. අනුර කුමාර පාර්ලිමේන්තුවට ඇවිල්ලා කිසිම වෙනසක් නැතුව වෙනදා වගේ ම ලොකු ටෝක් දෙනවා. ජනමනස manipulate කරනවා. මේක ඉතාම අසාමාන්‍ය අමුනුෂ්‍ය චර්යාවක්. නමුත් ඒ නිසාම ඔවුන් පවතිනවා. බොහෝ විට ඔවුන් මේ ව්‍යසනය ඔවුන්ගේ මෙම අසාමාන්‍ය චර්යාව තුළින් ම වසා දමාවි. මට හිතෙනවා සති දෙකක් යනකොට මෙහෙම ව්‍යසනයක් වුණාද කියවලත් කවුරුවත් කථා කරන එකක්වත් නැහැ කියලා. ඒකත් ප්‍රශ්න විසඳන එක ක්‍රමයක්. ධර්මය අපට මග වේවා!

- එරන්ද ගිනිගේ