අපි ප්‍රායෝගික බෞද්ධයින්.. අපි මාක්ස්වාදීන්.. පිදෙල් කස්ත්‍රෝලාගේ ආර්ථික දර්ශනය පිළිගන්නවා.. - මාලිමා මන්ත්‍රී අසිත නිරෝෂණ

Sep 21, 2026 at 05:12 AM

|

Lanka Leader

තමන් බුදුදහමේ මූලික හර පද්ධතීන් ජීවිතයට එක් කරගත් සැබෑ ප්‍රායෝගික බෞද්ධයන් බවත්, ඒ සමඟම මාක්ස්-ලෙනින්වාදී මතවාදය ප්‍රසිද්ධියේ පිළිගැනීමට කිසිසේත් නොපැකිලෙන බවත් ජාතික ජන බලවේගයේ පාර්ලිමේන්තු මන්ත්‍රී අසිත නිරෝෂණ මහතා ප්‍රකාශ කරයි.

ජනහමුවක් අමතමින් අදහස් දැක්වූ මන්ත්‍රීවරයා සඳහන් කළේ, තමන් පිටතින් ආගම තවරාගත් බෞද්ධයන් නොවන බවයි.

එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී අසිත නිරෝෂණ මහතා මෙසේද පැවසීය.

"අපි ප්‍රායෝගික බෞද්ධයෝ. ඇත්ත බුද්ධ දර්ශනයේ තියෙන හර පද්ධතීන් අපේ ජීවිතවලට එකතු කරගත්තු මිනිස්සු මිසක් ආගම තවරාගත්තු බෞද්ධයෝ නෙවෙයි. ඒ වගේම 'අපි මාක්ස්වාදීන්ද?' කියලා ඇහුවොත්, ඔව් අපි මාක්ස්වාදීන්. ඒක ප්‍රකාශ කරන්න අපි කිසිසේත්ම පැකිලෙන්නේ නැහැ. අපි මාක්ස්වාදීන් පමණක් නෙවෙයි, මාක්ස්-ලෙනින්වාදීන්.

එපමණක් නොව, 20 වැනි සියවසේ විසූ ශ්‍රේෂ්ඨ දේශපාලන චින්තකයන් වන චීනයේ මාඕ සේතුං, වියට්නාමයේ හෝචිමින් මෙන්ම කියුබාවේ ෆිදෙල් කැස්ත්‍රෝ වැනි විප්ලවීය නායකයන්ගේ, දාර්ශනිකයන්ගේ සහ ආර්ථික විද්වතුන්ගේ දර්ශනයන්ගෙන් අපි ආභාසය ලබා තිබෙනවා. එමෙන්ම ඉන්දියාවේ හිටපු ශ්‍රේෂ්ඨ ජනාධිපතිවරයෙකු වූ ආචාර්ය ඒ.පී.ජේ. අබ්දුල් කලාම්ගේ ජීවන ආදර්ශයන් මෙන්ම, මෙරට විසූ ආනන්ද කුමාරස්වාමි වැනි ශ්‍රේෂ්ඨ බුද්ධිමතුන්ගේ උසස් ගුණාංග ද අපගේ දේශපාලන ව්‍යාපාරයට මෙන්ම ජීවිතවලට ද එකතු කරගනිමින් කටයුතු කරන පිරිසක්."

කෙසේ වෙතත් මෙම ප්‍රකාශය පිළිබඳව සමාජ මාධ්‍ය තුළ මේ වන විට සංවාදයක් මතුවී ඇති අතර, එහිදී බොහෝ දෙනෙකු ප්‍රශ්න කරන්නේ මාක්ස් ලෙනින් වාදින් ප්‍රායෝගික බෞද්ධයෝ වන්නේ කෙසේද යන්නය.