රටේ දුප්පත්කම ගැන ආණ්ඩුව හැදු වාර්තාවේ බොරු දත්ත.. - සජිත්ගෙන් අනාවරණයක්..

Sep 29, 2026 at 05:03 PM

|

Lanka Leader

2026 සමාජ ආර්ථික දත්ත සම්බන්ධයෙන් රජය, මහ බැංකුව සහ ජන හා සංඛ්‍යාලේඛන දෙපාර්තමේන්තුව ඉදිරිපත් කළ වාර්තාවේ දුප්පත්කම සම්බන්ධයෙන් පැරණි දත්ත භාවිත කර ඇති බව විපක්ෂ නායක සජිත් ප්‍රේමදාස පවසයි.

විශේෂ ප්‍රකාශයක් සිදු කරමින් ඔහු සඳහන් කළේ, වාර්තාවේ ආර්ථික හා සාර්ව ආර්ථික දර්ශක සඳහා 2023, 2024 සහ 2025 වසරවල දත්ත භාවිත කර තිබුණද, සමාජ ආර්ථික තත්ත්වය, දුප්පත්කම, ගෘහ ආදායම් හා වියදම් ඇතුළු කරුණු සඳහා 2016 සහ 2019 වසරවල දත්ත භාවිත කර ඇති බවයි.

දුප්පත්කම, ආදායම් බෙදීයාම, ගෘහ ආදායම් හා වියදම්, පාරිභෝජන රටා සහ පෝෂණ තත්ත්වය සම්බන්ධයෙන් වත්මන් දත්ත ඉදිරිපත් නොකිරීම ගැටලු සහගත බවයි විපක්ෂ නායකවරයා පෙන්වා දෙන්නේ.

2026 වසරට අදාළ සමාජ ආර්ථික වාර්තාවක් සකස් කිරීමේදී දුප්පත්කම සම්බන්ධයෙන් පැරණි දත්ත භාවිත කර ඇත්තේ මන්දැයි ඔහු ප්‍රශ්න කළේය.

එමෙන්ම, නොවැම්බර් 12 වැනිදා ඉදිරිපත් කිරීමට නියමිත අයවැය සඳහාද මෙම දත්ත භාවිත කරන්නේදැයි විපක්ෂ නායකවරයා ප්‍රශ්න කරයි.

කෙසේ වෙතත්, ජන හා සංඛ්‍යාලේඛන දෙපාර්තමේන්තුවේ නිල තොරතුරු අනුව 2026 ජූලි මාසයේ ජාතික නිල දරිද්‍රතා රේඛාව පුද්ගලයෙකුට මසකට රුපියල් 17,679ක් ලෙස දැක්වේ.

එමෙන්ම එම දෙපාර්තමේන්තුව සඳහන් කරන්නේ ගෘහ ආදායම් හා වියදම් සමීක්ෂණය වසර තුනකට වරක් සිදු කරන බවයි.

විපක්ෂ නායක සජිත් ප්‍රේමදාස වැඩිදුරටත් සඳහන් කළේ, දුප්පත්කම සම්බන්ධයෙන් යාවත්කාලීන හා නිවැරදි දත්ත මත පදනම් වූ වාර්තාවක් අයවැය ඉදිරිපත් කිරීමට පෙර නිකුත් කළ යුතු බවයි.

දුප්පත්කම සම්බන්ධයෙන් පවතින තත්ත්වය නිවැරදිව හඳුනාගෙන ජනතාවට සත්‍ය තොරතුරු ලබාදීම සඳහා රජය, මහ බැංකුව සහ ජන හා සංඛ්‍යාලේඛන දෙපාර්තමේන්තුව පැහැදිලි කිරීමක් ලබාදිය යුතු බවද ඔහු ප්‍රකාශ කළේය.