ජවිපෙ සහ ජාතික බලවේග අතර ගැටුමක් නැහැ... ඒත් මාලිමාව සහ ජාතික බලවේග අතර ගැටුම් පැවතිය හැකියි... 13 සම්පූර්ණයෙන්ම බලාත්මක නොකිරීමට පැහැදිලි ප්‍රතිඥාවක් ලබා දෙන්න - ආචාර්ය ගුණදාස අමරසේකරගෙන් ජනපතිට ලිපියක්

Sep 28, 2024 at 09:06 AM

|

Lanka Leader

වර්තමාන ජනාධිපතිවරයා වෙත පැවරී ඇති ඓතිහාසික වගකීම සඳහා ඡන්දය දුන් ජනතාවගේ සැබෑ අපේක්ෂාවන් වෙනුවෙන් ජාතික සංවිධාන එකමුතුව පෙනී සිටින බව එහි කැඳවුම්කරු ආචාර්ය ගුණදාස අමරසේකර මහතා පවසයි.

ජනාධිපති අනුර කුමාර දිසානායක මහතා වෙත ලිපියක් යොමුකරමින් ඒ මහතා පවසන්නේ අනුර කුමාර දිසානායක මහතාගේ නායකත්වය යටතේ ඇති ජනතා විමුක්ති පෙරමුණ නමැති දේශපාලන ව්‍යාපාරය විසින් ගොඩනගා ඇති අතීත උරුමය සහ ජාතික බලවේගවල අපේක්ෂා අතර ගැටුමක් නැති නමුත් ජාතික ජනබලවේගය නමැති ව්‍යාපාරයට වෙනත් කඳවුරුවලින් සම්බන්ධ වී හෝ සම්බන්ධ කර ඇති පුද්ගලයන් සහ ජාතික බලවේග අතර ගැටුම් පැවතිය හැකි බවයි.

මේ නිසා ලිඛිත ප්‍රතිපත්ති ප්‍රකාශනයේ කුමක් සඳහන් වුවත් ඒවා පක්ෂයේ ඓතිහාසික උරුමයට සහ මහජන අපේක්ෂාවලට සාපේක්ෂව විග්‍රහකර ගන්නැයි එම ලිපිය මගින් ජනාධිපතිවරයාගෙන් ඉල්ලා තිබේ.

කොන්දේසි පැනවීමක් නොවන නමුත් ජනතාව වෙනුවෙන් ඉල්ලීම් කිහිපයක් ඉදිරිපත් කරන බව සඳහන් කරන ගුණදාස අමරසේකර මහතා, සියලු ජන කොටස්වලට සමානව සැලකීම සහතික කරන අයිතිවාසිකම් කොමිසමක් හඳුන්වා දෙන ලෙසද, 13 වැනි සංශෝධනය සම්පූර්ණයෙන්ම බලාත්මක නොකිරීම සහ ඊට අදාළව පැහැදිලි ප්‍රතිඥාවක් ඡන්දදායකයින්ට ලබාදෙන්නට කටයුතු කරන්නැයි ද ඉල්ලා සිටියි.

ශ්‍රී ලංකාවේ ආරක්ෂක හමුදාවලට එරෙහිව විවිධ ජාත්‍යන්තර ආයතන සහ බලවේග විසින් එල්ල කරන යුද අපරාධ චෝදනා නිශේධනය කිරීමට ස්වභාවික යුක්තිය නාමයෙන් ප්‍රති උත්තර බඳින ලෙසද එහි යෝජනා කර ඇත.

සෝෆා ගිවිසුමට එකඟතාව පළකිරීම මගින් ශ්‍රී ලංකාව නමැති ස්වාධීන රාජ්‍යය අමෙරිකානු හමුදාවන්ට සේවා සපයන දූපතක් බවට පත්කිරීමේ මහා පවාදීමට ඉඩ නොතබන ලෙසද, එට්කා ගිවිසුම අත්සන් කර ශ්‍රී ලංකාව ඉන්දියාවේ 29 වැනි ප්‍රාන්තය බවට පත්කිරීමෙන් වළකින ලෙස ද එම ලිපිය මගින් ඉල්ලා තිබේ.