ක්‍රිෂ් සමාගමේ ප්‍රධානීන්ට වරෙන්තු ප්‍රතික්ෂේපයි.. ඒත් අත්අඩංගුවට ගන්න බාධාවක් නෑ.. – මහේස්ත්‍රාත්

Oct 3, 2026 at 07:48 AM

|

Lanka Leader

ආන්දෝලනාත්මක ක්‍රිෂ් ව්‍යාපෘති ගනුදෙනුවට අදාළ විමර්ශන සඳහා ‘ක්‍රිෂ් ට්‍රාන්ස්වර්ක්ස්’ පුද්ගලික සමාගමේ අධ්‍යක්ෂවරුන් වන ඉන්දීය ජාතික අමිත් කට්ටයාර් සහ රාජේන්ද්‍ර ප්‍රසාද් ගුප්තා යන අයට වරෙන්තු නිකුත් කරන ලෙස අල්ලස් හෝ දූෂණ විමර්ශන කොමිසම කළ ඉල්ලීම කොළඹ ප්‍රධාන මහේස්ත්‍රාත් අසංග එස්. බෝදරගම මහතා විසින් ප්‍රතික්ෂේප කර තිබේ. අධිකරණය හමුවේ කරුණු දක්වමින් මහේස්ත්‍රාත්වරයා පෙන්වා දුන්නේ අදාළ සැකකරුවන්ට වරෙන්තු නිකුත් කිරීමට තරම් ප්‍රමාණවත් හා සනාථ කළ හැකි සාක්ෂි ඉදිරිපත් වී නොමැති බවයි.

ලිපි ලේඛන මත පදනම් වූ කරුණු පමණක් සලකා මෙවැනි වරෙන්තුවක් නිකුත් කළ නොහැකි අතර, සිද්ධියට අදාළ ප්‍රමාණවත් සාක්ෂි විමර්ශන නිලධාරියා විසින් 'බී' වාර්තාවක් මගින් අධිකරණයට තහවුරු කළ යුතු බව උසාවිය වැඩිදුරටත් අවධාරණය කළේය.

අල්ලස් කොමිසමේ සහකාර නීති අධ්‍යක්ෂවරයාගේ මෙහෙයවීම යටතේ විවෘත අධිකරණයේ සාක්ෂි දුන් විමර්ශන නිලධාරියා සඳහන් කළේ, මෙම ගනුදෙනුවට අදාළව නිමල් හේමසිරි පෙරේරා නමැත්තා විසින් ක්‍රිෂ් ට්‍රාන්ස්වර්ක්ස් ගිණුම හරහා අවස්ථා කිහිපයකදී රුපියල් මිලියන 70 ක අල්ලස් මුදලක් නඩුවේ සිව්වැනි සැකකරු වන පාර්ලිමේන්තු මන්ත්‍රී නාමල් රාජපක්ෂ මහතා වෙත ලබා දී ඇති බවයි. මෙම සිදුවීමට අදාළව ප්‍රකාශ සටහන් කරගැනීම සඳහා සමාගම් රෙජිස්ට්‍රාර් කාර්යාලයෙන් තොරතුරු ලබාගෙන, සමාගමේ සභාපති හා අධ්‍යක්ෂ අමිත් කට්ටයාර් සහ විධායක නිලධාරී හා අධ්‍යක්ෂ රාජේන්ද්‍ර ප්‍රසාද් ගුප්තා යන අයට ගුවන් තැපෑල මගින් කැඳවීම් ලිපි යොමු කළද මේ දක්වා ඊට කිසිදු ප්‍රතිචාරයක් ලැබී නොමැති බවද විමර්ශන නිලධාරියා පැවසීය.

මහේස්ත්‍රාත්වරයා නැගූ ප්‍රශ්න හමුවේ කරුණු දැක්වූ විමර්ශන නිලධාරියා, අදාළ සමාගම 2012 සැප්තැම්බර් 09 වන දින මෙරට ලියාපදිංචි කර ඇති බවත්, පෞද්ගලික බැංකුවක 'Krrish Transworks Colombo Panel' නමින් ගිණුමක් පවත්වාගෙන ගොස් ඇති බවත් ප්‍රකාශ කළේය. කෙසේ වෙතත් එම බැංකු ගිණුමට අදාළ බලයලත් ලිපි ලේඛන මෙතෙක් සොයාගෙන නොමැති අතර, බැංකුව ලබාදුන් වාර්තාවක් පදනම් කරගනිමින් පරීක්ෂණ පවත්වන බවට නිලධාරියා පිළිගත්තේය.

ඉදිරිපත් වූ කරුණු සලකා බැලූ ප්‍රධාන මහේස්ත්‍රාත් අසංග එස්. බෝදරගම මහතා සිය නියෝගය ප්‍රකාශයට පත් කරමින් කියා සිටියේ, 2026/09/24 දින ඉදිරිපත් කළ 'බී' වාර්තාවෙන් වරෙන්තු ඉල්ලා ඇති පුද්ගලයන් ශ්‍රී ලාංකිකයන් නොවන බවත් ඔවුන් ඉන්දියාවේ පදිංචිකරුවන් බවත්ය. වරෙන්තු නිකුත් කිරීමට පෙර ඔවුන් සම්බන්ධයෙන් පැහැදිලි හා ප්‍රමාණවත් සාක්ෂි ඉදිරිපත් විය යුතු නමුත් මෙම වාර්තාවේ ඇති සාක්ෂි ඊට ප්‍රමාණවත් නොවන බවත්, ක්‍රිෂ් ට්‍රාන්ස්වර්ක්ස් ආයතනයේ අධ්‍යක්ෂවරුන් දෙදෙනාගෙන් ප්‍රකාශ සටහන් කරගැනීමට අවශ්‍ය නම් වරෙන්තුවක් නොමැතිව වුවද ඔවුන්ව අත්අඩංගුවට ගැනීමේ හැකියාව අල්ලස් කොමිසමට පවතින බැවින් මෙම මොහොතේ වරෙන්තු නිකුත් කිරීමේ ඉල්ලීම ප්‍රතික්ෂේප කරන බවත් මහේස්ත්‍රාත්වරයා සඳහන් කළේය.

2012 වසරේදී කොළඹ කොටුවේ ඓතිහාසික 'ට්‍රාන්ස්වර්ක්ස්' ගොඩනැගිල්ල පිටුපස පිහිටි අක්කර 4.3 ක භූමි භාගයක සුපිරි මහල් නිවාස, හෝටල් සහ සාප්පු සංකීර්ණයක් ඉදිකිරීම සඳහා ඉන්දියාවේ ක්‍රිෂ් සමූහය සමඟ මෙරට රජය ගිවිසුම්ගත වී තිබුණි. මෙම ව්‍යාපෘතිය ආරම්භ කිරීමේදී 'කාල්ටන් සුපර් සෙවන්ස්' රග්බි තරගාවලියට අනුග්‍රහය දැක්වීමේ මුවාවෙන් ක්‍රිෂ් සමාගමෙන් ලබාගත් බව කියන රුපියල් මිලියන 70 ක මුදලක් නීතිවිරෝධී ලෙස පරිහරණය කිරීම සහ මුදල් විශුද්ධිකරණය සිදුකිරීම සම්බන්ධයෙන් පාර්ලිමේන්තු මන්ත්‍රී නාමල් රාජපක්ෂ මහතා ඇතුළු පාර්ශ්ව කිහිපයකට එරෙහිව චෝදනා එල්ල විය. මූල්‍ය අපරාධ විමර්ශන කොට්ඨාසය මගින් සිදුකළ දීර්ඝ විමර්ශනවලින් අනතුරුව 2016 වසරේදී නාමල් රාජපක්ෂ මහතා අත්අඩංගුවට පත්ව පසුව ඇප මත මුදාහැරුණි.   

මෙම සිදුවීම මුදල් විශුද්ධිකරණයට අමතරව අල්ලස් ලබාගැනීමක් ලෙසද සැකකෙරෙන බැවින්, ව්‍යාපාරික නිමල් පෙරේරා ඇතුළු අතරමැදියන් හරහා සිදු වූ බව කියන මුදල් හුවමාරුව පිළිබඳව අල්ලස් හෝ දූෂණ විමර්ශන කොමිසම මගින් මෙම නඩුව වෙනම මෙහෙයවනු ලබයි. ක්‍රිෂ් සමාගමේ සභාපති අමිත් කට්ටයාර් ඉන්දියාව තුළද විවිධ මූල්‍ය අක්‍රමිකතා සහ මුදල් විශුද්ධිකරණ චෝදනා සම්බන්ධයෙන් එරට බලාත්මක කිරීමේ අධ්‍යක්ෂ මණ්ඩලයේ (Enforcement Directorate) දැඩි නිරීක්ෂණයට හා පරීක්ෂණවලට ලක්වූ ඉන්දීය ව්‍යාපාරිකයෙකි.