මාලිමා ඩෝබිවරු මාව හිරේ අරින්න වහසි බස් දෙඩුවත් නඩු දෙකෙන්ම මාව නිදොස් කොට නිදහස් කළා.. – උදය ගම්මන්පිල

Oct 1, 2026 at 08:15 AM

|

Lanka Leader

දේශපාලන ප්‍රතිවාදීන් විසින් තමන්ව පීඩාවට පත් කිරීමේ අරමුණින් එකම සිදුවීමට අදාළව නඩු දෙකක් පැවරූ බවත්, එම නඩු දෙකෙන්ම තමන් නිදොස් කොට නිදහස් වූ බවත් හිටපු අමාත්‍‍ය උදය ගම්මන්පිල මහතා පවසයි.

ඔස්ට්‍රේලියානු ජාතික ව්‍යාපාරිකයෙකුට අයත් සමාගම් කොටස් අයුතු ලෙස පරිහරණය කරමින් රුපියල් මිලියන 21ක සාපරාධී විශ්වාසය කඩකළ බවට චෝදනා කරමින් ගොනුකර තිබූ දෙවැනි නඩුවෙන්ද නිදොස් කොට නිදහස් වීමෙන් අනතුරුව මාධ්‍ය වෙත අදහස් දක්වමින් ඔහු මෙසේ සඳහන් කළේය.

"කූට ඇටර්නි බලපත්‍රයක් භාවිත කරලා කොටස් විකිණීමක් පිළිබඳව තිබුණු දෙවැනි නඩුවෙනුත් අද දින මාව නිදොස්කොට නිදහස් කළා. මේ සම්බන්ධයෙන් නඩු දෙකක් වුණේ එකම නඩුව දෙකට කඩලා මාව පීඩාවට පත්කිරීමේ අරමුණින් තමයි නඩු දෙකක් ගොනුකරලා තිබුණේ. පහුගිය කාලේ මාලිමා ඩෝබි බලකාය මේ නඩුවෙන් මාව හිරේ දානවා කියලා සමාජ මාධ්‍ය පුරා වහසි බස් දොඩලා තිබුණා. නමුත් අවසානයේදී යුක්තිය ජයගත්තා.   

මගේ වසර 27ක දේශපාලන ජීවිතය පුරාවට හොරකමක්, මැරකමක්, සල්ලාලකමක් පිළිබඳව මට සතුරෙක්වත් චෝදනා නඟලා තිබුණේ නෑ. ඒ නිසා තමයි මට එරෙහිව පැමිණීල්ලක් කරන්න කිසිවෙක් ලංකාවෙන් සොයාගන්න බැරිව, ඔස්ට්‍රේලියානු අධිකරණය ඉදිරියේ බංකොලොත්භාවය ප්‍රකාශයට පත්කරපු, වංචාවලට වැරදිකරු වුණු වයසක සීයා කෙනෙක්ව ලංකාවට ගෙනල්ලා පැමිණිල්ලක් කිරීමට මගේ විරුද්ධවාදීන්ට සිදුවුණේ.   

අද නඩු තීන්දුවෙදීම සඳහන් වුණු පරිදි ඔහු තමන්ගේ බිරිඳගේ අත්සන පවා හොරට ගහලා අධිකරණයේ වැරදිකරු බවට පත්වුණු වංචනිකයෙක්. මේක ද්වේශසහගත නඩු පැවරීමක් කියන එක අධිකරණය විසින්ම තීරණය කරලා තියෙන නිසා දේශපාලකයින්, සමහර පොලිස් නිලධාරීන්, සමහර නීතිපති දෙපාර්තමේන්තු නිලධාරීන් අල්ලාගෙන මේ නීතිය අවභාවිත කරන ආකාරය රටට හෙළිකරන්න ‘මගේ අවනඩුව’ නමින් මම ඉදිරියේදී පොතක් ප්‍රසිද්ධ කරන්න බලාපොරොත්තු වෙනවා."