මාලිමාවේ මන්ත්‍රී එළුවෙක් හොරකං කරලා උසාවියේ නඩුවක් තිබුනා...- රාමනාදන් අර්චුනා..

Sep 11, 2026 at 10:58 AM

|

Lanka Leader

ජාතික ජන බලවේගය නියෝජනය කරන උතුරේ පාර්ලිමේන්තු මන්ත්‍රීවරයෙකුට එරෙහිව ජංගම දුරකතනයක් සහ එළුවකු සොරකම් කිරීම සම්බන්ධයෙන් අධිකරණයේ නඩුවක් විභාග වෙමින් තිබූ බවත්, නව ආණ්ඩුව බලයට පත්වීමෙන් පසු එම නඩුව අවසන් කරගෙන ඇති බවත් යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන් අර්චුනා මහතා පාර්ලිමේන්තුව අමතමින් චෝදනාවක් එල්ල කළේය.

සභා ගර්භය අමතමින් මන්ත්‍රීවරයා සඳහන් කළේ, අදාළ මන්ත්‍රීවරයාට එරෙහිව ජංගම දුරකතනයක් සහ කුඩා එළුවකු සොරකම් කිරීමේ චෝදනා මත 2022 වසරේදී යාපනය අතිරේක මහේස්ත්‍රාත් අධිකරණය හමුවේ නඩුවක් පැවති බවයි.

කෙසේ වෙතත්, ඔහු පාර්ලිමේන්තු මන්ත්‍රීවරයෙකු ලෙස තේරී පත්වීමෙන් පසු ප්‍රධාන සාක්ෂිකරුවන් අධිකරණයට ඉදිරිපත් නොකර පොලිසිය මඟින් එම නඩුව ඉවත් කර ගැනීමට කටයුතු කර ඇති බවට හෙතෙම චෝදනා කළේය.

අවශ්‍ය නම් අදාළ නඩු අංක සහ අධිකරණ ලේඛන පාර්ලිමේන්තු කාරක සභාවක් හමුවේ ඉදිරිපත් කර මෙය සනාථ කිරීමට තමන් සූදානම් බව පැවසූ අර්චුනා මහතා, මෙය කිසිසේත්ම අසත්‍ය ප්‍රකාශයක් නොවන බවත්, අධිකරණයේ විභාග වී අවසන් වූ සත්‍ය නඩුවක් බවත් අවධාරණය කර සිටියේය.

කෙසේ වෙතත්, මෙම ප්‍රකාශයට සභාවේ සිටි මන්ත්‍රීවරුන්ගෙන් දැඩි විරෝධයක් එල්ල වූ අතර, මන්ත්‍රීවරුන්ගේ පෞද්ගලික චරිත ඝාතනය වන ආකාරයෙන් අසත්‍ය කරුණු ප්‍රකාශ නොකරන ලෙසත්, සභාව නොමඟ යැවීම සම්බන්ධයෙන් අර්චුනා මන්ත්‍රීවරයා වහාම සමාව ගත යුතු බවත් ඔවුහු පෙන්වා දුන්හ.

අදාළ චෝදනාව තරයේ ප්‍රතික්ෂේප කළ පාර්ශ්වයන් සඳහන් කළේ, පසුගිය පාලන සමයන්හිදී දේශපාලන පළිගැනීම් සහ අසත්‍ය චෝදනා මත ගොනු කළ නඩු පිළිබඳ සත්‍ය අසත්‍යතාව සොයා බැලිය යුතු බවත්, පාර්ලිමේන්තු වරප්‍රසාදවලට මුවා වී මෙවැනි පදනම් විරහිත ප්‍රකාශ සිදු කිරීම නුසුදුසු බවත්ය.

ඊට පිළිතුරු දෙමින් මන්ත්‍රී අර්චුනා රාමනාදන් මහතා යළිත් කියා සිටියේ, මේ සම්බන්ධයෙන් පාර්ලිමේන්තු කමිටුවක් පත් කරන්නේ නම් අදාළ නඩුවේ සහතික කළ පිටපත් ඉදිරිපත් කර තම ප්‍රකාශය ඔප්පු කිරීමට තමන් සූදානම් බවයි.