ජනපති අනුරගේ ජයග්‍රණයේ රහස ජාතික සංවිධාන හෙළිකරයි (වීඩියෝ)

Oct 24, 2024 at 06:23 PM

|

Lanka Leader

ජනපති අනුර කුමාර දිසානායක මහතා ජනාධිපති පදවියට පත්කිරීම වෙනුවෙන් ජනතාව ලබාදුන් ජනවරම ආරක්ෂා කිරීමට ජාතික බලවේගව වශයෙන් වගකීමක් ඇති බවත්, එම ජනවරම ලබාදුන් ජනතාවගේ අපේක්ෂා ඉටුවනවාද නැද්ද යන්න සොයා බැලීමට අයිතියක් ඇති බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

රූපවාහිනී නාලිකාවක පැවති සාකච්ඡාවක දී ඒ මහතා පැවසුවේ කවරෙක් ජනාධිපති වූව ද අභියෝග රැසකට මුහුණ දීම අනිවාර්යෙන් සිදුවන බවත්, ආර්ථික ගැටලුවෙන් ගොඩ ඒමට නම් වෙළෙඳ හිඟය අනිවාර්යෙන් වෙනස් කිරීමට සිදුවන බවත් ය.

1977 සිට පැවතගෙන ආ ආර්ථික ක්‍රමවේදයේ ගැඹුරු වෙනස්කම් සිදු නොකර මෙම ආර්ථික අර්බුදයෙන් ගොඩ ඒම පහසු නැති බවද පවසන වසන්ත බණ්ඩාර මහතා,  ඒ සඳහා නිශ්චිත වැඩපිළිවෙළක අවශ්‍යතාවද මෙහිදී අවධාරණය කරයි. 

එමෙන්ම අමෙරිකාව සහ ඉන්දියාව ප්‍රමුඛ ජාත්‍යන්තර බලවේගයන් මෙරටට සිදුකරනු ලබන බලපෑමේ ස්වභාවය ජනාධිපතිවරයා ඉතා ගැඹුරින් අවබෝධ කරගත යුතු බවත්, ජාතික ජනබලවේගය ලෙස එම පක්ෂය අභ්‍යන්තරයේ සිටින ජනතා විමුක්ති පෙරමුණේ සහ ජාතික ජනබලවේගය ලෙස පිටින් සම්බන්ධ කරන ලද කණ්ඩායම යන කණ්ඩායම් දෙක අතර පවතින මතවාදීමය වෙනස ද ජනාධිපතිරයා අවබෝධ කරගෙන සිටීම වැදගත් බවත් වසන්ත බණ්ඩාර මහතා සඳහන් කරයි.

ජනතා විමුක්ති පෙරමුණේ අතීත භාවිතාව සහ එම ප්‍රතිපත්තියට ආදරය කළ සහ එය අනුමත කළ විශාල පිරිසක් මෙහි සිටින බවද, රෝහණ විජේවීර මහතා ජනතා විමුක්ති පෙරමුණ නිර්මාණය කරන්නේ මෙරට සභ්‍යත්වයේ මූලයන් හොඳින් හඳුනාගෙන බවද ඒ මහතා පවසයි.

ජනතා විමුක්ති පෙරමුණේ අතීත භූමිකාවත් සමග ඇති වූ එම ගෞරවනීය බවට ජනතාව තුළ ප්‍රසාදයක් පවතින බවත්, මෙවර මැතිවරණයේ දී එම වාසිය ඔවුන්ට හිමි වූ බවත් වසන්ත බණ්ඩාර මහතා පැහැදිලි කරයි.

සවිස්තරාත්මක වීඩියෝව නරඹන්න...