දුම්රිය වර්ජනය තවදුරටත්... ධාවනාගාර සියල්ල අද සිට වැඩ නෑ

Jun 10, 2024 at 09:05 AM

|

Lanka Leader

දුම්රිය ධාවනාගාර පහෙන් දෙකක රියැදුරන් අසූ දෙනෙකු ආරම්භ කර තිබෙන වැඩ වර්ජනයෙන් කොටුව, මරදාන ඇතුළු දුම්රිය ස්ථානවල මගීහු දැඩි අපහසුතාවන්ට මුහුණ දී සිටිති.

ඉල්ලීම් කිහිපයක් මුල් කර ගනිමින් දුම්රිය එන්ජින් රියැදුරන් ආරම්භ කළ වැඩ වර්ජනය හතරවන දිනටත් අද (ජූනි 10) ක්‍රියාත්මක වෙයි.

දුම්රිය එන්ජින් රියැදුරන්ගේ දෙවන පෙළ උසස්වීම් ලබා දීම් ප්‍රමාදවීම, වැටුප් කේතයක් නොමැතිකමින් බඳවා ගැනීම් දිගින් දිගට ම ප්‍රමාද වීම ඇතුළු ඉල්ලීම් කිහිපයකට විසඳුම් ලබා නොදීම පිළිබඳව දුම්රිය සාමාන්‍යාධිකාරීවරයාට විරෝධය පළකරමින් ලොකොමොටොව් ඔපරේටින් ඉන්ජිනේරු සංගමය පසුගිය සිකුරාදා (ජූනි 7) මෙම වැඩ වර්ජනය ආරම්භ කළේ ය.

මගී ජනතාවගෙන් දුම්රිය සේවකයන්ට දැඩි විරෝධයක් පළ වූ අතර වෙන දා ගමනාගමනයට දුම්රිය යොදාගත් මගීන් බස් රථ භාවිත කිරීමෙන් ඇතැම් දුම්රිය ස්ථානවල පාළු ස්වභාවයක් දිස්විය.

වර්ජනයේ මුල් දින තුනේදී බලවේග කට්ටල දුම්රිය ධාවනයෙන් ඉවත්ව තිබූ අතර දුර ගමන් සේවා සහ තැපැල් දුම්රිය සාමාන්‍ය පරිදි ධාවනය විය.

වර්ජනය හේතුවෙන් සිකුරාදා පෙරවරුවේ දුම්රිය ගමන්වාර 43ක් ද, සෙනසුරාදා උදෑසන සිට සවස 5.30 දක්වා ගමන්වාර 76ක් ද, ඊයේ (ජූනි 9) දහවල් වනවිට දුම්රිය ගමන්වාර 35ක් ද අවලංගු කිරීමට සිදුවූ බව දුම්රිය දෙපාර්තමේන්තුව පවසයි.

මොරටුව, ගල්කිස්ස, හලාවත, මීගමුව, මීරිගම, අඹේපුස්ස, රඹුක්කන සහ කළුතර දක්වා ධාවනය වන දුම්රියන් වර්ජනයේ බලපෑමට එසේ ලක්ව ඇතැයි ද එම දෙපාර්තමේන්තුව සඳහන් කළේය.

ප්‍රවාහන අමාත්‍ය බන්දුල ගුණවර්ධන මහතාගේ ප්‍රධානත්වයෙන් වෘත්තීය සමිති අතර සාකච්ඡාවක් අද පැවැත්වෙන බවත්, එහිදී විසඳුමකට එළැඹීමට අපේක්ෂා කරන බවත් අතිරේක දුම්රිය සාමාන්‍යාධිකාරි වී.එස්. පොල්වත්තගේ මහතා පැවසීය.

බලධාරීන්ගෙන් ඊයේ දිනය තුළදී විසඳුමක් නොලැබුණු බවත්, ඒ අනුව ඉතිරි ධාවනාගාර තුනද අද දිනයේදී වැඩ වර්ජනයට සම්බන්ධ කරන බවත් ලොකොමොටොව් ඔපරේටින් ඉන්ජිනියර්ස් සංගමයේ ලේකම් එස්.ආර්.සී.එම්. සේනානායක මහතා පැවසීය.

සති අන්තය අවසන්ව කාර්යාල කටයුතු ආරම්භ වන අද දිනයේදී බොහෝ දුම්රිය ගමන් වාර අවලංගු විය හැකි බැවින් මගීන්ට දැඩි අපහසුතාවන්ට මුහුණ දීමට සිදුවනු ඇතැයි ද ලේකම්වරයා සඳහන් කළේ ය. දුම්රිය රියැදුරන් අසාධාරණ ඉල්ලීම් ඉදිරිපත් කර නොමැති බවත්, බලධාරීන් පැලැස්තර විසඳුම් යොදා වෘත්තීය සමිති පාලනය කිරීමට උත්සහ කළහොත් සමස්ත දුම්රිය පද්ධතියම අකර්මණ්‍ය කරන බවත් හෙතෙම ප්‍රකාශ කළේ ය.

දුම්රිය දෙපාර්තම්න්තුව සතුව එන්ජින් රියැදුරන් 458ක් සිටිය යුතු නමුත් දැනට රාජකාරි කරන පිරිස 250කටත් අඩුයැයි පැවැසූ සේනානායක මහතා මෙම රියැදුරන්ගෙන් පමණක් දුම්රිය ධාවන සේවය කාර්යක්ෂමව පවත්වාගෙන යා නොහැකි බව කීය. රියැදුරු හිඟය හේතුවෙන් දැනට ධාවනය නොවන දුම්රියන් සැලකිය යුතු ප්‍රමාණයක් තිබෙන බවත්, ඊට අමතරව දිනපතා දුම්රිය ගමන් වාර අවලංගු වෙමින් පවතින බවත් ලේකම්වරයා පැවසීය.

වැටුප් කේතය නොමැතිකමින් බඳවා ගැනීමේ පටිපාටිය ඇනහිට තිබෙන බව පැවසූ හෙතෙම 2018.05.09 වැනිදා අමාත්‍ය මණ්ඩල පත්‍රිකාවකින් වැටුප් කේතය අනුමත වී තිබෙන නමුත් මේ දක්වා ක්‍රියාත්මක කර නැති බව සඳහන් කළේ ය. අවස්ථා ගණනාවකදී මෙම ගැටලු විසඳන ලෙසට ලිඛිතව හා වාචිකව දුම්රිය පාලනාධිකාරිය දැනුවත් කළ නමුත් මේ දක්වා ඉල්ලීම් ලබාදීමට නොහැකිවී ඇතැයි ද ඔහු කීය.

- මව්බිම -