ජවිපෙ උපත අක්මීමනදී සිදු වී අදට වසර 60යි - ජවිපෙ සමාරම්භකයින් දහ දෙනාගෙන් 06ක් හමුවූ පුවත්පත් කලාවේදියෙකු කියන කතාව

May 14, 2025 at 05:39 PM

|

Lanka Leader

ජවිපෙ උපත සිදු වූයේ හරියටම මෙයට වසර 60කට පෙර අද වැනි දිනෙක 1965 වසරේ මැයි 14 වැනිදාය. අක්මීමන ඩබ්ලිව්. ටී. කරුණාරත්නගේ නිවෙසේ දෙදිනක් පැවැති එම සමාරම්භක සාකච්ඡාවට සාකච්ඡාවට 12 දෙනකු එක්ව සිටියද දෙදෙනෙක් එම මොහොතේම විනය හේතූන් මත කණ්ඩායමෙන්  ඉවත් කළ බැවින් ජවිපෙ ආරම්භ කළ සමාරම්භක සාමාජිකයින් ලෙස සැලකෙන්නේ ඉතිරි  දහදෙනාය. මේ අනුව ජවිපෙ සමාරම්භකයන් 10 නම් රෝහණ විජේවීර, සනත් බොරුළුකැටිය, ඩබ්ලිව්. ටී. කරුණාරත්න, මාබෝලේ මිල්ටන්, සතොස තලගලගේ වෝල්ටර්, ජයරත්න පෙරේරා හෙවත් දෙල්ගොඩ රාජා, හේරත් මුදියන්සේලාගේ තිලකරත්න හෙවත් නේවි තිලක්, ඩබ්ලිව්. ටී. අමරතුංග, තිස්සමහරාමයේ සිරිපාල අබේගුණවර්ධන සහ රුවන්වැල්ලෙ විල්සන් දැදිගමය.

සමාරම්භක සාකච්ඡාවට එක් වූ 12 දෙනාගෙන් 07 දෙනකු ලියුම්කරු ඉකුත්  දශක තුන ඇතුළත ඔවුන්ගේ නිවෙස් වලට ගොස් පෞද්ගලිකව හමුවී සාකච්ඡා කර ඇත. දැනට 2025 ජීවත්ව ඇත්තේ සමාරම්භකයන් 10 දෙනාගෙන් තිදෙනකු පමණි. ජවිපෙ සමාරම්භක සාකච්ඡාවට එක් වූ 12 දෙනාගෙන්  එවකට ජීවතුන් අතර නොසිටි මුණගැසීමට නොහැකිවූ සෙසු 06 දෙනාගේ ඔවුන්ගේ නිවෙස් වලට ගොස් පවුල්වල බොහොමයක් දෙනාද ලේඛකයාට හමු විය. ඒ අනුව ජවිපෙ ආරම්භ කළ අතීත සමාරම්භක සාකච්ඡාව /කතාව  දීර්ඝ ලෙස ඔවුන්  ආවර්ජනය කල අතර එම කරුණු මත මෙම ලිපිය සැකසිණි. (ඔවුන්ගේ නිවෙස් වලටම ගොස් අදාල ඡායාරූප මෙහි අමුණා ඇත)

සමාරම්භක සාකච්ඡාවට එක් වූ 12 දෙනා නම් මාතර, කෝට්ටේගොඩ උපන් පටබැඳිගේ දොන් නන්දසිරි විජේවීර හෙවත් රෝහණ විජේවීර, ගාල්ල - අඟුළුගහ, ගෝනපිනුවල විතානගේ විජයසේන හෙවත් සනත් බොරුළුකැටිය, හැඳල උපන් වැලිතන්ත්‍රිගේ කරුණාරත්න හෙවත් ඩබ්ලිව්. ටී. කරුණාරත්න, වත්තල මාබෝලේ උපන් එච්. ඩී. මිල්ටන් ප්‍රනාන්දු හෙවත් මාබෝලේ මිල්ටන්, තිස්සමහරාමයේ සිරිපාල අබේගුණවර්ධන, දෙල්ගොඩ උපන් රාජපක්ෂ පතිරත්නලාගේ ජයරත්න පෙරේරා හෙවත් දෙල්ගොඩ රාජා, පන්නිපිටිය පොල්වත්තෙ උපන් තලගලගේ දොන් වෝල්ටර් හෙවත් සතොස වෝල්ටර් විජේසිරි, අක්මීමන උපන් ඩබ්ලිව්. ටී. අමරතුංග, රුවන්වැල්ලෙ උපන් විල්සන් දැදිගම, නාවික හමුදාවේ හේරත් මුදියන්සේලාගේ තිලකරත්න හෙවත් නේවි තිලක්, රත්නපුරේ උපන් තෙල්ගේ බියුටි චන්ද්‍රා ප්‍රනාන්දු හෙවත් රණසිංහආරච්චිගේ චන්ද්‍රා රණසිංහ හෙවත් තෙවරාතන්ත්‍රිගේ බියුටි චන්ද්‍රා  ප්‍රනාන්දු හෙවත් ටී. බී. සී ප්‍රනාන්දු සහ කොළඹ සරසවියේ දෙවුන්දර මුතුමාලය. 

අවසන් වශයෙන් නම් සඳහන් ටී. බී. සී ප්‍රනාන්දු සහ කොළඹ සරසවියේ දෙවුන්දර මුතුමාල,  පළමු සාකච්ඡාව නිමා වූ විගසම විජේවීර විසින් කණ්ඩායමෙන් විනය හේතුන් මත නෙරපා හරින ලදී. ඒ 12 දෙනාගෙන් පස්දෙනෙක් කෞරව කුලයටත්, පස්දෙනෙක් ගොවිගම කුලයටත්, අනෙක් දෙදෙනාගෙන් එක් අයකු බැගින් දේව සහ බත්ගම කුලයටත් අයත් බව පසුකාලීනව හෙළි විය. 

ඒ අනුව  ජවිපෙ සමාරම්භකයන් 10 වන්නේ රෝහණ විජේවීර, සනත් බොරුළුකැටිය, ඩබ්ලිව්. ටී. කරුණාරත්න, මාබෝලේ මිල්ටන්, සතොස තලගලගේ වෝල්ටර්, ජයරත්න පෙරේරා හෙවත් දෙල්ගොඩ රාජා, හේරත් මුදියන්සේලාගේ තිලකරත්න හෙවත් නේවි තිලක්, ඩබ්ලිව්. ටී. අමරතුංග, තිස්සමහරාමයේ සිරිපාල අබේගුණවර්ධන සහ රුවන්වැල්ලෙ විල්සන් දැදිගමය. 

විනය හේතුන් මත කණ්ඩායමෙන් නෙරපා හරින ලද  සමාරම්භක   සාකච්ඡාවට සහභාගි වූ දෙදෙනා වූයේ ටී. බී. සී ප්‍රනාන්දු සහ කොළඹ සරසවියේ දෙවුන්දර මුතුමාලය.

මේ සාකච්ඡාවට ප්‍රථමයෙන් සාකච්ඡා වට ගණනාවක් විවිධ තරාතිරමේ පුද්ගලයන් රැසක් සමඟ විජේවීර කොළඹ සහ අම්බලන්ගොඩ පවත්වා තිබිණි. අම්බලන්ගොඩ බොහෝ සාකච්ඡා පැවැතියේ කළුවඩුමුල්ල පන්සලේය. එවකට එහි විහාරාධිපති පටබැඳිමුල්ලෙ බුද්ධ ශ්‍රී නාහිමියන්ය. වාමාංශික සහ බෞද්ධ ප්‍රබෝධයේ උන්වහන්සේ පුරෝගාමියෙකි. පන්සලේ ආවතේවකරුවන් වූ ඩේවිඩ් සහ පාවුල් විසින් විජේවීරලාගේ මේ සාකච්ඡා පැවැත්වෙන අවස්ථාවන්හිදී බොහෝ සහාය දුන් දෙදෙනෙකි. ඒ සාකච්ඡාවන්ට ඉඩම් සංවර්ධන දෙපාර්තමේන්තුවේ කම්කරු සමිති උප සභාපති කඹුරුගමුව කොටුවෙල උපන් ලුණුමෝදරගේ දිනෝරිස් හෙවත් සිරිල් දිසානායක ද ඉඩම් සංවර්ධන දෙපාර්තමේන්තුවේ කාර්යාල කාර්යාධිකාරි සංගමයේ ලේකම් අම්බලන්ගොඩ උපන් ගුස්තිඤ්ඤ වඩු පියසිරි ගුණරත්න හෙවත් සරත් ගුණදාසද, අඟුළුගහ උපන් දොඩන්දූව, වළමුල්ල ගමේ ජීවත්වූ ගුරුවරයෙකු වූ ගෝනපිනුවල විතානගේ විජයසේන හෙවත් සනත් බොරළුකැටිය ඇතුළු කිහිපදෙනෙක් එක්ව සිටියහ.

වසර 1965 මැයි 13 වැනිදා යූනියන් පෙදෙසේ, සයිවර් කඩයකින් තෝසේ සහ වඩේ සමඟ රාත්‍රී ආහාරය ගෙන ඔවුහු මරදාන දුම්රියපළට ගොස් වෙන වෙනම ප්‍රවේශ පත්‍ර මිලදී ගත්හ. රාත්‍රී තැපැල් දුම්රියෙන් ගාල්ලට පැමිණීමෙන් පසු අලුයම තෙක් එම කණ්ඩායම ගාල්ල, සමනල පාලම අසල රැගෙන ආ ගමන්මලු හිසට තබාගෙන පැය තුනක පමණ නින්දකට වැටිණි. එදින වෙසක් පොහොය බැවින් වන්දනාවේ යන නඩයක් සේ පිටතට පෙනිය යුතු යැයි විජේවීර මුලදීම පිරිසට උපදෙස් දී තිබිණි.

අලුයම හිරු උදාවෙත්ම මහ මෝදර රෝහලට ගොස් එහි නේවාසික හෙදියක ලෙස සේවය කරන තම පාසල් මිතුරියක් වූ තමරා හෙදිය හමුවිය යුතු යැයි කියා සිටි විජේවීර, විෂබීජනාශක දියරයක් සහ පුළුන් ප්‍රමාණයක් ඇයගෙන් ලබාගත යුතු බව කියා සිටියේය. එහෙත් ඇය එදින සේවා මුරය අවසන් කර ගොස් ඇති බැවින් විෂබීජ නාශක ලබාගැනීමට හැකි වූයේ ගාල්ලෙ ෆාමසියකිනි.

ඉන්පසු ඔවුන් ගාල්ලෙන් තේ බී අක්මීමන, ඉහළගොඩ, කුරුඳුවත්තෙ කරුණාරත්නගේ නිවෙසට යෑම සඳහා උදෑසන අටට පමණ තල්ගම්පළ බලා යන බස් රථයට ගොඩ විය. දෙහිදූව හන්දියෙන් නිවෙසට යන විට පෙරවරු නවය පමණ විය. නිවෙසට ගිය ඔවුන් පිළිගනු ලැබුවේ කරූගේ දෙමාපියන්ය. උදෑසන ආහාරයට ලුණු මිරිස් සමඟ කිරිබත් ද පොල් පැණි යොදා සාදන ලද ඉඹුල් කිරිබත් ද නිවෙසේ සූදානම් කර තිබිණි. නිවෙසේ හිමිකරු කරූගේ පියා වූ වැදිතන්ත්‍රිගේ තේමිස් අප්පුහාමි 1899 උපන් අතර ඒ වන විට 66 හැවිරිදි වියේ පසු විය. කලක් රාජකීය හමුදාවේ සිවිල් අංශයේ සේවය කළ ඔහු පසුව අබේගුණසේකර හෙවත් පැටි මහත්තයාගේ බස්රථ සමාගමේ රියැදුරෙකු වශයෙන්ද කටයුතු කළ අයෙකි. පසුව ඉන් ඉවත්ව ගොවිතැන ප්‍රධාන වෘත්තිය කරගෙන ජීවත් විය. ඔහුගේ බිරිඳ වත්තල හැඳල උපන් ආදාහෙට්ටිගේ ඉන්ද්‍රාවතී පෙරේරා වූ අතර එම දෙපළට දරුවන් දහදෙනෙකි. ඉන් හතක් පිරිමි දරුවන් වූ අතර තුනක් ගැහැනු දරුවන්ය. පසු කලෙක ජවිපෙ මුල් පෙළේ නායකයෙක් වූ ඩබ්ලිව්. ටී. කරුණාරත්න එම දෙපළගේ සිවුවැනි දරුවා විය.

ජවිපෙ ආරම්භක සාකච්ඡාව 1965 වසරේ මැයි 14 වැනිදා උදෑසන ආහාරයෙන් පසු ආරම්භ වූ අතර කරූගේ නිවෙසේ සාලයේ පැදුරු එළාගෙන සාකච්ඡාව පැවැතිණි. එකල දේශපාලන තත්ත්වය ගැනත්, වාමාංශික ව්‍යාපාරය ගැනත් බොහෝ කරුණු රෝහණ විජේවීර විසින් සහභාගිවන්නන්ට පහදා දෙන ලදී. චීන සහ කියුබන් විප්ලව ගැනද එහිදී දීර්ඝ වශයෙන් සාකච්ඡා කළ අතර; ශ්‍රී ලංකාව සඳහා මාක්ස් ලෙනින්වාදී විප්ලවීය සංවිධානයක් ගොඩනැඟීමට එහිදී තීරණය විය. 

විප්ලවීය සංවිධානයේ සාමාජික චර්යාධර්ම වශයෙන් දුම්පානය සහ මත්පැන් පානය මනස විකෘති කරන අතර; අනවශ්‍ය වියදමක්ද දරන්නට සිදුවන බව විජේවීර කියා සිටියේය. එමෙන්ම ප්‍රේම සබඳතා මඟින් විප්ලවීය ජීව ගුණය බොඳවී අනවශ්‍ය කාලයක්ද වැයවී විප්ලවවාදී පක්ෂයේ රහස් සතුරා අතට පත්විය හැකි බව අවධාරණය කළ අතර එවැනි දෙයින් බැහැරවිය යුතු බව විජේවීර කියා සිටියේය. 

මෙහිදී මරදාන, පන්සල පාරේ නේවාසිකව සිටි කොළඹ සරසවි සිසුවකු වූ දෙවුන්දර මුතුමාල ඒ ගැන ප්‍රශ්න කළ අතර; එම තීරණය දරදඬු බවද කියා සිටියේය. එම තීරණ පිළිගැනීමට තමාට නොහැකි හෙයින් ගෞරවාන්විතව ඉවත්ව යන බව මුතුමාල කියා සිටියේය. සෙසු අයගේ ඉල්ලීම මත දිවා ආහාරය තෙක් රැඳි සිටි ඔහු ප්‍රථම දිනයේදීම යෝජිත විප්ලවවාදී පක්ෂයෙන් ඉවත්ව ගියේය. ශන්මුගදාසන්ගේ ලංකා කොමියුනිස්ට් පක්ෂයේ පාණදුරේ කණ්ඩායමෙන් දේශපාලනයට ප්‍රවේශ වූ දෙවුන්දර මුතුමාලගේ පියා ගුරුවරයෙකි. දෙහිවල වෛද්‍ය පාරේ තරුණියක සමඟ එකල ඔහුගේ ප්‍රේම සබඳතාවක් විය. එමෙන්ම වැඩිම මිලක් වන සිගරැට්ටුවක් වන ‘ආඩත්‘ද ඔහු පානය කළේය. ශන්මුගදාසන්ගේ ලංකා කොමියුනිස්ට් පක්ෂයේ පාණදුරේ කණ්ඩායමෙන් එක්වූ තවත් අයකු වූයේ ටී. බී. සී. ප්‍රනාන්දුය. රත්නපුරේදී උපන් ඔහු පාණදුර, සුමංගල විදුහලේ ආදි සිසුවකු වූ අතර ඔහු එකල පුහුණු ගුරුවරයෙකි. පාණදුර කණ්ඩායමේ 15ක් පමණ ඉදිරිපෙළ ක්‍රියාකාරිකයන් ශන්මුගදාසන් සමඟ සිටි අතර ඔවුහු මාක්ස්වාදී දැනුම සහිත අය විය.

උදෑසන 10ට ආරම්භ වූ සාකච්ඡාව දිවා ආහාරයට මොහොතක් නතරකොට පසු දින අලුයම 4 තෙක් පැවැතිණි. පසු දින යළි උදෑසන නවයට සාකච්ඡාව ඇරැඹිණි. ශ්‍රී ලංකාවේ භූගෝලීය සිතියමක් මඟින් කරුණු පැහැදිලි කළ විජේවීර මේ යන ක්‍රමය යටතේ තරුණ පරපුරට අනාගතයක් නැති බව එහිදී අවධාරණය කළේය. සමනල කන්දෙන් පැන නඟින බොහෝ ජල මූලාශ්‍ර රට වටා ගොස් අවසානයේ මහමුහුදට ගලා බසින බව පෙන්වා දුන් විජේවීර කෘෂි ආර්ථිකයක් තුළ රට ගොඩනඟන හැටි අපූරුවට පැහැදිලි කළ බව ඊට එක් වූවෙක් පැවැසීය. වසර දහයකින් ශ්‍රී ලංකාවේ බලය නව විප්ලවීය සංවිධානයට ලබාගත හැකි බව රෝහණ විජේවීර සපථ කළ බව කියයි.

සාකච්ඡාව පස්වරු 12ට පමණ නිමාවට පත් වූයේ සහභාගිවූ සියලු දෙනා ලාංකේය විප්ලවය වෙනුවෙන් සිය සම්පූර්ණ ශක්තියම ජීවිත පරදුවට තබා කැප කරන බවත් මොනයම් හෝ අවස්ථාවකදීවත් කිසිවකු පාවා නොදෙන බවටත් වූ ප්‍රතිඥාව එක හඬින් කියවමිනි. පසුව අදාළ ලියවිල්ලකට සියලු දෙනාම සිය රුධිර බිඳකින් අස්සන් කළේය. ඒ සඳහා උපයෝගී කරගත්තෙ කරුණාරත්නගේ නිවසේ මිදුලේ තිබූ දෙහි ගසක කට්ටකින් සුළැඟිල්ල පසාරු කිරීමෙන් ආ රුධිරයයි. කරූගේ නිවෙසට එන විට ගාල්ලෙ ෆාමසියකින් විජේවීර මිලදී ගත් විෂබීජ නාශක දියරය පුලුන් කෑල්ලක පොඟවා සුළැඟිල්ල පිස දැම්මේය. එම ලිපිය පසු කලෙක සුරැකිව තබාගෙන සිටියේ බණ්ඩාරගම පදිංචි ආදායම් බදු දෙපාර්තමේන්තුවේ සේවය කළ වෙල්ගමය. එහි පිටපතක් තිළිණයක් ලෙස මවෙතද ලැබිණි.

දිවා ආහාරයෙන් පසු එහි සිටි තවත් අයකු අද්දර ගෙවත්තෙ හිමිකරු අල්විස්ගේ දියණිය පත්මලතාට සිය ලිපිනය කොළ කැබැල්ලක ලියා දුන් බව දුටු මාබෝලෙ මිල්ටන් සියලු දෙනාට ඇසෙන පරිදි කීවේ ඉදිරියේ එය විප්ලවයට එරෙහි වීමක් ලෙස හඳුන්වමිනි. ඒ සාකච්ඡාවෙන් පසු විප්ලවවාදී සංවිධානයෙන් ටී. බී. සී ප්‍රනාන්දුද ඉවත් කරන ලදී. ඒ අනුව  ජවිපෙ සමාරම්භකයන් 10 වන්නේ රෝහණ විජේවීර, සනත් බොරුළුකැටිය, ඩබ්ලිව්. ටී. කරුණාරත්න, මාබෝලේ මිල්ටන්, සතොස තලගලගේ වෝල්ටර්, ජයරත්න පෙරේරා හෙවත් දෙල්ගොඩ රාජා, හේරත් මුදියන්සේලාගේ තිලකරත්න හෙවත් නේවි තිලක්, ඩබ්ලිව්. ටී. අමරතුංග, තිස්සමහරාමයේ සිරිපාල අබේගුණවර්ධන සහ රුවන්වැල්ලෙ විල්සන් දැදිගමය.

සාකච්ඡාවට එක්වී සිටි බදුල්ලෙ උපන් හේරත් මුදියන්සේලාගේ තිලකරත්න හෙවත් නේවි තිලක් ඒ වන විට වැලිසර කඳවුරේ සේවය කළේය. ත්‍රිකුණාමල කඳවුරේ සේවය කරමින් සිටියදී ශන්මුගදාසන්ගේ දේශපාලන පන්තියකදී ඔහු විජේවීර දැනහඳුනාගෙන තිබිණි. වඩා උස නැති එහෙත් ප්‍රතාපවත් දේහයක් සහිත නේවි තිලක් දක්ෂ රගර් සහ වොලිබෝල් ක්‍රීඩකයෙකි. හේලිස්හි සේවය කළ කම්කරුවකු වූ රුවන්වැල්ලෙ විල්සන් දැදිගම ද වෘත්තිය සමිති ක්‍රියාකාරිකයකු වූ අතර ඔහු විජේවීරට එක්වූයේ ශන්මුගදාසන්ගේ සමිතිය හරහායි. 

වරාය තාක්ෂණික අංශයේ සේවය කළ රාජපක්ෂ පතිරණලාගේ ජයරත්න පෙරේරා හෙවත් දෙල්ගොඩ රාජා දෙල්ගොඩ, කඳුබොඩ පදිංචි අයෙකි. 1957 කොමියුනිස්ට් පක්ෂයේ වරාය එක්සත් සේවක සමිතියට එක්වූ ඔහු පසුව ශන්මුගදාසන්ගේ පක්ෂයට එක්වී ඉන් ඉවත්ව විජේවීරට සහාය දැක්වීය. කොළඹ, කොච්චිකඩේ කම්කරු සාකච්ඡාවකදී 1964 වසරේදී තමා විජේවීර දැනහඳුනාගත් බව රාජා ලියුම්කරුට කීවේය. රාජාට අයත් ඊඑන් 90130 සහ 1 ශ්‍රී 7765 යතුරුපැදි ජවිපෙ ආරම්භයේදී බොහෝ කටයුතුවලට යොදාගෙන තිබිණි. විජේවීරගේ සොහොයුරා වන ආනන්ද, ඔරුගොඩවත්තෙ කාර්මික විදුහලේ ඉගෙනුම් කටයුතු සඳහා යන සමයේ වසර එකහමාරක් පමණ නතර වී සිටියේ රාජාගේ නිවෙසේය. විජේවීර ද තෙමසක් පමණ වරෙක සිටියේ එම නිවෙසේය. හිත හොඳ අවංක පුද්ගලයකු ලෙස ප්‍රකට රාජා පසුකලෙක ජවිපෙන් ඉවත් වුවද අවසානය දක්වා විජේවීරට ළැදි පුද්ගලයකු ලෙස ඔහු සමඟ වූ සම්බන්ධය පවත්වාගෙන ගියේය.

මේ සාකච්ඡාවට සහභාගිවූ අයගෙන් විජේවීර ඉල්ලා සිටියේ පක්ෂයේ අරමුණු ප්‍රචලිත කිරීම සඳහා පූර්ණකාලීනව කැපවන ලෙසය. එහි ප්‍රතිඵලයක් ලෙස එවකට ශන්මුගදාසන්ගේ පක්ෂයට අයත් වරායේ සමාජවාදී එක්සත් කම්කරු සමිතියේ සහකාර පාලක ලේකම් ලෙස කටයුතු කළ අමරතුංග දියතලාව කහගොල්ල විවේකාශ්‍රමයේ සේවය කරමින් සිටියදී නව විප්ලවවාදී සංවිධානයේ සබඳතා ප්‍රවර්ධනයට දායක විය.

.

පන්නිපිටිය, පොල්වත්තෙ උපන් වෝල්ටර් තලගල සතොස මෝටර් රථ තාක්ෂණ ශිල්පියෙකි. ඔහුගේ පියා ද සතොසේ සේවය කළ චන්ද්‍රමාන වූ අතර මව ගුරුවරියකි. ශන්මුගදාසන්ගේ පක්ෂය හරහා විජේවීරට එක්වූ වෝල්ටර් 71 කැරැල්ලෙන් පසු ජවිපෙ සබඳතා අත්හැරියේය.

ජවිපෙ සමාරම්භක සාමාජිකයන් 10 දෙනාගෙන් 71 අප්‍රේල් කැරැල්ල වන විට විජේවීරට ඉතිරිව සිටියේ 7 දෙනෙක් පමණි. ඉන් දෙදෙනෙක් කැරැල්ලේදීම මිය ගිය අතර; ඔවුන් වන්නේ කඩවත පොලිසියට එල්ල කළ ප්‍රහාරයේදී මිය ගිය මාබෝලේ මිල්ටන් හා ගෝනපිනුවල සනත්ය. කැරැල්ල අරඹන විට සනත් ජවිපෙ දෙවැනි නායකයා විය.  2025 වන විට ජීවත්ව සිටින්නේ තිදෙනෙකි. (වසර 1986 සිට 1990 දක්වා පැවති 60,000ක් ඝාතනය වූ ජවිපෙ 2වැනි කැරළි සමය පිළිබඳව Dharman Wickremaretne ධර්මන් වික්‍රමරත්න විසින් රචිත 'ජවිපෙ 2වැනි කැරැල්ල' ග්‍රන්ථ 03 පිළිබඳ වැඩි විස්තර අවශ්‍ය වන්නේනම් 071 2733986 යන WhatsApp දුරකථනයෙන් විමසිය හැකිය).

- ධර්මන් වික‍්‍රමරත්න විසිනි