බාල ගල් අගුරුවල පාඩුව කෝටි 14,000යි.. - හර්ෂ ද සිල්වා

Sep 24, 2026 at 12:44 PM

|

Lanka Leader

ප්‍රමිතියෙන් තොර බාල ගල්අඟුරු භාවිතය හේතුවෙන් රටට රුපියල් කෝටි 1,400ක (රුපියල් බිලියන 14ක) දැවැන්ත පාඩුවක් සිදුව ඇති බව රජයේ මුදල් පිළිබඳ පාර්ලිමේන්තු කාරක සභාවේදී  හෙළිවූ බව එහි සභාපති, පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පාර්ලිමේන්තුවේදී අනාවරණය කලේය.

අපනයන කෘෂි කර්මාන්තය ප්‍රවර්ධනය (සංශෝධන) පනත් කෙටුම්පත පිළිබඳ දෙවැනි වර කියැවීමේ විවාදයට එක්වෙමින් මන්ත්‍රීවරයා මේ බව ප්‍රකාශ කර තිබේ.

එම වාර්තාවට අනුව, බාල ගල්අඟුරු ගැටලුව හේතුවෙන් විකල්ප වශයෙන් විදුලිය ලබා ගැනීමට සිදුවීම නිසා පමණක් රුපියල් කෝටි 800ක සෘජු පාඩුවක් සිදුව ඇති අතර, තවත් රුපියල් කෝටි 400ත් 600ත් අතර මුදලක වක්‍ර පාඩුවක් සිදුව ඇතැයි මන්ත්‍රීවරයා එහිදී පෙන්වා දී ඇත.

විදුලි ගාස්තු සම්බන්ධයෙන් රජයේ ප්‍රතිපත්තිය දැඩි විවේචනයට ලක්කළ ආචාර්ය හර්ෂ ද සිල්වා මහතා, විදුලි බිල සියයට 33කින් අඩු කරන බවට බලයට පත්වීමට පෙර ප්‍රකාශ කළ ද, වත්මන් ජනාධිපතිවරයා පත්වන විට රුපියල් 30ක්ව පැවති ඒකකයක සාමාන්‍ය මිල මේ වන විට රුපියල් 35 දක්වා ඉහළ ගොස් ඇති බවත්, ඒ අනුව සිදුව ඇත්තේ විදුලි බිල සියයට 17කින් වැඩිවීම බවත් සඳහන් කර තිබේ. එසේම රුපියල් 20කට එල්.එන්.ජී. (LNG) ලබාගෙන විදුලිය නිපදවන බව පැවසුව ද, මේ වන විට බලාගාර සම්පූර්ණයෙන්ම ධාවනය වන්නේ ඩීසල් මඟින් බව හෙතෙම චෝදනා කළේය.

වාහන ආනයනය මඟින් අයකර ගන්නා ලද දැවැන්ත බදු ආදායම රජය සතුව පවතින බැවින්, 2024 විදුලිබල පනතේ ප්‍රතිපාදන ප්‍රකාරව විදුලි බිල සියයට 30කින් අඩු කිරීමට අවශ්‍ය මූල්‍යමය ශක්තිය රජයට තිබෙන බවද මන්ත්‍රීවරයා පෙන්වා දී ඇත. එසේ වුවද, ජාත්‍යන්තර මූල්‍ය අරමුදලේ කොන්දේසි මත රජය එම සහනය ජනතාවට ලබාදීම ප්‍රතික්ෂේප කරමින් සිටින බවත්, සාර්ව ආර්ථික දර්ශක පෙන්වමින් පුරසාරම් දෙඩුවද මහපොළොවේ ජීවත්වන සාමාන්‍ය ජනතාවට සහ ව්‍යාපාරිකයන්ට මෙම අධික විදුලි බිල දරාගත නොහැකි මට්ටමක පවතින බවත් ආචාර්ය හර්ෂ ද සිල්වා මහතා වැඩිදුරටත් අවධාරණය කලේය.