"ඔයා ගේ හැදුවෙ හොරකම් කරපු ධනයෙන්".. - ප්‍රසාද් සිරිවර්ධන ලාල්කාන්තගේ මූණටම කියයි..

Sep 26, 2026 at 09:56 AM

|

Lanka Leader

වත්මන් ආණ්ඩුව ජනතාව මුලා කරමින් සහ බොරුව මත පදනම් වෙමින් ආණ්ඩුක්‍රම ව්‍යවස්ථා සංශෝධන ගෙන ඒමට කටයුතු කරන බවට පාර්ලිමේන්තු මන්ත්‍රී ප්‍රසාද් සිරිවර්ධන චෝදනා කරයි.

පාර්ලිමේන්තුවේදී අදහස් දක්වමින් මන්ත්‍රීවරයා ප්‍රකාශ කළේ, අධිකරණයේ නඩු ප්‍රමාදය නැති කිරීමේ මුවාවෙන් ජ්‍යෙෂ්ඨ විනිසුරුවරුන්ගේ වයස් සීමාව දීර්ඝ කිරීමට උත්සාහ කළද එමගින් නඩු විසඳීමේ කාලය අඩු වන ආකාරය පිළිබඳව කිසිදු තර්කානුකූල හේතුවක් තහවුරු කිරීමට ආණ්ඩුව අසමත් වී ඇති බවයි.

මෙම සංශෝධනය සම්බන්ධයෙන් ශ්‍රී ලංකා නීතිඥ සංගමය, ජාත්‍යන්තර නීති සංවිධාන මෙන්ම විනිසුරුවරුන්ගෙන් කොටසක්ද විරෝධය පළ කර ඇති බව පෙන්වා දුන් මන්ත්‍රීවරයා, මහජන සංවාදයකින් තොරව අත්තනෝමතික ලෙස තම 159ක බහුතර බලය යොදාගනිමින් මෙය සම්මත කරගැනීමට දරන උත්සාහය නිසා අධිකරණ පද්ධතිය කෙරෙහි පවතින ජනතා විශ්වාසය පළුදු වන බව අවධාරණය කළේය.

එමෙන්ම, මෙවැනි අත්තනෝමතික ක්‍රියාමාර්ග හේතුවෙන් විදේශීය රටවල් සහ ආයෝජකයින් ශ්‍රී ලංකාවේ අධිකරණ පද්ධතිය කෙරෙහි සැක පහළ කරන බැවින් රටට ලැබෙන විදේශ ආයෝජන තවදුරටත් අඩාල විය හැකි බවද ඔහු සඳහන් කළේය. 

තවද, අධිකරණයේ තීන්දු තීරණ හා නඩු සම්බන්ධයෙන් ජනාධිපතිවරයා සිදුකරන ප්‍රකාශ හරහා අධිකරණ පද්ධතියට සෘජු බලපෑමක් වන බවට චෝදනා කළ මන්ත්‍රීවරයා, අධිකරණය සමඟ කරන මෙවැනි සෙල්ලම් වහා නතර කරන ලෙස ඉල්ලා සිටියේය.

මන්ත්‍රීවරයාගේ කතාව අතරතුරදී ආණ්ඩු පක්ෂයේ මැතිඇමතිවරුන්ගේ ධන උපාය මාර්ග සහ නිවාස ඉදිකිරීම් සම්බන්ධයෙන්ද පාර්ලිමේන්තුවේදී උණුසුම් වචන හුවමාරුවක් සිදු විය.