බටහිර පීඩනය නොතකා යුක්රේනය සම්බන්ධයෙන් ශ්‍රී ලංකාව මධ්‍යස්ථව සිටීම රුසියාවට අවශ්‍යයි - ශ්‍රී ලංකාවේ රුසියානු තානාපති ලිවාන් දගාරියන්

Feb 11, 2024 at 06:17 PM

|

Lanka Leader

(ශ්‍රි ලංකාවේ රුසියානු තානාපති ලිවාන් දගාරියන් මහතා සමඟ ඩේලි මිරර් පුවත් පතේ(2024 පෙබරවාරි 08 )මාධ්‍යවේදී කැළුම් බණ්ඩාර මහතා කළ සම්මුඛ සාකච්ඡාවේ සිංහල පරිවර්තනය)

ප්‍රශ්නය : රුසියාවේ ඉහළ පෙළේ දූත පිරිස මෑතකදී ශ්‍රී ලංකාවේ කළ සංචාරය දෙරට අතර ද්විපාර්ශ්වික සබඳතා ඉහළ නැංවීමට උපකාරී වූයේ කෙසේද?

රුසියානු තානාපති : අප දෙරට අතර ද්විපාර්ශ්වික සබඳතාවල වර්තමාන තත්වය සම්බන්ධයෙන් අපි සෑහීමකට පත්වෙනවා. අපි සෑහීමට පත්ව සිටින බව පෙන්වන තවත් ඇඟවුමක් වූයේ ඉහළ පෙළේ රුසියානු නියෝජිත පිරිස පසුගියදා කළ සංචාරයයි.

එම දූත පිරිසට රුසියානු සමූහාණ්ඩුවේ ආරක්ෂක කවුන්සිලයේ ලේකම් නිකොලායි පතෘෂෙව්ගේ නායකත්වයෙන් යුත් 40 දෙනෙකුට වඩා විශාල දූත පිරිසක් අයත් වූවා. නිකොලායි පතෘෂෙව් 2023 දෙසැම්බර් 6 වැනි දින ජනාධිපති රනිල් වික්‍රමසිංහ මහතා සමඟ ඉතා වැදගත් හමුවක් පැවැත්වූවා. ඔහු ආරක්‍ෂක ලේකම් මේජර් ජෙනරාල් (විශ්‍රාමික) කමල් ගුණරත්න මහතා සමඟද  සාකච්ඡාවක් පැවැත්වූවා. එලෙසම කමල් ගුණරත්න මහතා පසුගිය වසරේ මැයි මාසයේදී මොස්කව් සංචාරයකටද සහභාගි වූවා. එබැවින් රුසියානු සමූහාණ්ඩුවේ ආරක්ෂක කවුන්සිලයේ ලේකම් නිකොලායි පතෘෂෙව් ඇතුළු පිරිසේ ශ්‍රී ලංකා සංචාරය දෙරට අතර පවතින ද්විපාර්ශ්වික සංවාදයේ අඛණ්ඩ ප්‍රවාහයක් ලෙස හඳුන්වන්නට හැකියි. එසේම නිකොලායි පතෘෂෙව් මහතා පසුගිය දෙසැම්බරයේ කොළඹ සිටි අවස්ථාවේදී එළඹෙන 2024 වසරේ රුසියාවට පැමිණෙන ලෙස ගුණරත්න මහතාට ආරාධනා කරනු ලැබුවා.

රුසියානු දූත පිරිසට අයත් වූ රුසියානු රජයේ අමාත්‍යාංශවල නියෝජිතයන් අභ්‍යන්තර කටයුතු අමාත්‍යවරයා, ආරක්ෂක කටයුතු අමාත්‍යවරයා සහ තවත් ආයතන කිහිපයක අයවළුන් සමඟත්  ශ්‍රී ලංකාවේ නියෝජිතයන් සාකච්ඡා පැවැත්වූවා.

රුසියානු-ශ්‍රී ලංකා ව්‍යාපාරික කවුන්සිලයේ අනුග්‍රහය යටතේ රුසියානු කෘෂිකර්ම, ප්‍රවාහන, කර්මාන්ත, මහ බැංකුව යන ආයතනවල නියෝජිතයින් සහ ශ්‍රී ලංකාවේ එම ආයතන නියෝජනය කරන පිරිස්  අතරද වෙනම සාකච්ඡා පැවැත්වුනා. මේ සාකච්ඡා සම්බන්ධයෙන් අපි සෑහීමකට පත් වෙනවා. අපි යම් යම් කරුණු සම්බන්ධයෙන් සාකච්ඡා කර දෙපැත්තෙන්ම යෝජනා කිහිපයක් ඉදිරිපත් කර තිබෙනවා. මෙම සංවාදයේ අඛණ්ඩතාවය  එළඹෙන අප්‍රේල් මාසයේදී නැවත තහවුරු වීමට නියමිතයි.

ප්‍රශ්නය: මේ වන විට රුසියාව සහ යුක්‍රේනය අතර යුද්ධයක් ඇවිලී තිබෙනවා එලෙසම බටහිර ආසියානු කලාපයේ අර්බුදකාරී තත්ත්වයක් පැන නැගී පවතිනවා. එවැනි විශේෂ සන්දර්භයක් තුළ ඔබ ආරක්ෂක සහයෝගීතාව අපේක්ෂා කරනු ලබනවා . මෙවැනි විශේෂ සන්දර්භයක් තුළ රුසියාව ශ්‍රී ලංකාව සමඟ කුමන ආකාරයේ ආරක්ෂක සහයෝගීතාවක් පවත්වා ගැනීමට අපේක්ෂා කරන්නේද?

රුසියානු තානාපති :පළමුවෙන්ම, අපගේ දැක්මට අනුව  යුක්‍රේන භූමිය තුළ රුසියානු-යුක්‍රේන යුද්ධයක් නොමැති බව පැවසීමට  මම කැමැතියි. මේ කරගෙන යන්නේ රුසියාව විසින් ආරම්භ කරන ලද විශේෂ හමුදා මෙහෙයුමක් පමණයි. එය යුක්‍රේන භූමිය තුළ ක්‍රියාත්මක රුසියාව සහ සාමූහික බටහිර අතර යුද්ධයක් බව මම අවධාරණය කරනවා. බටහිර රටවල් රුසියාවට පරාජයක් හෙවත් උපායමාර්ගික පරාජයක් ලබා දීමට අරමුණු කරගෙන සිටිනවා. නමුත් අපි, රුසියාව, යුක්‍රේනයේ රූකඩ පාලනය සහ ඔවුන්ගේ විදේශ අනුග්‍රාහකයින් පරාජය කිරීමට අරමුණු කරගෙන සිටිනවා. ආරක්ෂක සහයෝගිතාව සම්බන්ධයෙන් ගත් කළ අපි ප්‍රධාන වශයෙන්ම ඉලක්ක කරන්නේ ශ්‍රී ලාංකිකයන් සඳහා වන අධ්‍යාපනය පිළිබඳවයි.

ප්‍රශ්නය: ඔබ අධ්‍යාපනය යනුවෙන් අදහස් කරන්නේ කුමක්ද?

රුසියානු තානාපති :ඔව්, අපි කියමු, හමුදාව සඳහා කියලා. අපි සිසුන් සඳහා අධ්‍යාපනය ගැන සාකච්ඡා කරනවා. සිවිල් වැසියන්ට පමණක් නොව හමුදාවට ද අධ්‍යාපනය ලබා දිය යුතුයි.

ප්‍රශ්නය: ඇත්තටම ආරක්ෂක දෘෂ්ටිකෝණයකින්, ශ්‍රී ලංකාවේ උපාය මාර්ගික ස්ථානගත කිරීම ඔබ දකින්නේ කෙසේද?

රුසියානු තානාපති : ඇත්ත වශයෙන්ම, ශ්‍රී ලංකාවේ උපාය මාර්ගික ස්ථානගත කිරීම ඉතා වැදගත් වෙනවා. යුක්රේනය සම්බන්ධයෙන් ද ශ්‍රී ලංකාවේ සමබර සහ මධ්‍යස්ථ ස්ථාවරය අපි ඉතා අගය කරනවා.බටහිරින් ශ්‍රී ලංකාවට බලපෑම් එල්ල වුවද, ශ්‍රී ලංකා රජය ගන්නා මධ්‍යස්ථ ස්ථාවරය ඉදිරියටත් ආරක්ෂා කරනු ඇතැයි අපි බලාපොරොත්තු වෙනවා. බටහිර හා පෙරදිග යන රටවල් කාණ්ඩ දෙක සමඟම ශ්‍රී ලංකාව යහපත් සබඳතා පැවැත්වීම ඉතා වැදගත් වෙනවා.

ප්‍රශ්නය - යුද්ධය පැවති කාලයේදී ශ්‍රී ලංකා රජය රුසියාවෙන් යුද උපකරණ විශාල ප්‍රමාණයක් මිලදී ගත්තා. දැන් තත්ත්වය සම්බන්ධයෙන් කුමක් කිව හැකිද?

රුසියානු තානාපති :එම අවි මිළදී ගැනීම් රුසියාවෙන් සහ පැරණි සෝවියට් සංගමයෙන් ද සිදු කළා. අපි සියලු දේ සාකච්ඡා කිරීමට විවෘතව සිටිනවා. ශ්‍රී ලංකාව බටහිර රටවල්, ඉන්දියාව සහ චීනය සමඟ හමුදා සහයෝගීතාවයන් පවත්වා ගෙන යනවා. ඉතින්, ඇයි රුසියාව සමඟ එලෙස ආරක්ෂක සහයෝගිතාවයන් පවත්වා ගෙන යාමට නොහැකි වන්නේ?

ප්‍රශ්නය: ඉහළ පෙළේ රුසියානු නියෝජිතයන්ගේ සංචාරයෙන් පසු ගත් පසු විපරම් ක්‍රියාමාර්ග මොනවාද?

රුසියානු තානාපති :අපි තවත් සංචාර කිහිපයක් බලාපොරොත්තුවෙන් සිටිනවා. අපි දැන් විවිධ මට්ටම්වල දේශපාලන උපදේශනවල අපේක්ෂාවන් පිළිබඳව කටයුතු කරමින් සිටිනවා. සමහර විට රුසියානු දුත පිරිසක් ලංකාවට පැමිණේවි. උදාහරණයක් ලෙස කෘෂිකර්ම ඇමැතිවරයාට එළඹෙන පෙබරවාරි මාසයේ ශ්‍රී ලංකාවට පැමිණෙන ලෙස  ආරාධනා කර තිබෙනවා.  එක්සත් ජාතීන්ගේ අනුග්‍රහය යටතේ පැවැත්වෙන ජාත්‍යන්තර සමුළුවට සහභාගී වන ලෙස ශ්‍රී ලංකාවේ කෘෂිකර්ම අමාත්‍ය මහින්ද අමරවීර මහතා සිය රුසියානු පර්ශවකරු දිමිත්‍රි පතෘෂෙව් මහතාට ආරාධනාවක් යවා තිබෙනවා.

ප්‍රශ්නය: කෘෂිකාර්මික ක්ෂේත්‍රය තුළ සහයෝගීතාව සඳහා ඇති විභවයන් මොනවාද?

රුසියානු තානාපති : මුලින්ම පොහොර. ඒ වගේම ආහාර සැපයීම. ශ්‍රී ලංකාවට තිරිඟු සහ තවත් භාණ්ඩ කිහිපයක් සැපයීමට අපි සූදානම්. මේ වන විට එළවළු තෙල් රැගත් රුසියානු නැව් දෙකක් දැනටමත් කොළඹ වරායට පැමිණ තිබෙනවා. එය ශ්‍රී ලංකාවේ මිත්‍රශීලී ජනතාවට රුසියාවෙන් ලබා දෙන මානුෂීය ආධාරයක්. පසුගිය වසරේ සැප්තැම්බර් මාසයේදී මෙවැනිම මානුෂීය ආධාර ශ්‍රී ලංකාවට ලබාදීමේ උත්සවයකට මම සහභාගි වුණා.එම ආධාර ශ්‍රී ලංකාවට සහ අනෙකුත් රටවලට ආහාර සැපයීම සඳහා ලෝක ආහාර වැඩසටහනට රුසියාව ලබාදෙන දායකත්වයේ කොටසක් බව අවධාරණය කරනවා.

ප්‍රශ්නය: සංචාරක ව්‍යාපාරය සම්බන්ධයෙන් රුසියා-ශ්‍රී ලංකා සහයෝගිතාව හොඳින් ක්‍රියාත්මක වෙනවා. මේ දිනවල ශ්‍රී ලංකාවට රුසියාවෙන් සංචාරකයන් විශාල ප්‍රමාණයක් පැමිණෙනවා. ඇත්ත වශයෙන්ම, මෙම සංඛ්‍යාව වැඩි කිරීමට රුසියාවට ශ්‍රී ලංකාවට උපකාර කළ හැක්කේ කුමන ආකාරයෙන්ද?

රුසියානු තානාපති : ශ්‍රී ලංකාව රුසියානුවන් සඳහා ප්‍රසිද්ධ ගමනාන්තයක් බැවින් ඒ සඳහා විශේෂ ප්‍රචාරණ අවශ්‍ය  වන්නේ නැහැ.රුසියානු සංචාරකයන් ශ්‍රී ලංකාවට පැමිණි විට ඉතා සතුටින් ඔවුන්ගේ සංචාරය නිමා කරනවා. ශ්‍රී ලංකාව සහ රුසියාව අතර  සෘජු ගුවන් ගමන් නැවත ආරම්භ වූ දා සිට පෙබරවාරි මාසයේදී රුසියාවෙන් මගීන් 200,000 පැමිණීම්  සලකුණු කිරීමට අපි බලාපොරොත්තු වෙනව. මේ වන විට මොස්කව් සිට සහ අනෙකුත් රුසියානු නගරවල සිට කොළඹ සහ මත්තල යන ගුවන් තොටුපවල් දෙකටම සතියකට සෘජු ගුවන් ගමන් රාශියක් සිදු වෙනවා.බොහෝ රුසියානුවන් අරාබි හෝ ගල්ෆ් රටවල් හරහා ද ශ්‍රී ලංකාවට පැමිණෙනවා. එය ශ්‍රී ලංකාවේ ආර්ථිකයට විශාල දායකත්වයක්. රුසියානුවන් ශ්‍රී ලංකාවේදී මුදල් වියදම් කරනවා. එය ශ්‍රී ලංකාවේ අයවැයට මෙන්ම සංචාරක ව්‍යාපාරයේ යෙදී සිටින පුද්ගලයින්ගේ රැකියාවල උන්නතිය සඳහාද ඉතා වැදගත් වේ.

ප්‍රශ්නය: පසුගියදා පැවැත්වුනු ඉහළ මට්ටමේ රැස්වීමේදී ශ්‍රී ලංකා පරමාණුක බලශක්ති අධිකාරියේ සභාපති මහාචාර්ය එස්.ආර්.ඩී. රෝසා න්‍යෂ්ටික බලශක්තිය සම්බන්ධයෙන් ශ්‍රී ලංකාවේ ස්ථාවරය පිළිබඳව කෙටි විස්තරයක් කරනු ලැබුවා. මේ සම්බන්ධයෙන් රුසියානු පාර්ශවයෙන් කොතෙක් දුරට ඉදිරියට ගොස් තිබෙනවාද?

රුසියානු තානාපති : පළමුවෙන්ම, මහාචාර්ය රෝසා සහ ඔහුගේ කාර්ය මණ්ඩල සාමාජිකයින් අපට දක්වන සහයෝගය සහ රුසියාව සමඟ සහයෝගයෙන් කටයුතු කිරීමට ඔවුන් තුළ වන සූදානම පිළිබඳව මගේ පෞද්ගලික ගෞරවය නැවත වරක් ප්‍රකාශ කිරීමට මෙම අවස්ථාව භාවිතා කිරීමට මම කැමතියි. ශ්‍රී ලංකාවේ පාර්ශවයෙන් විසඳිය යුතු ප්‍රශ්න කිහිපයක් තිබෙනවා.එයින් මම අදහස් කරන්නේ විසඳිය යුතු නීති ගැටළුයි. ශ්‍රී ලංකාවට මේ සම්බන්ධයෙන් වෙනත් රටවලින් යෝජනා කිහිපයක් ලැබී ඇති බව දන්නා නිසා අපි එක්ව සාකච්ඡා කරගෙන යාමට මාර්ගය සැකසීමට උත්සාහ කරනවා.අපි යමක් ඉදිරිපත් කිරීමට සූදානම්. රොසාටොම් රාජ්‍ය පරමාණුක බලශක්ති සංස්ථාවේ (Rosatom State Atomic Energy Corporation) රුසියානු නියෝජිත කණ්ඩායමට ශ්‍රී ලංකාවට පැමිණීමට අවශ්‍ය කොන්දේසි නිර්මාණය කිරීම වැදගත් කාර්යක්. ඔවුන්ට අන්‍යෝන්‍ය වශයෙන් වැදගත් වන කරුණු සාකච්ඡා කළ හැකිය. මේ සම්බන්ධයෙන් වැඩි  විස්තර සාකච්ඡා කිරීමට මට අවසර නැහැ. මුහුදු වෙරළේ හෝ වෙරළෙන් එපිට  කුඩා න්‍යෂ්ටික බලාගාරයක් පිහිටුවීමට අපගේ සූදානම සම්බන්ධයෙන් අපි දැනටමත් ප්‍රකාශ කර තිබෙනවා. එය මෙගාවොට් 110ක් හෝ ඊට වැඩි විය හැකියි. මම තාක්ෂණික කාරනා සම්බන්ධයෙන් දැනුවත් නැහැ. එය විශේෂඥයින්ට භාරයි. එය ශ්‍රි ලංකාවේ පරමාධිපත්‍ය බලයේ තීරණයයි. රුසියාව සමඟ සහයෝගයෙන් කටයුතු කරනවාද නැතිනම් වෙනත් රටවල් සමඟ සහයෝගයෙන් කටයුතු කරනවාද යන්න තීරණය කළ හැක්කේ ශ්‍රී ලංකා රජයට පමණයි. අපි කිසිම බලපෑමක් කරන්නේ නැහැ. අපි උත්සාහ කරන්නේ ඒත්තු ගැන්වීමට පමණි. Rosatom State Atomic Energy Corporation න්‍යෂ්ඨික බලාගාර ඉදිකිරීම සම්බන්ධයෙන් ලොව ප්‍රමුඛයා බව අවධාරණය කළ යුතුයි. ඔබගේ අසල්වැසියන් සමඟ අපට ඉතා හොඳ සහයෝගීතාවයක් තිබෙනවා. පළමුවෙන්ම ඉන්දියාව සහ බංග්ලාදේශය සමඟ අපි අපේ සහයෝගිතාව ඉතා ප්‍රායෝගිකව ආරම්භ කළා.ඒ වගේම මියන්මාරය සමඟත් අපට ඉතා හොඳ සහයෝගයක් තිබෙනවා. බෙලාරුස්, හංගේරියාව, ඊජිප්තුව, තුර්කිය සහ ඉරානය සමඟ අප සහයෝගීතාවය ගොඩනගා තිබෙනවා. ඒ අනුව අපි තමයි නායකයෝ.

ප්‍රශ්නය: ඔබ බලාපොරොත්තු වන්නේ කුමන ආකාරයේ සහයෝගීතාවයක්ද? එය රුසියාව බංග්ලාදේශයේ සහ ඉන්දියාවේ ක්‍රියාත්මක කරමින් සිටින දෙයට සමාන මාදිලියක්ද?

රුසියානු තානාපති: එය විශේෂඥයින් අතර සිදුවන සාකච්ඡා මත රඳා පවතීවි. පළමුවෙන්ම, අපි අවශ්‍ය වාතාවරණය සහ අවශ්‍ය කොන්දේසි නිර්මාණය කළ යුතුය. ශ්‍රී ලංකාව අපගේ රුසියානු නියෝජිත පිරිසට පැමිණෙන ලෙස ආරාධනා කරනු ඇතැයි අපි බලාපොරොත්තු වෙනවා. රුසියාව සාකච්ඡා සඳහා සූදානම්.

ප්‍රශ්නය: මේ මොහොතේ ද්විපාර්ශ්වික සාකච්ඡා නැමැති විෂයෙහි ප්‍රධාන අංගය එයද?

රුසියානු තානාපති :ඔව්! ජාත්‍යන්තර ගිවිසුම්වලට සම්බන්ධ වීමට අදාළ ගිවිසුම් අත්සන් කළ යුතු නිසා "පන්දුව ශ්‍රී ලංකාවේ" අතේ ඇති බව මම මගේ එක් පුවත්පත් සාකච්ඡාවකදී ප්‍රකාශ කළා. එනම් භෞතික ආරක්ෂාව සහ තවත් සමහරක් ආරක්ෂක කටයුතු සම්බන්ධයෙනුයි මම එලෙස  අදහස් දැක්වූවේ. මම මතු කළ කාරනා මේ සංවිධානයේ ඉන්න අපේ සගයන් වගේම විදේශ ඇමැතිවරුත් දන්නවා.වියානාහි තිබෙන IAEA (ජාත්‍යන්තර පරමාණුක බලශක්ති නියෝජිතායතනය) සමඟ ශ්‍රී ලංකාව  ප්‍රයෝජනවත් සහයෝගිතාවක් පවත්වාගෙන යාම ඉතාමත්ම වැදගත් වෙනවා.

ප්‍රශ්නය : ශ්‍රී ලංකාව "ගෝලීය දකුණ" තුළ යම් ආකාරයක ක්‍රියාකාරී භූමිකාවක් ඉටු කිරීමට උත්සාහ කරනවා. ශ්‍රි ලංකාවේ ජනාධිපතිවරයා පවසන්නේ විදේශ ප්‍රතිපත්තිය පැහැදිලිවම ආසියාව කේන්ද්‍ර කරගත් එකක් බවයි. ඒ අනුව, රුසියාව මෙම තත්වය සැබවින්ම දකින්නේ කෙසේද?

රුසියානු තානාපති :මේ සම්බන්ධයෙන් අපගේ දැක්ම ඉතාම ධනාත්මක වන්නේ ශ්‍රී ලංකාව ඓතිහාසික වශයෙන් අපගේ මිත්‍ර රටවලින් එකක් වන නිසයි. ශ්‍රී ලංකාව සමඟ අපට කිසිදා ප්‍රශ්න ඇති වී නැහැ. බොහෝ ශ්‍රී ලාංකිකයන් රුසියානු සහ පැරණි සෝවියට් විශ්වවිද්‍යාලවලින් උපාධි ලබාගෙන තිබෙනවා. ඒ සම්බන්ධයෙන් අපිට හරිම ආඩම්බරයි. ඒ වගේම රුසියානු උපාධිධාරින් මේ වන විට ඉතා වැදගත් තනතුරු දරනවා. සමහරු රාජ්‍ය ආයතනවල සහ තවත් සමහරු පෞද්ගලික ව්‍යාපාරවල. රුසියාව සහ ශ්‍රී ලංකාව අතර ද්විපාර්ශ්වික සබඳතා තවදුරටත් වර්ධනය කර ගැනීම සඳහා ඒ අය බෙහෙවින් උපකාරී වේවි.  නැවත වතාවක් යුක්‍රේනය  සම්බන්ධ ගැටළුව සැලකිල්ලට ගතහොත්, ශ්‍රී ලංකාව මෙන්ම ගෝලීය දකුණේ ප්‍රධාන කොටසක් මධ්‍යස්ථ සහ සමබර ස්ථාවරයක් අනුගමනය කිරීම අපි ඉතා අගය කරනව. රුසියාවට එරෙහි සම්බාධකවලට කොළඹ එකතු නොවුණේ එවැනි සම්බාධක ප්‍රතිවිපාක ගෙන දෙන බැවිනුයි. මධ්‍යස්ථ, සමබර ස්ථාවරයන් අනුගමනය කරන සමහර රටවල් රුසියාවට එරෙහිව සම්බාධකවලට සම්බන්ධ වන්නේ නැහැ.

ප්‍රශ්නය : ඇත්තටම දෙරටේ ජනාධිපතිවරුන් හමුවීමට හැකියාවක් තිබෙනවාද?

රුසියානු තානාපති :පසුගිය දා චීනයේ එක් තීරයක් එක් මාවතක් (Belt and Road Initiatives) සමුළුව අතරතුර හොඳ අවස්ථාවක් තිබුණා. එහෙත් මා දන්න තරමින්  ඔවුන් දෙදෙනා එකිනෙකාට අතට අත දුන්නා පමණයි. එයට හේතුව ලෙස මම දකින්නේ  ජනාධිපතිවරු දෙදෙනාම  කළින් යොදාගත් වැඩසටහන් වල නිරත වී සිටීම නිසා එලෙස සිදු වූ බවයි. මම බලාපොරොත්තු වෙනවා, ඊළඟ වතාවේ ඔවුන් සමහර විට ජාත්‍යන්තර රැස්වීමකදී හමුවූ විට එසේ සිදුවේවි. ඔබ දන්නවා රුසියාව BRICS සංවිධානයේ වත්මන් සභාපතිත්වය දරන්නේ රුසියාව බව. BRICS සංවිධානය තවත් විශාල වී තිබෙනවා. බොහෝ රටවල් BRICS හා සම්බන්ධ වී තිබෙනවා. සෞදි අරාබිය, එක්සත් අරාබි එමීර් රාජ්‍යය, ඉතියෝපියාව සහ ඊජිප්තුව එම රටවල් අතර සිටිනවා.

ප්‍රශ්නය: ශ්‍රී ලංකාව ද BRICS හා සම්බන්ධ වීමට කැමැත්තෙන් සිටින බව නිවේදනය කර තිබෙනවා. ඒ සම්බන්ධයෙන් ඔබගේ දැක්ම කුමක්ද?

රුසියානු තානාපති :මම එහි කිසිම ගැටලුවක් දකින්නේ නැහැ. ශ්‍රී ලංකාව යම් නිර්ණායක සපුරාලිය යුතුය. නමුත් එය ශ්‍රී ලංකාවට ප්‍රශ්නයක් නොවන බව මම විශ්වාශ කරනවා. ශ්‍රී ලංකාව සියලුම සාමාජික රටවල් සමඟ මිත්‍ර සබඳතා පවත්වනවා. BRICS ඉතා ජනප්‍රිය ජාත්‍යන්තර සංවිධානයක් බවට පත්ව තිබෙනවා. අපි අපගේ ආර්ථිකයන් ඒකාබද්ධ කිරීම සහ බොහෝ ක්ෂේත්‍රවල අපගේ සහයෝගීතාවය  දිගටම පවත්වාගෙනයාම කරගෙන යනු ලබනවා. සංවිධානය චීනය, ඉන්දියාව සහ දකුණු අප්‍රිකාව වැනි බලවත් රටවල් රාශියක් ගොනු වී සිටිනවා.

ප්‍රශ්නය : රුසියාව ශ්‍රී ලංකාව සමඟ සහයෝගයෙන් කටයුතු කරයි කියා ඔබ විශ්වාස කරනවාද?

රුසියානු තානාපති :ඇත්ත වශයෙන්ම. ෂැංහයි සහයෝගිතා සංවිධානය තුළ ශ්‍රී ලංකාවේ වඩාත් ක්‍රියාකාරී භූමිකාවක් අපි අපේක්ෂා කරනවා.  ශ්‍රී ලංකාව දැනට IORA (Indian Ocean Rim Association) හි සභාපතිත්වය දරනවා. රුසියාව එහි සංවාද හවුල්කාර රටක් ලෙස කටයුතු කරනවා. ඒ වගේම මෙම සංවිධානයේ සමහර රැස්වීම් සහ සමහර සැසි පැවැත්වෙනවා.රුසියාවේ නියෝජිතයින් ඒවාට සහභාගී වීමට සූදානම්. පසුගිය ඔක්තෝම්බර් මාසයේදී එම සංවිධානයේ අමාත්‍ය මණ්ඩල රැස්වීමක් තිබුණා.

ප්‍රශ්නය: ඔබේ අදහසට අනුව රුසියාව-යුක්රේන යුද්ධය කොපමණ කාලයක් ඇදී යනු ඇත්ද?

රුසියානු තානාපති :රුසියාව සතු හැකියාව යුක්රේනය  සමඟ සැසඳිය නොහැකි නිසා එලෙස කාල වකවානු පැවසීම අපහසු බව ඔබ දන්නවා. ඔවුන් තවමත් ප්‍රතිවිරෝධයක් දක්වන්නේ බටහිර රටවලින් ලැබෙන උදව්වලට පින්සිදු වන්නටය.නමුත් යුක්‍රේනයේ, හැකියාව අවසන් වෙමින් පවතින බව අවධාරණය කරනවා. ඇමරිකානුවන්ට වලට මැතිවරණ මුහුණ දෙන්නට තිබෙනවා. යුරෝපීයයන් විශාල ආර්ථික ගැටලු වලට මුහුණදී තිබෙනවා. ජර්මනියේ සිදුවන දේ බලන්න! ගොවීන්ගේ විරෝධතා, දුම්රිය සේවකයන්ගේ වැඩ වර්ජන .යුරෝපා වැසියන්  ඇතිවී තිබෙන තත්වයෙන් හෙම්බත් වෙලා ඉන්නේ. යුරෝපා වැසියන් යුක්රේනයේ රූකඩ, බංකොලොත් සහ දූෂිත පාලනය වෙනුවෙන් විශාල මුදලක් වැය කරනවා. බටහිර රටවල් දැන් මැදපෙරදිග අර්බුදය වැනි වෙනත් ප්‍රශ්නවලට යොමු වී තිබෙනවා. ඔව් එය අර්බුදයක්. ප්‍රධාන ප්‍රශ්නය වන්නේ දශක ගණනාවක් තිස්සේ පලස්තීනුවන්ට තමන්ගේම රටක ජිවත් වීමේ අයිතිය අහිමි වීමයි.

නැගෙනහිර ජෙරුසලමේ අගනුවර කේන්ද්‍ර කරගෙන 1967 ඇති කළ දේශසීමාව තුළ ඔවුන්ට ඔවුන්ගේම රටක් තිබිය යුතුය. නමුත් දැන් ඔවුන්ට එය අහිමි වෙලා. ගැටුමේ මූලය ඇත්තේ එතැනයි..

පරිවර්තනය - ජීවන්ත ජයතිස්ස

https://www.dailymirror.lk/opinion/Russia-wants-Sri-Lanka-to-maintain-neutrality-on-Ukraine-despite-Western-Pressure-Ambassador-Levan-Dzhagaryan/231-275441