රාජ්‍ය නොවන සංවිධානවල අය 'ශ්‍රී ලංකාව' කියන රට හඳුන්වන විදිහ..

Oct 17, 2025 at 04:34 PM

|

Lanka Leader

සිංහලයින් මෙයට එරෙහිව සටන් කළ යුතුය.. නමුත්, සටන් කිරීම තියා හිතන්න වත් බැහැ.  හේතුව බහුතර ෆේස්බුක් සිංහලයන්ට සටන් කිරීම කියල තේරෙන්නේ කඩු පොලු අරන් කරන සටනක් විතරක් වීම.  එයින් එහාට ගිය සියුම් සටන්, විශේෂයෙන් මතවාද ,  දේශපාලනය ආදිය මුලික වුනු සටන් මිනිස්සුන්ට තේරෙන්නේ නැහැ. එහෙම තේරෙන අයව ඒගොල්ලන්ගේ කැම්පේන් වලට මිලදීගෙන ඉවරයි. දැනටමත් ඔය ඉන්දියානු අධිරාජ්‍යවාදී සටන සැහෙන්න ඉස්සරහට ගිහින් ඉවරයි.  විශේෂයෙන් දෙමල භාෂාව හරහා.  බොහොමයක් වෙබ්සයිට්,  යූටියුබ් වීඩියෝ ආදියේ දෙමළ භාෂා මුලයන් හැටියට ලංකාවත් දක්වනවා. බොහොමයක් විදේශිකයන් හිතන්නේ සිංහල කියන්නේ ඉන්දියාවේ උතුරේ ඉඳන් ලංකාවට පදිංචියට ආපු ආක්‍රමණික කොටසක්ය,  සිංහල කියන්නේ ඉන්දියානු භාෂාවක්ය කියලා.  එතන ඉඳන් කෙනෙකුට  අතීතයේ ලංකාව ඉන්දියාවේ කොටසක් බව ඒත්තු ගන්වන්න බොහොම ලේසියි.

මේ ළඟදි විදේශිකයෙක් මමත් එක්ක කතා කර කර ඉන්නකොට එයාගේ ෆෝන් එක අරගෙන මගේ භාෂාව මේක නේද කියලා අහලා දෙමළ අකුරු වගයක් පෙන්නුවා. මම එයාට පැහැදිලි කරා ඒක මගේ භාෂාව නෙවෙයි, ඒක ලංකාවේ ප්‍රධාන භාෂාව නෙවෙයි, ලංකාවේ බහුතරයක් පාවිච්චි කරන භාෂාව සිංහල කියලා. නමුත් ඔහු මට කිව්වේ වෙනස්ම කතාවක්. ඔහු කියනවා ඔහු වැඩකරන තැන විවිධ ප්‍රොජෙක්ට්ස්වලට එන රාජ්‍ය නොවන සංවිධානවල අය 'ශ්‍රී ලංකාව' කියන රට ගැන හඳුන්වන්නේ එය ඉන්දියාවේ කොටසක් ය, දෙමළ රටක් ය කියලයි. සිංහල කියලා ජාතියක් ගැන ඒ විදේශිකයා දැනගෙන හිටියේ නැහැ. මම ඔහුට කියලා දුන්නා අපි කවුද කියන එක ගැන.

අපිට දෙමළ මිනිස්සු එක කිසිම තරහක් නෑ. මේවා මේ අපේ අල්ලපු ගෙවල් වල ඉන්න අහිංසක දෙමළ මිනිස්සු කරන දේවලුත් නෙවෙයි. මේවායේ මහමොළකරුවෝ මේ පක්ෂෙකට දෙකකට කඩේ යන උනුත් නෙවෙයි. මේවා අවුරුදු ගානක් ඉස්සරහට හිතලා, plan කරලා බොහොම සූක්ෂමව රටවල් යටත් කරගන්න සියලු ඉතෝ සූදානම් කරන නූතන චානක්‍යයලාගේ වැඩ. රාජ්‍ය නොවන සංවිධාන විතරක් නෙමෙයි දේශපාලනඥයන්ගේ ඉඳලා පොඩි දරුවා බලන කාටූන් එක කන බිස්කට් පැකට් එක දක්වා මේ කුමන්ත්‍රණය පැතිරිලා තියෙනව. නිකමට බලන්න ලංකාවේ සිංහල බෞද්ධ ගෑනු කීදෙනෙක් තමන්ගේ විවාහ චාරිත්‍ර හින්දු විදිහට කරනවද කියලා. ආසාවට සල්වාර් එකක් ඇඳලා මොට්ටුව තියෙන එක වෙනයි. නමුත් සම්මාන උළෙලක් බලන්න ලංකාවෙ ගෑනු කීදෙනෙක් පොළොවට අත තියලා පපුව අල්ලලා ස්ටේජ් එකට නගිනවද කියලා. සමහරු එහෙම කරන එකේ තේරුමවත් දන්නේ නැහැ ස්ටයිල් එකට කරාට. අපේ සංස්කෘතිය, අපේ චාරිත්‍ර වාරිත්‍ර, අපේ ඇඳුමේ පැළඳුමේ ඉඳලා මේගොල්ලෝ ආක්‍රමණය කරලා ඉවරයි.

වරදවා වටහාගන්න එපා...

ඉන්දියාව කියන්නේ හතුරෙක් නෙමෙයි. ඉන්දියාව කියන්නේ අපේ ළඟම එන්න අසල්වැසියා. නමුත් අසල්වැසියා බලසම්පන්න වෙනකොට අපි ඊට මුහුණ දෙන්න පුළුවන් විදිහට ශක්තිමත්ව ඉන්න ඕනේ. මීට මාස හතකට කලින් ජර්මනියේ පැවැත්වුනේ සමුළුවකදි ඉන්දියාව විදේශ සමුළුවකදි ඉන්දියාව විදේශ කටයුතු අමාත්‍යවරයා කියනවා "ශ්‍රී ලංකාවට අමාරු වෙලාවේ අපි අයි එම්එෆ් එක දුන්නටත් වඩා විශාල ණයක් ශ්‍රී ලංකාවට දීලා ඒගොල්ලන්ව ඒ අමාරුවෙන් ගොඩ ගත්තා" කියලා. එතනින් එහාට ඔහු කියනවා හොඳ අසල්වැසියෝ විදිහට අපි ඔවුන්ට කරපු උදව්ව මතක තියාගෙන අසල්වැසියොත් අපි කියන යම් යම් දේවල් වලට එකඟ වෙන්න ඕන කියල. ඒ කියන්නේ ඔවුන් උදව්වක් නෙමෙයි අපිට කරලා තියෙන්නේ. පසුව ඔවුන්ගේ කොන්දේසි වලට එකඟ කරගන්න ඉව අල්ලගෙන තමයි ඔවුන් අපිත් එක්ක සියලු ගනුදෙනු කරලා තියෙන්නේ. මතකනේ රටට හොරෙන් අනුර ගහපු ගිවිසුම් හත. ඒවායේ තියෙන, රටක් විදිහට අපිට අහිතකර දේවල් කරගෙන යනකොට කරන්න එපා කියලා රට ඇතුලෙන් විරෝධතා මතු වුණොත් ඉන්දියාව කියන්න ඉඩ තියෙනවා උඹලට කරන්න දෙයක් නෑ. මොකද උඹලගේ නායකයා අපිට පොරොන්දු වෙලා ඉවරයි කියලා.

මෝදි පාලනය ඉන්දියාවට හොඳ උනාට ඉන්දියාව අවට රටවල්වලට ඉතා භයානකයි. මෝදි පාලනය ඇතුලේ ඉන්නේ විශිෂ්ට මොළ කාරයෝ. ඔවුන් බහුතරයකගෙන් මම දැක්ක පොදු කාරණාව තමයි ආක්‍රමණයට ප්‍රිය වීම. ශ්‍රී ලංකාවේ හතරවෙනි ඊළාම් යුද්ධය දිනන්න දුටුගැමුණු රජතුමාගේ සිතියම් භාවිතා කළා වගේ, මෝදිලා රජ කරන්න යොදා ගන්නේ මහාභාරතය, රාමායනය පාඩම් පොත් කරගෙන. ඒ අතරේ අපේ රටේ ඉතිහාසය පාසල්වලින් මකා දමමින් පවතිනවා. අපේ දරුවන්ගෙන් අනාගතය උදුරා ගනිමින් පවතිනවා. ඒක කරන්න රටේ ඉහළම පුටුවක් වෙන අගමැතිගේ සෘජු මැදිහත්වීම ලැබෙනවා. 

මුල් ගැඹුරට ගියපු ගහක් ගලවන්න අමාරුයි වගේ තමන්ගේ මුල් ගැන හොඳින්ම දන්න සමාජයක් වට්ටන්න හෝ යටත් කරගන්න අමාරුයි. අන්න ඒක නිසා තමයි අපේ දරුවන්ගේ මුල් ගැඹුරට දුවන එකට අගමැතිතුමිය හරහා යම් යම් ජාත්‍යන්තර බලවතුන් සීමා මායිම් බඳින්නේ. ඉන්දියාව යහමින් ඔවුන්ගේ ඔත්තු සේවා ශ්‍රී ලංකාව ඇතුලේ යොදවලා තියෙනවා. ඔවුන්ගේ කීමට අවනත නොවෙන හමුදා නිලධාරීන්ට මාධ්‍ය හරහා මඩ ගහන්න, ඔවුන්ගේ කීමට අවනත නොවන ආණ්ඩු බිමට සමතලා කරන්න ඉන්දියාවට තියෙන බලය අසීමාන්තිකයි.

අපි ඉතින් බයවෙන්න ඕනෙද?

ඇත්තටම ඔව්. ශ්‍රී ලංකාවට සිද්ධ වෙච්ච ආක්‍රමණ 21 න් 17 ක්ම දකුණු ඉන්දීය ආක්‍රමණ. අනුරාධපුර යුගය අවසානයේ ඉඳලා අද මේ මොහොත වෙනකන් ගතවුණ කාලෙට වඩා කාලයක් සශ්‍රීකව අනුරාධපුර යුගය පැවතුණා. අනුරාධපුර යුගය අවසාන කරපු කාලිංග මාඝ උතුරු මැද පළාත ආක්‍රමණය කළායින් පස්සේ එහේ කරපු යුධ අපරාධ ගැන පොත් 100 ක් වුනත් ලියන්න පුළුවන්. ඒ ගිනිබත් කරපු පොත්පත්වල අපේ සිංහල වෛද්‍ය ප්‍රතිකාර ක්‍රම ඉඳලා බුද්ධ කාලයේ ඉඳලා ධර්මස්කන්ධය ග්‍රන්ථාරූඪ කරපු පොත් පතුත් තිබුණා. ඒ ගින්නට වීසි කරපු ඇතැම් ස්වාමීන් වහන්සේලා අතර සිත් දියුණු කරපු අයත් හිටියා කියලා පොත්පත්වල සඳහන් වෙනවා. කාලිංග මාඝගේ සේනාව පුංචි දරුවෙක්වත් අතහැරියේ නැහැ. එතනින් පටන් ගත්තෙ සංස්කෘතික කඩා වැටීම අද දක්වාම අපිට පේන්න තියෙනවා.

මම තාමත් අහන්නේ අපි බයවෙන්න ඕනෙද?

අනිවාර්‍යයෙන්ම... අපි අද ඉන්නේ ලංකා ඉතිහාසයේ දුර්වලම පාලකයා යටතේ. ඔහුට ඔහුගේ පක්ෂයේ මන්ත්‍රීලාවත් පාලනය කරගන්න බෑ. අනුර කුමාර දිසානායක කියන්නේ පඹයෙක්. රාජ්‍ය පාලනයේ දැනුමක් නැති, ඇත්ත කියනවා කියලා කාටවත් විශ්වාස කරන්න බැරි, ඒ නිසාම හීනමානය හිත ඇතුළේ තියෙන, පාලකයෙක් සතු විය යුතු charisma එක නැති, ඇමරිකන් තානාපතිටත් දෙකට නැවෙන නිකන්ම නිකන් පඹයෙක්. ඒක ආණ්ඩුව ඇතුලේ පවා හැමෝම රහසේ කතාබහ කරන දෙයක්. සමාජවාදී ආණ්ඩුවක් යටතේ කිව්වට මේ වෙනකොට රට පාලනය කරන්නේ කෝටිපති ව්‍යාපාරිකයන්. ව්‍යාපාරිකයෝ කියලා කියන්නේ ප්‍රතිපත්තිමය දේශපාලනය කරන අය නෙවෙයි. ඔවුන්ට රට හෝ රටේ අනාගතය වැඩක් නැහැ. දැක්කනේ ලංකාවෙ තේ කොල කඩකාරයෙක් තමන්ගෙ ෆාමසි බිස්නස් එක නග්ග ගන්න ලංකාවේ ළමයින්ට ඊයේ පෙරේදා කරන්න ගිය හරිය. ඒ නිසා ලංකාවෙ බිස්නස් කාරයෝ පාලනය කරන රටක් ගොඩ යයි කියලා හිතන්න එපා. අපි ව්‍යාපාරිකයන්ට වෛර කරන්නේ නැහැ. නමුත් තමන්ගේ ව්‍යාපාරය ගොඩනගන මෝටි එකෙන් රටේ පාලනයට බලපෑම් කරන ව්‍යාපාරිකයෝ එක්ක රටක් කරන්න බැහැ.

ඉන්දියාව වගේ ඉතා බලසම්පන්න අසල්වැසියෙක් ළඟ ඉන්නකොට පාලකයා හැමෝටම දෙකට නැවෙන නෝංජලයෙක් වෙලා හරියන්නෙ නැහැ. ඒක හරියට නිකන් ඉතා කඩවසම් නමුත් සල්ලාල පිරිමියෙක්ව අසල්වැසියෙක් වෙච්ච ගෙදරක පිරිමියා න'පුං'සක'කයෙක් වෙනවා වගේ වැඩක්. අල්ලපු ගෙදර එකාගෙන් පටන්ගත්තට පස්සෙ මුලු ගමම එනවා ඇරලා යන්න. දැන් ලංකාවට වෙලා තියෙන්නෙ ඒක.

මේ වගේ තර්ජනයකට මුහුණ දෙනකොට බුද්ධි අංශ සීරුවෙන් ඉන්න ඕනෙ. විමර්ශන සහ මෙහෙයුම් වෙනදාටත් වඩා රහසිගත වෙන්න ඕනෙ. අසනීපයි කියලා නිවාඩු දාලා රට ගිහිල්ලා අපරාධකාරයෙක් අල්ලගෙන ආපු එකේ සුල මුල සවිස්තරාත්මකව මීඩියාවල දීලා රහසිගත මෙහෙයුම්වල ක්‍රම සහ විධි ප්‍රසිද්ධ කරලා ශෝ දාලා හරියන්නේ නැහැ. ත්‍රස්තවාදීන්ගෙන් සාක්ෂි අරගෙන ආරක්ෂක අංශවල ඉහළ නිලධාරීන් හිරේ දාලා ආරක්ෂක අංශවල තියෙන මොරාල් එක බස්සලා හරියන්නෙ නැහැ. මේ වෙලාවේ අපිට පාවිච්චි කරන්න පුළුවන් සෑම ආරක්ෂක අංශ නිලධාරියෙක්ම, ජාතික ආරක්ෂාවට භාවිතා කරන්න පුළුවන් සෑම සිවිල් පුරවැසියෙක්වම අන්තිම බිංදුව දක්වාම පාවිච්චි කරන්න ජනාධිපතිට කොන්ද පණ තියෙන්න ඕනේ. එහෙම පාවිච්චි කරන්න ඔවුන්ගේ මොරාල් එක අදාල තත්ත්වයේ තියාගන්න ආණ්ඩුවට හැකියාව තියෙන්න ඕනේ. නමුත් එහෙම කොන්ද පණ තියෙන බවක් හෝ හැකියාවක් තියෙන බවක් අනුර කුමාර ජනාධිපතිගෙන් අපිට පේන්නේ නැහැ.

මේ වෙලාවේ බුද්ධි අංශ බිසී වෙලා ඉන්නේ social media වල පෝස්ට් දාන අය ගැන හොයන්න. බුද්ධි අංශවල ජනාධිපති ආරක්ෂාව ගැන බලන කට්ටිය ඉන්නේ ජනාධිපතිගේ ගමන් බිමන් කිට්ටු කරලා ඒ ගැන ෆේස්බුක් එකේ පෝස්ට් දාන කට්ටියගෙ පාස්පෝට් ෆොටෝස් බලන්න.

ත්‍රස්තවාදී සංවිධානයකට infilterate කරලා ත්‍රස්තවාදීන්ගේ තොරතුරු අරගෙන, සිදුවිය හැකි ප්‍රහාරයක් වළක්වන්න හෝ ඒ ගැන තොරතුරු පුළුවන් තරම් එකතු කරගන්න ශ්‍රී ලංකා බුද්ධි අංශ ආපහු වතාවක් initiate කරයි කියලා හිතන්න බැහැ කාදිනල් ප්‍රමුඛ හරින්, මනූෂ සහ ජවිපෙ නඩය විසින් කරපු sonic sonic නාඩගම නිසා.

තමන්ගේ ඇඟේ රට ගැන තියෙන කැක්කුමට ත්‍රස්ත සංවිධානයක සාමාජිකයෙක් විදිහට වෙස්වලාගෙන ඔවුන්ගෙන් තොරතුරු ලබාගන්න යන බුද්ධි අංශ සාමාජිකයින්ව උසාවි ගෙනල්ලා ඔවුන්ගේ නම් ගම් ලිපිනයන් පවා ප්‍රසිද්ධ කරාට පස්සේ, ආරක්ෂක අංශවලට බුද්ධි අංශවලට බැඳෙන්න තරුණ කොල්ලන්ට කෙල්ලන්ට ගෙවල් වලින් ඉඩක් දෙයි කියලා හිතන්න එපා. ඒ වගේ භාරදූර වගකීම් දරන ආරක්ෂක අංශ නිලධාරීන්ව විවාහ කර ගන්න තමන්ගේ දුවෙක්ව පුතෙක්ව වෙන දෙමාපියෙක් දෙයි කියලා හිතන්නත් එපා. මේ ආණ්ඩුව පත්වුනාට පස්සේ ආරක්ෂක අංශ නිලධාරීන් කී දෙනෙක් සේවයෙන් ඉවත් වෙලා රට ගියාද කියලා පොඩ්ඩක් ගණන් කරලා බලන්න. ඒ අතරේ බුද්ධි අංශ නිලධාරීන් නිලධාරීන් ඉන්නවද නැද්ද ඉන්නවනං කී දෙනෙක් හිටියද කියලත් හොඳට හොයලාා බලන්න.

මේ පෝස්ට් එක දැම්මට පස්සේ තමන්ගේ තියෙන වැරදි හදා ගන්නවා වෙනුවට වඩිවේල් ගේ පුතා මෙහෙයවන අදාල ආරක්ෂක අංශ විසින් මගේ හදහන බලනවා මිසක, ආක්‍රමණිකයා රට තුළට ඇතුල්වීම වළක්වන්න හෝ රට තුළට ඇතුල්වෙලා ඉන්න ආක්‍රමණිකයාව සොය සොයා දුර්වල කිරීමක් සිද්ධ කරන්නේ නැහැ. මොකද කිව්වොත්, ආක්‍රමණිකයා විසින් පත් පත් කරපු ඉත්තො, තමන්ගේ ලොක්කන්ට විරුද්ධව යන අයව හොය හොයා නිශ්ශබ්ද කරනවා මිසක ලොක්කන්ට විරුද්ධව යන්නේ නැහැ...

තේරුණාද?

- සුහාරා

(මුහුණු පොතෙන් උපුටා ගන්නා ලදී)