නොරෝච්චෝලේ කෝටි ගණනක ඩීසල් වංචාවක් එළියට..

Sep 28, 2026 at 10:05 AM

|

Lanka Leader

නොරෝච්චෝල ලක්විජය ගල්අඟුරු බලාගාරයට ලබා දීමට නියමිතව තිබූ රුපියල් කෝටි ගණනක් වටිනා ඩීසල් තොගයක් බලාගාරය වෙත භාර නොදී සිදුකර ඇති මහා පරිමාණ මූල්‍ය අක්‍රමිකතාවයක් පිළිබඳව පුළුල් විමර්ශනයක් ආරම්භ කර ඇති බව ඉලෙක්ට්‍රිසිටි ජෙනරේෂන් ලංකා පුද්ගලික සමාගම පවසයි.

කොලොන්නාව සහ සපුගස්කන්ද ඉන්ධන ගබඩා පර්යන්තවලින් බලාගාරයේ භාවිතය සඳහා නිකුත් කළ ඩීසල් තොග මෙලෙස බලාගාර පරිශ්‍රයට ලැබී නොමැති බව අනාවරණය වී ඇත්තේ සිදුකළ අභ්‍යන්තර විගණනයකදීය. විගණන වාර්තාවලට අනුව පසුගිය දෙසැම්බර් මාසයේදී අවස්ථා දෙකකදී සහ ජනවාරි මාසයේදී අවස්ථා තුනකදී වශයෙන් රුපියල් ලක්ෂ 160 කට අධික වටිනාකමකින් යුත් ඉන්ධන තොග මෙලෙස අතුරුදන්ව තිබේ. බලාගාරයේ ජනන යන්ත්‍ර බිඳවැටීම් යථා තත්ත්වයට පත්කිරීමේදී මූලික පණගැන්වීම් සඳහා භාවිත කරන මෙම ඩීසල් රැගත් බවුසර් රථ බලාගාරයට පැමිණි බවට ව්‍යාජ ලේඛන සකසා ඇති බව ද අනාවරණය වී ඇත.

මෙම ජාවාරම ඉහළ නිලධාරීන් කිහිපදෙනෙකුගේ අනුදැනුම මත සංවිධානාත්මකව සිදුකර ඇති බවට සැකකෙරෙන අතර, එහි මූලික පියවරක් ලෙස චෝදනා එල්ල වූ ප්‍රධාන ගබඩා භාරකරු වහාම ක්‍රියාත්මක වන පරිදි තනතුරෙන් ඉවත් කර වෙනත් නිලධාරියෙකු යොදවා තිබේ. එමෙන්ම, විමර්ශන සඳහා බලාගාරයේ තිබූ අදාළ සියලු ලිපිගොනු සහ ලේඛන කොළඹ ප්‍රධාන කාර්යාලය වෙත ගෙන ගොස් ඇති අතර, විගණන නිලධාරීන්ගේ ආරක්ෂාව සඳහා ගිනිඅවි සහිත විදුලිබල මණ්ඩල ආරක්ෂක නිලධාරීන් යොදවා ඇත.

මීට අමතරව, භාවිතයට නොගෙන කල් ඉකුත් වීමට ඉඩහැර තිබූ රුපියල් ලක්ෂ ගණනක් වටිනා රසායනික ද්‍රව්‍ය තොගයක් සහ විනාශ කර දමන ලද තවත් රසායනික ද්‍රව්‍ය තොගයක් ද විගණන කණ්ඩායම විසින් සොයාගෙන තිබේ.

මෙම අක්‍රමිකතාව සම්බන්ධයෙන් ඉලෙක්ට්‍රිසිටි ජෙනරේෂන් ලංකා සමාගමේ විගණන නිලධාරීන් විසින් පුත්තලම පොලිස් විශේෂ අපරාධ විමර්ශන ඒකකය වෙත නිල වශයෙන් පැමිණිලි කර ඇති අතර, බලාගාරය ආරම්භ කළ දින සිට සිදුව ඇති බවට සැකකෙරෙන සෙසු අක්‍රමිකතා පිළිබඳව ද ලබන ඔක්තෝබර් 01 වැනිදා සිට පුළුල් විමර්ශනයක් ආරම්භ කිරීමට නියමිතය.