ෆොන්සේකා කියන කථාව ඇත්ත නම් එය රාජපක්ෂලාට මහත් වාසියකි..

Oct 8, 2025 at 11:44 AM

|

Lanka Leader

ෆොන්සේකා කියන කථාව ඇත්ත නම් එය රාජපක්ෂලාට මහත් වාසියකි. ඔහු කියන ආකාරයට යුද්ධය අවසාන මොහොතේ කොටි නායකයාට පැන යාම පිණිස මහින්ද අවස්ථාවක් දී තිබේ. එය සැබෑවක් නම් කොටි ඩයස්පොරාව සහ කොටි හිතවාදී සංවිධාන මහින්දට වෛර කිරීම මෝඩ වැඩකි. ඔවුන් සැබැවින් ම මහින්දට ගෞරව කළ යුතුවා පමණක් නොව ආදරය කළ යුතු ය. මන්ද අර්චූනා කියන ආකාරයෙන් ඔවුන්ගේ ‘දෙයියප්පාගේ’ ජීවිතය බේරීමට මහින්ද ම උත්සාහ දරා ඇත. ෆන්සේකා සැබැවින් ම අපට කරන්නේ මහත් උදව්වකි. 

සටනකදී පරාජයට පත් වන ප්‍රතිවාදියාට බේරී යාමට කුඩා හෝ මගක් ලබා දීම වනාහි උතුම් පිළිවෙතකි. එය ගෞරවාන්විත යුද්ධයක පිළිගත් ක්‍රමවේදයකි. විවාදයකදී වුවත් සිය ප්‍රතිවාදියාට ලැජ්ජාවකින් තොරව ගැලවී යාමට අවස්ථාවක් දීම සදාචාරයයි. එයින් පෙන්වන්නේ ඔබේ මහා මානුෂීය කරුණා ගුණයයි. දරුණුතම සතුරාට පවා සිය ජීවිතය බේරා ගැනීමට අවස්ථාවක් දීමට හැක්කේ බෝධිසත්ත්ව නායකයෙකුට ම පමණී. මා විසින් ලියූ අවතරණය නමැති ඓතිහාසික නවකථාවේත් එවැනි සිද්ධියක් ලියා ඇත්තෙමි. ෆන්සේකා සැබැවින්ම කර තිබෙන්නේ මහින්දව තවත් ඉහළට නැංවීමකි. 

අනෙක් පැත්තෙන් ගත් කල එවැනි අවස්ථාවක් දී තිබියදීත් කොටි නායකයා පැන නොගොස් මරණය තෙක් සටන් කිරීම ෆන්සේකා හඳුන්වන්නේ ‘මෝඩකමක්’ ලෙසට ය. දෙමළුන්ගේ දෙයියප්පාට මෝඩයෙකු කියා ෆන්සේකා අවමන් කළත් මට නම් එය පෙනෙන්නේ කොටි නායකයාගේ වීරත්වය ලෙසට ය. පැන යාමට අවස්ථාව දී තිබියදීත් මරණය තෙක් සටන් කිරීම සැබැවින් ම වීරකමකි. ෆන්සේකා එය මෝඩකමක් ලෙස දැකීමෙන් ගම්‍ය වන්නේ එවැනි අවස්ථාවක් ඔහුට ලැබුණහොත් ඔහු නම් පණ කෙන්ද බේරාගෙන පැන යනු ඇත කියා ය. එය වීරත්වය නොවේ. ඒ අතින් ගත් කල ප්‍රභා යනු ෆන්සේකාට වඩා වීරයෙකි.

මා නම් යෝජනා කරන්නේ ෆන්සේකාගේ ප්‍රකාශය අප හැකිතරම් ප්‍රචාරය කළ යුතු ය කියා ය. එය ප්‍රතික්ෂේප කිරීම මෝඩකමකි. මෙය අපට කියලාවත් කර ගන්න බැරි වැඩකි. එයට අනුව කොටි නායකයාගේ මරණයට මහින්ද වග කිව යුතු නැත. මරණය තෝරා ගෙන ඇත්තේ ප්‍රභා ම ය. මෙය අපට ගජ වාසියකි. අනෙක කොටි ත්‍රස්තවාදය පරාජය කළා කියා සිංහලයන් කොහොමත් මහින්දට කෘතගුණ සලකන්නේ නැත. අප වැනි සුළු පිරිසක් එසේ කළාට බහුතරය ඔහුට ‘හොරා’ කියා නින්දා අපහාස කර ගෙදර යවා සිරිසේනව පත් කර ගත්තේ ය. ඔහු ඝාතනය කිරීමට අරගලකරුවන් රොතු පිටින් පැමිණියේ ය. අර්චුනා කියන්නාක් මෙන් වත්මන් සිංහලයා ගුණමකු අධමයෙකි. එබැවින් නිස්කාරණේ දෙමළුන්ගේ වෛරයට මහින්ද තව දුරටත් පාත්‍ර විය යුතු නැත. අඩුම තරමින් දෙමළුන් සිය නායකයා මළ පසුත් ඔහු වෙනුවෙන් කොන්දේසි විරහිතව පෙනී සිටී. ෆන්සේකාගේ කථාවෙන් පසු දෙමළුන් මහින්ද කෙරෙහි ඇති වෛරය අත් හරිනු නිසැක ය. ධර්මය අපට මග වේවා!

- එරන්ද ගිනිගේ