අනෝජන් නිදහස් කරගන්න සෞදියට විශේෂ දූත පිරිසක් යැවීමට සාකච්ඡා..

Sep 22, 2026 at 04:55 AM

|

Lanka Leader

සෞදි අරාබියේදී මරණ දඬුවම නියම වී සිටින සිවරාසා අනෝජන් නිදහස් කරගැනීම සම්බන්ධයෙන් අදහස් දක්වමින් ආගමික සහ සංස්කෘතික කටයුතු නියෝජ්‍ය අමාත්‍ය මුනීර් මුලාෆර් පවසා සිටියේ අනෝජන්ගේ දෙමව්පියන් සහ ජනපති අනුර කුමාර දිසානායක අතර පැවැති හමුවේදී රාජ්‍යතාන්ත්‍රික මට්ටමින් දූත පිරිසක් යැවීම සම්බන්ධයෙන් පවා සාකච්ඡා වූ බවයි.

එමෙන්ම මෙම සාකච්ඡාවේ දී සෞදි පාලකයින් සමග ඇති පුද්ගලික සම්බන්ධකම් පාවිච්චි කිරීම පිළිබඳවත් කතා කළ බවයි නියෝජ්‍ය අමාත්‍යවරයා පවසා සිටියේ.

මෙම හමුවෙන් අනතුරුව සිය නිල ෆේස්බුක් ගිණුමේ සටහනක් තබමින් ජනාධිපතිවරයා වැඩිදුරටත් කියා සිටියේ සෞදි රජුගෙන් මේ පිළිබඳව සමාව ලබා දෙන ලෙස රාජ්‍යතාන්ත්‍රික මට්ටමින් ලිඛිතව ඉල්ලා සිටීමට පියවර ගන්නා බවයි.

එමෙන්ම, අභියාචනා ඉදිරිපත් කිරීම ඇතුළු විදේශ කටයුතු අමාත්‍යාංශය මගින් මේ වන විට නිල වශයෙන් ගෙන ඇති පියවර පිළිබඳව මෙහිදී ජනාධිපතිවරයා විසින් ඔහුගේ දෙමාපියන් දැනුවත් කර තිබේ.

මෙම හමුවෙන් අනතුරුව ඊට එක්වූ ආගමික සහ සංස්කෘතික කටයුතු නියෝජ්‍ය අමාත්‍ය මුනීර් මුලාෆර් කියා සිටියේ, සිවරාසා අනෝජන්ට, සෞදි අරාබියෙන් ලබාදුන් නඩු තීන්දුව අද පස්වරුවේ විදේශ කටයුතු අමාත්‍යංශයට ලැබෙනු ඇති බවයි.

මේ අතර අනෝජන් නිදහස් කර ගැනීම සම්බන්ධයෙන් සහාය ලබා ගැනීම සඳහා ඔහුගේ ඥාතීන් විපක්ෂ නායක සජිත් ප්‍රේමදාස ද විපක්ෂනායක කාර්යාලයේදී මුණගැසුණි.

මේ අතර, මෙම තරුණයා වෙනුවෙන් ලබා දී තිබෙන දඬුවම අහෝසි කරන ලෙස ඉල්ලා ජාත්‍යන්තර මානව හිමිකම් සංවිධානයේ මැදිහත් වීමෙන් සෞදි තානාපති කාර්යාලයට අද ලිපියක් ද භාර දී තිබේ.

එවන් පසුබිමක සිවරාසා අනෝජන් නිදහස් කර ගැනීම සම්බන්ධයෙන් සාකච්ඡා කිරීම සඳහා ඔහුගේ මව්පියන් ඇතුළු ඥාතීන් මෙරට සෞදි තානාපති කාර්යාලය වෙත පැමිණියේය.

එමෙන්ම අනෝජන්ගේ ඥාතියෙකු සම්මුඛ සාකච්ඡාවකට එක්වෙමින් ප්‍රකාශ කළේ සිවරාසා අනෝජන්ගෙන් අද දිනයේදීත් දුරකථන ඇමතුමක් ලැබුණු බවයි.