ත්‍රිකුණාමලය ශ්‍රී සම්බුද්ධ ජයන්ති බෝධිරාජ විහාරස්ථානයේ පසුගිය නොවැම්බර් 16 වැනිදා බුදු පිළිමයක් තැන්පත් කිරීමට වහලයක් සහ ආවරණයක් සකස් කිරීමේදී වෙරළ සංරක්ෂණ පනත උල්ලංඝනය කළ බව කියන චෝදනාවකට බලංගොඩ කස්සප හිමියන් ඇතුළු හිමිවරුන් සිව් නමක ඇතුළු සිවිල් සංවිධාන ක්‍රියාකාරීන් නව දෙනකු ලබන 19 වැනිදා දක්වා රක්ෂිත බන්ධනාගාරගත කර තබන ලෙසට ත්‍රිකුණාමලය මහෙස්ත්‍රාත් අධිකරණය ඊයේ (14) දින නියෝග කළේය.

කොළඹ මහ නගර සභාවේ මුදල් කමිටුව සඳහා සාමාජිකයන් පත්කර ගැනීමට ඊයේ (14දා) පැවැති ඡන්ද විමසීමේදී සමගි ජන බලවේගය ප්‍රමුඛ විපක්ෂය ඉදිරිපත් කළ සාමාජිකයින් පස්දෙනාම ඡන්දයෙන් තේරී පත්වී ඇත. පාලන බලය හිමි ජාතික ජන බලවේගය ඉදිරිපත් කළ සියලු අපේක්ෂකයන් පරාජයට පත් වී තිබේ.

හින්දු බැතිමතුන්ගේ ප්‍රධාන ආගමික උත්සවයක් වන තෛපොංගල් උත්සවය අදට (15) යෙදී තිබේ.

දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා සහභාගිවන හිරු සලකුණ කාලීන දේශපාලන වැඩසටහන අද රාත්‍රී 10.30 ට හිරු නාලිකාව ඔස්සේ විකාශය වේ.

අධ්‍යාපන ප්‍රතිසංස්කරණ ක්‍රියාත්මක වීම සිදුවන්නේ අධිරාජ්‍යවාදී ව්‍යාපෘතියක් ලෙසින් බවත් මෙය තනිපුද්ගල ව්‍යාපෘතියක් නොවන බවත් පෙරදිග දේශපාලන විද්‍යායතනයේ විදුහල්පති ආචාර්ය වරුණ චන්ද්‍රකීර්ති මහතා පවසයි.

වෘත්තීය සමිති හුදකලාකොට පහරදීමට ආණ්ඩුව සූදානම් වන්නේ නම් වෘත්තීය සමිති ලෙස එකතුවී එයට මුහුණ දීමට සූදානම් බව ගුරු විදුහල්පති වෘත්තීය සමිති එකමුතුවේ කැඳවුම්කරු උලපනේ සුමංගල හිමි පවසති.

නිදහස් සෞඛ්‍ය සේවාවේ සහ වෛද්‍යවරුන්ගේ ගැටලු විසඳීමට සෞඛ්‍ය අමාත්‍යවරයා ලබා දුන් එකඟතා ක්‍රියාත්මක කිරීමට අපොහොසත් වන්නේ නම් අඛණ්ඩව දීපව්‍යාප්ත වෘත්තීය ක්‍රියාමාර්ගයකට එළැඹෙන බව රජයේ වෛද්‍ය නිලධාරීන්ගේ සංගමය පවසයි.

මහජන විරෝධය හමුවේ නව අධ්‍යාපන ප්‍රතිසංස්කරණ හකුලා ගැනීමට රජය ගත් තීරණය, රටේ දරු පරපුරේ යහපත උදෙසා ගත් වැදගත් පියවරක් වුවද එය ආණ්ඩුවේ “අදූරදර්ශී ක්‍රියාකලාපය හා උද්දච්චකම” මනාව පිළිඹිබු කරන ප්‍රබලම සාක්ෂියක් බව ජාතික නිදහස් පෙරමුණේ නායක විමල් වීරවංශ මහතා පවසයි. අද (14) කොළඹදී පැවති මාධ්‍ය හමුවකට එක්වෙමින් ඒ මහතා මේ බව සඳහන් කළේය.

ත්‍රිකුණාමලය ප්‍රදේශයේ බුදු පිළිමයක් සම්බන්ධ සිද්ධියකට අදාළව පූජ්‍ය බලංගොඩ කස්සප හිමියන් ඇතුළු ස්වාමීන්වහන්සේ සිව් නමක් සහ සිවිල් සංවිධාන ක්‍රියාකාරිකයින් 5 දෙනෙකු රක්ෂිත බන්ධනාගාරගත කර තිබේ.