ශ්‍රී ලංකා - නේටෝ සබඳතා ගැන රුසියාවේ ස්ථාවරය ශ්‍රී ලංකාවේ රුසියානු තානාපති පැහැදිලි කරයි..

Sep 23, 2026 at 05:44 AM

|

Lanka Leader

ශ්‍රී ලංකාව සහ නේටෝ (NATO) සංවිධානය අතර ආරක්ෂක සහයෝගීතාවයක් ගොඩනැගීම පිළිබඳව රුසියාවේ අදහස් විමසූ අවස්ථාවේදී, ශ්‍රී ලංකාවේ රුසියානු තානාපති ලෙවාන් ජගාරියන් මහතා සඳහන් කළේ එය ශ්‍රී ලංකාවේ ද්විපාර්ශ්වික කරුණක් වන බැවින් බටහිර රටවල් මෙන් රුසියාව ඊට බලපෑම් එල්ල නොකරන බවයි. 

ශ්‍රී ලංකාව නේටෝ සංවිධානය සමඟ සබඳතා පැවැත්වීම සම්බන්ධයෙන් රුසියාවේ යම් කණස්සල්ලක් පවතින්නේදැයි ‘ඩේලි මිරර්’ පුවත්පත සිදු කළ විමසීමකදී පිළිතුරු දෙමින් තානාපතිවරයා සඳහන් කළේ, “නැහැ, එය ඔබගේ ද්විපාර්ශ්වික කරුණක්. බටහිර රටවල් මෙන් අපි බලපෑම් එල්ල කරන්නේ නැහැ,” යනුවෙනි.

කැනඩාවේ වික්ටෝරියා නුවර පැවැති ආරක්ෂක මාණ්ඩලික ප්‍රධානීන්ගේ සමුළුව අතරතුරදී ශ්‍රී ලංකා ආරක්ෂක අමාත්‍යාංශයේ ලේකම් එයාර් වයිස් මාර්ෂල් (විශ්‍රාමික) සම්පත් තුයියකොන්තා මහතා සහ නේටෝ සභාපති අද්මිරාල් ජුසෙප්පේ කාවෝ ඩ්‍රැගෝන් මහතා අතර පැවැති සාකච්ඡාවකදී හමුදා ක්ෂේත්‍රය නවීකරණය කිරීම, සයිබර් ආරක්ෂණ සූදානම ඉහළ නැංවීම, නව තාක්ෂණය ලබා ගැනීම, නිරීක්ෂණ කටයුතු ප්‍රවර්ධනය සහ තොරතුරු හුවමාරු කරගැනීම පිළිබඳව දීර්ඝ ලෙස අවධානය යොමු විය. 

එමෙන්ම හදිසි අවස්ථාවන්හිදී ඩ්‍රෝන තාක්ෂණය භාවිත කිරීම ඇතුළු මානුෂීය සහන සහ ආපදා කළමනාකරණ සහයෝගීතාව තවදුරටත් පුළුල් කිරීමට ද මෙහිදී යෝජනා විය.

එහිදී ශ්‍රී ලංකා ආරක්ෂක ලේකම්වරයා නේටෝ සංවිධානයට ඇරයුම් කළේ දෙපාර්ශ්වය අතර පවතින දීර්ඝකාලීන සබඳතා තවදුරටත් ශක්තිමත් කරගන්නා ලෙසයි. 

යුක්‍රේන අර්බුදය මුල් කරගනිමින් නේටෝ සංවිධානය සහ රුසියාව අතර දැඩි උණුසුම්කාරී හා අර්බුදකාරී වාතාවරණයක් පවතින පසුබිමක රුසියානු තානාපතිවරයාගේ මෙම ප්‍රකාශය නිකුත් වීම කැපී පෙනෙන සිදුවීමකි.