බදු බර නිසා විශේෂඥයින් ඇතුළු වෛද්‍යවරුන් 2,500කට වැඩි පිරිසක් රට හැර ගිහින්.. - GMOA වෙතින් හදිසි ඉල්ලීමක්

Sep 30, 2026 at 05:12 AM

|

Lanka Leader

පවතින පීඩාකාරී බදු ප්‍රතිපත්තිය හේතුවෙන් 2021/2022 වර්ෂයන්ගෙන් පසුව මෙරට විශේෂඥ වෛද්‍යවරුන් සහ වෛද්‍යවරුන් 2,500කට අධික පිරිසක් රට හැර ගොස් ඇති බවත්, වටිනා මානව සම්පත රැකගැනීම උදෙසා ඉදිරි අයවැය මඟින් වෘත්තිකයන් සුරකින සාධාරණ බදු ප්‍රතිපත්තියක් වහා ක්‍රියාත්මක කළ යුතු බවත් රජයේ වෛද්‍ය නිලධාරීන්ගේ සංගමය (GMOA) අවධාරණය කරයි. 

මාධ්‍ය නිවේදනයක් නිකුත් කරමින් එම සංගමයේ ලේකම් වෛද්‍ය යූ. කේ. බී. වරකගොඩ මහතා පෙන්වා දෙන්නේ, ව්‍යාපාරිකයන්ගේ ලාභය මත පමණක් බදු අයකරන පසුබිමක, සේවා නියුක්තිකයන්ගේ සමස්ත වැටුප මතම බදු අයකිරීම අතිශයින් අසාධාරණ බවයි.   

වෘත්තිකයන් සිය උපයන වැටුපෙන් 36%කට ආසන්න ප්‍රමාණයක් සෘජු බදු ලෙස ගෙවන අතරතුර විශාල වක්‍ර බදු බරකට ද මුහුණ දී සිටින බව පෙන්වා දෙන එම සංගමය, ප්‍රවාහන ඇතුළු දීමනා වසර ගණනාවකින් යාවත්කාලීන වී නොමැති අතර අමතර රාජකාරි හා නිවාඩු දින ගෙවීම්වලින් 1/3ක් කප්පාදු කර ඇති බව ද සඳහන් කරයි. 

මෑතකදී සිදු කළ සුළු බදු සංශෝධන පවතින ඉහළ ජීවන වියදම හමුවේ කිසිසේත්ම ප්‍රමාණවත් නොවන බව ඔවුන් වැඩිදුරටත් සඳහන් කරයි.

පසුගිය වසරේ සමස්ත බදු ආදායම රුපියල් බිලියන 5,400 ඉක්මවා ගොස් ඇති අතර, 2025 වසරේ උපයන විට ගෙවීමේ (PAYE) බදු ආදායම ද අපේක්ෂිත ප්‍රමාණයට වඩා 30%කට වඩා වැඩි වී ඇත. 

එම නිසා රටේ සමස්ත බදු ආදායමට හානියක් නොවන පරිදි වෘත්තිකයන් මත පැටවී ඇති බදු බර ලිහිල් කිරීම සඳහා වූ විශ්ලේෂණාත්මක යෝජනාවලියක් GMOA විසින් ජනාධිපතිවරයා වෙත ද ඉදිරිපත් කර තිබේ. 

අර්බුදකාරී අවස්ථාවේදී රට වෙනුවෙන් කැපවූ වෛද්‍යවරුන් ඇතුළු බුද්ධිමය ශ්‍රමය රට තුළ රඳවා ගැනීමට තිරසාර වැඩපිළිවෙලක් ක්‍රියාත්මක නොකළහොත්, අනාගතයේදී ශ්‍රී ලංකාව දැනුම් කාන්තාරයක් බවට පත්වීම වැළැක්විය නොහැකි බව ද එම සංගමය අවධාරණය කරයි.