යුද හමුදා සැරයන් සුනිල් රත්නායකට ජනාධිපති සමාව දීම ගැන අධිකරණය හමුවේ කරුණු දක්වන්නැයි ගෝඨාභයට නොතිසි

May 18, 2024 at 07:09 AM

|

Lanka Leader

යුද හමුදා සැරයන් සුනිල් රත්නායක ජනාධිපති සමාව යටතේ නිදහස් කිරීම සම්බන්ධයෙන් කරුණු දක්වන ලෙස දන්වා හිටපු ජනාධිපති ගෝඨාභය රාජපක්‍ෂ මහතාට නොතිසි නිකුත් කිරීමට ශ්‍රේෂ්ඨාධිකරණය ඊයේ (17දා) නියෝග කළේය.

විකල්ප ප්‍රතිපත්ති කේන්ද්‍රය හා එහි විධායක අධ්‍යක්ෂ ආචාර්ය ශාක්‍යසෝනි සරවනමුත්තු මහතා විසින් ගොනුකර තිබූ මූලික අයිතිවාසිකම් පෙත්සමක් සලකා බැලූ යසන්ත කෝදාගොඩ සහ අචල වෙන්ගප්පුලි යන මහත්වරු එම නියෝගය කළහ. ජනාධිපති පොදු සමාව ලැබූ සුනිල් රත්නායකට ද එම පෙත්සම සම්බන්ධයෙන් කරුණු දක්වන්නැයි දන්වා නොතිසි නිකුත් කිරීමටද විනිසුරු මඬුල්ල නියෝග කළහ. එම පෙත්සම ලබන සැප්තැම්බර් මස 4 වැනිදා යළි කැඳවීමට දින නියම කෙරිණි.

2000.12.19 වැනිදා සිදුවූ අපරාධ සම්බන්ධයෙන් සුනිල් රත්නායක ඇතුළු පිරිසකට එරෙහිව නීතිපතිවරයා විසින් පවරා තිබූ නඩුවක් විභාග කළ කොළඹ විශේෂ ත්‍රිපුද්ගල විනිසුරු මඬුල්ලක් ඔහුට මරණීය දණ්ඩනය නියම කළහ. එම නියෝගය අභියෝගයට ලක්කරමින් සුනිල් රත්නායක ගොනු කර තිබූ අභියාචනාවක් විභාග කළ ශ්‍රේෂ්ඨාධිකරණය 2017 මැයි 20 වැනිදා මහාධිකරණ තීන්දුව තහවුරු කර තිබිණි. ඉන් අනතුරුව ගෝඨාභය රාජපක්ෂ මහතා විසින් 2020 මාර්තු 26 වැනිදා ජනාධිපති පොදු සමාව යටතේ එම විත්තිකරු මුදාහැර තිබිණි.

හිටපු ජනාධිපතිවරයා එම පොදු සමාව ලබාදී ඇත්තේ නිසි ක්‍රියාපටිපාටිය අනුගමනය නොකරමින් බව කීය. ජනාධිපති නීතිඥ එම්.ඒ. සුමන්තිරන් මහතා කළ කරුණු දැක්වීම් සලකා බැලූ විනිසුරු මඬුල්ල එලෙස නොතිසි නිකුත් කළහ. පෙත්සම්කාර පාර්ශ්වය වෙනුවෙන් ජනාධිපති නීතිඥ එම්. ඒ. සුමන්තිරන් මහතා පෙනී සිටියේය.