පාස්තු ප්‍රහාරය පිළිබඳව කොමිෂන් සභා වාර්තාව ජනතා ලියැවිල්ලක් බවට පත්කිරීම සහ පුහුල් හොරා කරෙන් දැනීම

Oct 19, 2024 at 04:19 PM

|

Lanka Leader

පාස්කු ප්‍රහාරය පිළිබඳව කොමිෂන් සභා වාර්තාව ජනතා ලියැවිල්ලක් බවට පත් කළ යුතු යැයි? මෙලෙස කියන්නේ අප නොවේ..

දැන් රටේ පාලකයන් බලයට පත්වීමට පෙර ඔවුන් කියූ කතාවය..

පාස්කු ප්‍රහාරය මෙරට සිදු වූ ම්ලේච්ඡ ත්‍රස්තවාදී ප්‍රහාරවලින් තවත් එකකි..

එයට පෙර අනුරාධපුරයේ ජයසිරි මහා බෝධීන් වහන්සේ අභියස,

ස්වර්ණමාලී චෛත්‍ය රාජයන් අබියස, ආගමික කටයුතුවල නිරතව සිටි  බෞද්ධ සැදැහැවතුන්  සිය ගණනක් වෙඩි තබා කපා කොටා මරා දැමූහ...

කාත්තන්කුඩිය මුස්ලිම් පල්ලියේ යාඥා කරමින් සිටි ඉස්ලාම් බැතිමතුන් සිය ගණනක් මරා දැමූහ..

භික්ෂූන් වහන්සේලා තිස් ගණනක් එක තැන කපා කොටා මරා දැමූහ...

කැබිතිබිගොල්ලෑවේ  බස් රථ වලට බෝම්බ තබා අහිංසක ලදරු ළමා වැඩිහිටි මහළු  අපේම ජනතාව මරා දැමූහ..

අසූවේ දශකයේ කෙන්ට් ෆාම් ඩොලර් ෆාම්වලින් ඇරඹුණු එම ඝාතන රැල්ල දෙදහස් නවයේ වසරේ මුල දක්වාම වරින් වර  නොනැවතී ක්‍රියාත්මක විය...

එම දරුණු ත්‍රස්තවාදය මැඩීම සඳහා මෙරට රාජ්‍ය නායකත්වය සහ සන්නද්ධ හමුදා ක්‍රියා කරද්දී, අද සාධාරණය ඉල්ලන සමහරු  එම මිනීමරුවන්, ත්‍රස්තවාදීන්, වෙනුවෙන් පෙනී සිටි ආකාරය අපට මතකය..

මිනීමරුවන් හමුවීමට ගොස් අතට අත දෙමින් කතාබස් කළ ආකාරය ද අපට මතකය..

කෙසේ වෙතත් පාස්කු ප්‍රහාරයෙන් මිය ගියේ ද  ඊට පෙර අතීතයේ එල්ටීටීඊ ත්‍රස්තවාදීන්ගෙන් මියගිය ආකාරයටම මෙරට අහිංසක පුරවැසියන්ය...

සිය ආගමික දිනයකදී ආගමික කටයුතු නිරත වෙමින් සිට අහිංසකයන්ය..

වචනයේ අර්ථය යෙන්ම එය ඉතා අමානුෂික ප්‍රහාරයකි..

එම අපරාධය කර එවුන් පිරිසක් ඔම ප්‍රහාර වලින්ම  විනාශයට පත්වූහ..

එය මරාගෙන මැරෙන ප්‍රහාරයක් විය...

එම මරාගෙන මැරෙන අයට අමතරව ම ප්‍රහාරයට සහාය දුන්නා යැයි සැක කරණ පිරිසකට එරෙහිව මේවන විටද අධිකරණ ක්‍රියාමාර්ග ගනිමින් පවතී...

එමෙන්ම එම ප්‍රහාරය වළක්වා ගැනීමට අසමත් වූවා යැයි එවකට සිටි ජනාධිපතිවරයාටත් ආරක්ෂක අංශවල නිලධාරීන් පිරිසකටත් එරෙහිව රුපියල් කෝටි ගණනක  දඩ නියම කරනු ලැබූ අතර ඔවුන් සියලු දෙනාම එම දඩ ගෙවා නිමකර ඇත...

අපට අතීතයේදී පිටකොටුවේ බෝම්බ පුපුරද්දීත්, දෙහිවල දුම්රියේ බෝම්බ පිපිරද්දීත්, මරදානේ පුද්ගලික බස් රථ තුළ බෝම්බ පුපුරද්දිත්, 

අනුරාධපුරයට ගසා නොච්චියාගම විල්පත්තුව හරහා කරදරයක් නැතුව ප්‍රහාරකයන් ගම්බිම් බලා යද්දිත්,

උතුර නැගෙනහිර දිස්ත්‍රික්කවලට මායිම් වූ අම්පාර පොළොන්නරුව අනුරාධපුරය දිස්ත්‍රික්කවල  ගොවි ජනපදවලට පැන ගොවිතැනින් ජීවත් වූ අහිංසක මිනිසුන් මරා දමද්දීත්, කුඩා දරුවන් දෙපයින් අල්ලා ඔසවා පොළොවේ ගසා මරා දමද්දීත්, බඩ දැරු අම්මලාගේ බඩ කපා කලලය ගෙන පෙති ගසද්දීත්, ඒ කාලයේ ඒවා වලක්වා ගත නොහැකිවූ පාලකයන්ට එරෙහිව නඩු පවරන්නට බැරිවීම ගැන හරිම කණගාටුය.

ඒ කාලේ හිටපු නායකයන් කිව්වේ තමන්ගේ ආරක්ෂාව තමන් විසින් සලසා ගත යුතු බවය...

ඒවාට විරුද්ධව නඩු දමන්නට තබා කතා කරන්නටවත් මිනිහෙක් හිටියේ නැත...

එවන් බිහිසුණු අපරාධ කළ ප්‍රභාකරන් නැමැති මිනීමරුවාට   එරෙහිව  ප්‍රතිප්‍රහාර ආරම්භ කළ පසු ඒවා නවත්තන්නට ආ විදේශ නියෝජිතයන්ට ,

නෝර්වේ නියෝජිත එරික් සෝල් හයිම්ට,

"ප්‍රභාකරන් ආවේ වන්නි කැලෙන්.. මම ආවේ හම්බන්තොට කැලෙන්...

ඔබ ගිහින් ප්‍රභාකරන්ට කියන්න මම මේ සැරේ නවත්තන්නේ කිලිනොචියට ඇවිල්ලා මිනිහා අරගෙන කියලා"

කියලා කිව්වෙත්, නන්දිකඩාල් වලට කොටුවුණු ප්‍රභාකරන් බේරෙන්නට යුද මෙහෙන් නතර කරන්නට යැයි කියන්නට ආ බ්‍රිතාන්‍ය හා ප්‍රංශයේ විදේශ ඇමතිවරුන්ට 

" මහත්වරුනි ඔබට පොඩ්ඩක් වැරදිලා..

අපි ඔබෙන් නිදහස් වුනේ 1948..

අපි දැන් නිදහස් රාජ්‍යයක්..

ඒ නිසා ඔබට අපට නියෝග දෙන්න බෑ..

මම මේක ඉවර කරන්නේ ත්‍රස්තවාදී ඉවර කරලා" 

කියලා කිව්වෙත් දැන් සමහරුන්ට අද නාකි මයිනා වී සිටින මහින්ද රාජපක්ෂ පමණය...

මෙරට ඉස්ලාම් අන්තවාදී ම බලවේග වලට එළිපිටම අභියෝග කළ නායකයා ගෝඨාභය රාජපක්ෂය..

ඔහුගේ වෙන දුර්වලතාවයන් තිබුණත් එලිසකළ ආකාරය අපට අමතක නැත..

හැබැයි පහුගිය කාලයේ සමහරුන් කිව්වේ ගෝඨාභය බලයට එන්නට සහරාන්ලා බෝම්බ පිපිරවූ බවය...

තමාට එරෙහි මිනිහෙක්, බලයට පත් කරන්නට කවුරුන් හෝ සියදිවි පූජා කරනවානම් ඒක හරිම අපූරු කතාවක්ය..

ලෝක ඉතිහාසයේ එහෙම දෙයක් වන්නට ඇත්තේ පළමු වතාවට සහ අවසාන වතාවට විය යුතුය...

කෙසේ වෙතත් චැනල් ෆෝ නැමැති නාලිකාවකින් ඒ සම්බන්ධයෙන් එල්ල වූ චෝදනා පිළිබඳ සෙවීමට අභියාචන අධිකරණයේ විනිසුරුවරයෙකුගෙන් සමන්විත කොමිසමක් සහ මහාධිකරණ විනිසුරුවරයෙකුගෙන් සමන්විත කොමිසමක් පසුගිය කාලයේ ජනාධිපතිවරයා විසින් පත්කරනු ලැබිණි...

එම ප්‍රහාරයට පසුබිම් වූ අතීතයේ සිට කරුණු විමසා බලා එම කොමිෂන් සභා දෙක විසින් වාර්තා දෙකක් පිළියෙල කරනු ලැබ ඇත..

පාස්කු ප්‍රහාරයේ සිදුවූ අවසාන දින කිහිපය පමණක් නොව ඊට කලකට පෙරම එම ප්‍රහාරකයන් සම්බන්ධව, ඒවාට සූදානම් වූ ආකාරය සහ ප්‍රහාරය වළක්වා ගැනීමට නොහැකි වූයේ ඇයිද යන්න ආදියත් එම කොමිෂන් විසින් විමසා ඇති බවට සැකයක් නැත..

දැන් මේ මාස කිහිපයකට පෙර ජනාධිපතිවරයාට භාරදී ඇත්තේ එලෙස සියලු කරුණු සොයා බැලූ කොමිෂන් සභා වාර්තාය..

පසුගිය කාලයේ මෙරට කතෝලික පල්ලියේ මාධ්‍ය ප්‍රකාශක තුමන්ලාද පුන පුනා කීවේ මේ වාර්තා ඉක්මනින් එළිදැක්විය යුතු බවය..

දැන් මේ රට පාලනය කරන අයද දැනට මාස කිහිපයකට පෙර කීවේ මේවා එළිදක්වන්නේ නැතිනම් ඒවායේ අභිරහසක් තිබිය යුතු බවය..

ජනතාවට මෙම වාර්තාවල ඇති කරුණු දැනගැනීමේ පරම පූජනීය වූ අයිතිය ඇති බවය..

දැන් ඒ පරණ පූජනීය වූ අයිතිය ලබාදීමට අවස්ථාව ඇත..

එම අවස්ථාව රජය මගින් නොකරනවානම් පිවිතුරු හෙළ උරුමයේ නායක නීතිඥ උදය ගම්මන්පිල විසින් එම තොරතුරු ජනතාව වෙත ඉදිරිපත් කරන බව පවසා ඇත..

ජාතික ආරක්ෂාවට අහිතකර සංවේදී තොරතුරු ඇති ඇමනුම් හැර අනෙක් වාර්තාව එළි දක්වන බව ඔහු ප්‍රකාශ කළේය..

ඔහු විසින් දෙන්නට හදන්නේ මෙතෙක් මෙම ප්‍රහාරය පිළිබඳව විවිධ චෝදනා කළ අය විසින් කරනු ලැබූ ඉල්ලීමයි..

හැබැයි පසුගිය සති කිහිපය තුළදී මෙතෙක් එම වාර්තා එළිදක්වන්නෝ යැයි මහ හඬින් ඉල්ලා සිටි අයගේ සද්ද බද්ධ අඩුවීගියේය..

ඒ ඇයි දැයි අපට තේරෙන්නේ නැත ...

දැන් දැන් මෙම වාර්තා එලි දක්වනවා යයි කියන උදය ගම්මන්පිලට රාජ්‍ය රහස් එළි කිරීමේ වරද සිදුකරනවා යැයි කියන්නේද එදා වාර්තාව එළි දක්වන්නට යැයි ඉල්ලා සිටි අයය. 

ඒක මහා පටලැවිල්ලකි..

වාර්තාවේ තමන්ට අහිතකර දෙයක් ඇතැයි සිතන අය හැර  අන් අය කලබල විය යුතු නැත..

මෙය "පුහුල් හොරා කරෙන් දැනේ"  යන ආප්තෝප දේශය හෝ  "අබ කෑ එකාගේ මොළය  දනවා" යැයි කියන කතාව හෝ සමාන එකක් යැයි සැක හිතෙන්නේ නැද්ද...?

උපුටාගැනීම

ලාල් ද අල්විස්