අනුර - ටිල්වින් යුගයේ ජවිපෙ හොඳම ව්‍යාපාරිකයා සහ ඩීල්කරුවා කවුද?

Jul 29, 2025 at 07:35 AM

|

Lanka Leader

යහපාලන රජය සමයේ ජවිපෙ වසන්ත සමරසිංහ තමන් ස්ථානගත කර ගත්තේ පිරිසිඳු, දූෂණ විරෝධියෙකු විදියට.

මේ රටේ බොහෝ දෙනෙක් ඒ බව පිළිගත්තා.

ඔවුන් සැබැවින්ම වසන්ත, පිරිසිඳු මිනිසෙකු යැයි විශ්වාස කළා. ඔහු දූෂණ විරෝධියෙකු යැයි විශ්වාස කළා.

නමුත් ඇත්ත වසන්ත සමරසිංහ, ජවිපෙ සාර්ථක ව්‍යාපාරයක් ලෙස ගොඩනැංවූ අනුර - ටිල්වින් යුගයේ එහි හොඳම ව්‍යාපාරිකයා සහ ඩීල්කරුවා.

ජවිපෙ වෙනුවෙන් විශාල සමාගම් සහ එහි හිමිකරුවන් සමග 'ඩීල්' කළේ වසන්ත.

එම සමාගම් වල යූනියන් පිහිටුවා, වැඩ වර්ජනය කරන බවට හිමිකරුවන් බිය ගන්වා ව්‍යාපාරිකයන්ගෙන් කප්පම් ගත්තේ වසන්ත.

එය දෙආකාරයක හොරකමක්.

ප්‍රථමයෙන් එය ව්‍යාපාර හිමිකරුවන්ගෙන් ලබා ගන්නා කප්පමක්.

දෙවැන්න සැබැවින්ම ඒ කප්පම් මුදල් ලබා ගත් පසු, ව්‍යාපාර හිමිකරුවන්ට සහ හාම්පුතුන්ට සේවකයන්ට ලබාදිය යුතු වැටුප් වැඩිවීම් සහ වෙනත් අයිතිවාසිකම් ලබා නොදී සිටීමට හැකි වුණා.

ජවිපෙ වෘත්තීය සමිති ඒ කප්පාදු නොදැක්කා සේ සිටියා.

අවසානයේ ජවිපෙ වෘත්තීය සමිති ඇති කළ සෑම ආයතනයකින්ම කප්පම් මුදල් ගලා ගියේ හිමිකරුවන්ගේ පොකට්ටුවෙන් නොවෙයි, සේවකයන්ගේ පොකට්ටුවෙන්. 

ධම්මික පෙරේරා, නිමල් පෙරේරා වැනි මහා පරිමාණ ව්‍යාපාරිකයන් පවා බිය ගන්වා ඔවුන් ජවිපෙ ආධාරකරුවන් කරගත්තේ වසන්ත.

රතුපස්වල සිදුවීමෙන් ඔවුන් ධම්මික ට තමන් කවුරුන්දැයි පෙන්වූවා.

එතැන් පටන් ධම්මික ජවිපෙට නිසි කප්පම් මුදල ගෙවීමට වග බලා ගත්තා.

එතැන් සිට ධම්මික පරිසරයට / ජලයට තබා රටට කුමන විනාශය කළත් ජවිපෙ නොදැක්කා සේ සිටියා. 

(දැන් නම් ධම්මික ලා, නිමල් ලා ජවිපෙ හොඳම මිතුරන්) 

මේ ගණුදෙනු වලින් සැලකිය යුතු මුදලක් වසන්ත සමරසිංහ පුද්ගලික පරිහරණයට තබා ගත්තා.

එය ඔහුගේ කොමිස් මුදල. පක්ෂයත් ඒ පිලිබඳව දැනුවත් ඇති.

ඇමතිවරයෙකු වීමට පෙර සිටම මේ කප්පම් ගණුදෙනුවෙන් ඔහු සුපිරි ධනවතෙකු වුණා. කිසිඳු පාරම්පරික ධනයක් නොතිබූ, රැකියාවක් නොකළ වසන්ත බත්තරමුල්ල ජයන්තිපුර විශාල ඉඩමක් මිලට ගෙන විශාල ගොඩනැගිල්ලක් ඉදිකළා. 

මාලිමා රජයේ නායකයන් වූ අනුර - ටිල්වින්, වැඩිපුරම 'ඩීල්' කිරීමට අවශ්‍ය වන අමාත්‍යංශය වසන්තට භාර දෙන්නේ ඔහුගේ එම දක්ෂතාවය නිසා.

ගණුදෙනු කතා කරමින්, නියමිත කොමිස් මුදල ලබා ගැනීමට පක්ෂයේ කාටත් වැඩි දක්ෂතාවයක් වසන්තට තිබෙනවා. 

මයික් කන්නන් වූ සුනිල් හඳුන්නෙත්ති ලාට සුලු අමාත්‍යංශ ලැබෙද්දී, නලීන් හේවගේ ලා නියෝජ්‍ය ඇමති ලා වෙද්දී, හොරු ඇල්ලීමට පමණක් ප්‍රසිද්ධ වූ වෙනත් කිසිඳු විෂයකින් ජනතා ආකර්ෂනය නොතිබූ වසන්තට පොලිස් අමාත්‍යංශය නොදී, විශාලම අමාත්‍යංශයක් හිමි වූයේ ජනතාව නොදන්නා, අනුර ලා දන්නා වසන්ත සමරසිංහ ගේ මේ දක්ෂතාවය නිසා.

වර්තමාන රජයේ වැඩිම මුදලක් උපයන ඇමතිවරුන් අතර පෙරමුණේ සිටින්නේ වසන්ත.

විදේශයන්ගෙන් හාල්, ලුණු ගෙන ඒමේ සිට වෙළඳ අමාත්‍යංශයෙන් කෙරෙන බිලියන ගණන් ගණුදෙනු සියල්ල සිදු වන්නේ වසන්ත සමරසිංහ ගේ මදක් ඇද එහෙත් තියුණු දෑස් වල නීරික්ෂණයට යටත්වයි.

ඒ ගණුදෙනු වලින් හුවමාරු වන මුදල් සම්භාරයෙන් කොමිස් කොටස නතර වන්නේ ඔහුගේ මේසය මතයි. 

.................. .................. ........................

2000 වසරේ චන්ද්‍රිකා රජය යටතේ ඉන්දියාව සහ ශ්‍රී ලංකාව අතර නිදහස් වෙළඳ ගිවිසුමක් අත්සන් කෙරෙනවා.

මේ ගිවිසුම යටතේ ශ්‍රී ලංකාව ඉන්දියාවෙන් බොහෝ දෑ මිලට ගැනීමට එකඟ වෙනවා.

එමෙන්ම ඉන්දියාවත් ශ්‍රී ලංකාවෙන් විවිධ සේවා සහ අපනයන මිලට ගන්නවා.

එම ගිවිසුමට අනුව ඉන්දියාව ශ්‍රී ලංකාවේ වාර්ශිකව ඇඟලුම් මිලියන අටක් මිලට ගත යුතුයි.

එනම් ඇඟලුම් ඒකක. සිංහලෙන් කිව්වොත් ඕනෑම ආකාරයක ගාමන්ට් පීසස්. කලිසම් නම් කලිසම්, ගවුම් නම් ගවුම්, යට ඇඳුම් නම් යට ඇඳුම්. සම්පූර්ණ ඇඟලුම් ගණන මිලියන අටක් විය යුතුයි.

සාමාන්‍යයෙන් මේ ගිවිසුම යටතේ ඉන්දියාව ශ්‍රී ලංකාවෙන් ඉල්ලුම් කරන්නේ මහා පරිමාණ අඩු මිල බල්ක් නිෂ්පාදන නොවෙයි.

අවම මිල ඩොලර් පහක්වත් වන ශ්‍රී ලංකාවේ නිපදවන ඉතා උසස් තත්ත්වයේ නිමි ඇඳුම්.

බල්ක් නිෂ්පාදන ඉන්දියාවේ පවතිනවා. ශ්‍රී ලංකාව 'ස්පෙෂලයිස්' වී තිබෙන්නේ 'ප්‍රමිතියෙන් උසස්' , 'හයි එන්ඩ්' ඇඟලුම් සඳහායි.

ඒ අනුව මේ ගණුදෙනුවේ සමස්ථ වටිනාකම ඩොලර් මිලියන 40 - 50 ඉක්මනවා.

එනම් රුපියල් කෝටි 1500 කට අධික මුදලක්. 

එමෙන්ම ඕනෑම අර්බුධකාරී අවස්ථාවක පවා ශ්‍රී ලංකා ඇඟලුම් ක්ෂේත්‍රයට ස්ථිර ව්‍යාපාර අවස්ථාවක් තිබෙනවා.

මේ ඇනවුම කළමනාකරණය කරන්නේ ශ්‍රී ලංකාවේ වෙළඳ අමාත්‍යංශය මගින්.

නමුත් මෙතෙක් ඉතිහාසයේ වෙළඳ අමාත්‍යංශය, ඉන්දීය රජය සහ ශ්‍රී ලාංකේය ඇඟලුම් කර්මාන්තකරුවන් අතර පාලම වූවා මිසක, මෙම ගනුදෙනුවට සක්‍රීයව මැදිහත් වුණේ නැහැ.

කිසිඳු රජයක ඇමතිවරයා ඊට මැදිහත් වුණේ නැහැ.

මෙතෙක් කාලයක් ඉන්දියාවෙන් ලැබෙන මිලියන 8ක මේ ඇඟලුම් ඇනවුමේ කොටස් මෙරට කර්මාන්තකරුවන් අතර බෙදුනේ ඔවුන්ගේ විශාලත්වය, ඇනවුමට අවශ්‍ය දෑ නිපැයීමට ඔවුන්ට ඇති හැකියාව වැනි සාධක මතයි.

ඒ සඳහා ස්වාධීන සංගමයක් ද පිහිටුවා තිබෙනවා. මෙතෙක් කාලයක් මේ සංගමය මගින් ඉතාම සාධාරණව සහ සැමට කන්දෙමින් එම ඇඟලුම් ඇනවුම බෙදා දුන්නා.

කොටින්ම ඒ සඳහාත් නිසි ක්‍රමවේදයක් ඇති කර තිබුණා. ( පිට පිට වසර දෙකක දී එකම කර්මාන්තකරුවන්ට විශාල අවස්ථා  නොලැබෙන ලෙස)

නමුත් ඉතිහාසයේ ප්‍රථම වරට මේ ඇනවුම බෙදාදීම සඳහා මෙවර වෙළඳ අමාත්‍යවරයා මැදිහත් වී තිබෙනවා. 

ඒ අනුව මේ මිලියන අටක ඇනවුමෙන් කොටස් මිලියන 7.3 ක් එකම සමාගමකට ලබා දීමට වෙළඳ අමාත්‍යවරයා තීරණය කර තිබෙනවා.

මින්පෙර කිසිඳු වතාවක කොටස් මිලියන 7.3 ක් එකම සමාගමකට ගොස් නැහැ.

එය සෙසු කර්මාන්තකරුවන්ට අසාධාරණයක් බව අමුතුවෙන් කිව යුතු නැහැ.

මින්පෙර කුඩා කර්මාන්තකරුවන්ට පවා මේ ඇනවුමෙන් යම් කෝටාවක් හිමි වුණා.

මේ කෝටාව මෙරට කර්මාන්තකරුවා සහ රැකියා සුරක්ෂිත කිරීම උදෙසා භාවිතා කළා මිසෙක එයින් ලාබ ඉපැයීමට MAS, හයිද්‍රාමනි වැනි විශාල සමාගම් පවා උත්සාහ කළේ නැහැ. 

ඔවුන්ට ඕනෑ තරම් ඇනවුම් යුරෝපයෙන් සහ ඇමෙරිකාවෙන් හිමි වුණා.

එම නිසා ඉන්දීය කෝටාව ඉතාම සාධාරණව යටි තලයට පවා බෙදී ගියා.

මින්පෙර එක සමාගමකට වාර්තා වූ වැඩිම කොටස් ගණන වූයේ MAS සමාගමට හිමි වූ මිලියන 1.3 ක කොටස් ගණනක්.

ඒ අනුව මෙවර සම්පූර්ණ ඇනවුමම පාහේ එක් සමාගමකට ලබා දී තිබෙන බව පැහැදිලියි. 

හොඳම දේ එය නොවෙයි.

ඉතිහාසයේ පළමු වරට මෙවර ඇනවුම ලැබෙන්නේ ශ්‍රී ලාංකේය සමාගමකට නොවෙයි.

මෙවර ඇනවුමෙන් කොටස් මිලියන 7.3 ක් හිමි වන්නේ ඉන්දීය සමාගමක් වන ආමන්ටේ සමාගමකට.

අමාන්ටේ සන්නාමය ශ්‍රී ලාංකේය සමාගමක් වන MAS ආයතනය විසින් ආරම්භ කළත්, 2021 කොවිඩ් සමයේ ඉන්දියාවේ මුකේෂ් අම්බානි ගේ රිලායන්ස් සමාගම විසින් එය මිලට ගත්තා.

දැන් එය 100% ඉන්දියානු සමාගමක්.

ඒ අනුව චන්ද්‍රිකා රජයේ ගිවිසුමක් අනුව ඉන්දියාවෙන් ලංකාවට ලැබෙනා ඇඟලුම් ඇනවුම, වසර 25 කට පසුව නැවත ශ්‍රී ලංකා රජය විසින්ම ඉන්දියාවට ලබා දෙනවා.

එය ශ්‍රී ලංකාවේ ඇඟලුම් කර්මාන්තයට මරු පහරක්.

මෙය ශ්‍රී ලංකාවට ලැබෙන්නේ 'පිනට' නොවෙයි.

අප ඉන්දියාවෙන් මිලට ගන්නා භාණ්ඩ නිසා. එම නිසා මේ ශ්‍රී ලංකා රජයේ සහ ශ්‍රී ලංකා ජනතාවයේ අයිතියක්.

මේ ගණුදෙනුව නිසා රටට පැමිණීමට තිබූ ඩොලර් මිලියන ගණනක් අහිමි වෙනවා.

රටේ ඇඟලුම් සේවකයන්ට හිමි වීමට තිබූ රැකියාවක් / දීමනාවක් අහිමි වෙනවා.

අවසානයේ මෙය රටේ ආර්ථිකයටම සිදු වූ දැවැන්ත පාඩුවක්. 

උසස් ප්‍රමිතියේ යට ඇඳුම් කොටස් මිලියන 7.3 ක් යනු ඩොලර් මිලියන ගණනක ගණුදෙනුවක්.

එහි කොමිස් මුදල ඩොලර් ලක්ෂ ගණනක් වනවාට කිසිඳු සැකයක් නැහැ.

එයින් කොටසක් පැලවත්ත ජවිපෙ ගිණුමටත්, ඉතිරි කොටස වසන්ත සමරසිංහගේ විදෙස් බැංකු ගිණුමකටත් බැර වේවි.

වසර 76 ක සාපය යැයි කියූ චන්ද්‍රිකා ලා රටට ඩොලර් ගෙන ඒමට මාවත් විවර කර තිබිය දී,

දූෂණ විරෝධීන් යැයි හඳුන්වා ගත් වසන්ත සමරසිංහ ලා රටට පැමිණීමට නියමිත ඩොලර් පෙරලා ඉන්දියාවට ලබා දෙන්නේ මෙහෙමයි.

අතීත පාලකයන් හොරා කෑ ඩොලර් විදේශයන්ගෙන් ගෙන ඒමට, දූෂණ විරෝධීන්ට ඡන්දය ලබා දුන් ජනතාවගේ දෑස් ඉදිරිපිටම ඉතිහාසයේ කිසිදිනෙක සිදු නොවූ හොරකම්, වංචා මාලිමා රජය යටතේ සිදුවීම දෛවයේ සරදමක්.

-සචින්

(දේෂක කෝට්ටගේ ගේ මුහුණුපොතිනි.)