‘අපිට අවශ්‍ය තීන්දු නොදුන්නාත් තමුනුයි පුතයි හිරේ තමයි’ කියා අගවිනිසුරුව බ්ලැක්මේල් කරලා.. - ප්‍රසාද් සිරිවර්ධනගෙන් බරපතළ අනාවරණයක්..

Sep 11, 2026 at 07:13 AM

|

Lanka Leader

22 වැනි ආණ්ඩුක්‍රම ව්‍යවස්ථා සංශෝධනය හරහා අගවිනිසුරුවරයාගේ සේවා කාලය වසර දෙකකින් දීර්ඝ කිරීමට ආණ්ඩුව දරන උත්සාහය පිටුපස බරපතළ බ්ලැක්මේල් කිරීමක් පවතින බවට පාර්ලිමේන්තු මන්ත්‍රී ප්‍රසාද් සිරිවර්ධන මහතා පාර්ලිමේන්තුවේදී චෝදනා කළේය. 

අගවිනිසුරුවරයාට සහ ඔහුගේ පුත්‍රයාට එරෙහිව එල්ල වී ඇති චෝදනා අවියක් කරගනිමින්, ආණ්ඩුවට අවශ්‍ය නඩු තීන්දු ලබාගැනීමට මෙලෙස පීඩනය එල්ල කරන බවත්, එමඟින් අධිකරණයේ ස්වාධීනත්වය සම්පූර්ණයෙන්ම බිඳ වැටෙන බවත් මන්ත්‍රීවරයා පෙන්වා දුන්නේය. අගවිනිසුරුවරයා මෙවැනි සේවා දිගුවක් ඉල්ලා නොමැති අතර විනිසුරුවරුන් 65 දෙනෙකු ද මෙයට අකමැත්ත පළ කර තිබියදී ආණ්ඩුව මෙය බලහත්කාරයෙන් සිදු කිරීමට සැරසෙන බව ද ඔහු වැඩිදුරටත් අනාවරණය කළේය.

මන්ත්‍රී ප්‍රසාද් සිරිවර්ධන දැක්වූ අදහස්:

"වත්මන් අගවිනිසුරුවරයාට සහ ඔහුගේ පුත්‍රයාට එරෙහිව බරපතළ දූෂණ හා වංචා චෝදනා එල්ල වෙමින් තිබෙනවා. රජය සහ ජනාධිපතිවරයා මේ සූදානම් වන්නේ 22 වැනි ආණ්ඩුක්‍රම ව්‍යවස්ථා සංශෝධනය මඟින් අගවිනිසුරුවරයාගේ සේවා කාලය තවත් වසර දෙකකින් දිගු කිරීමටයි. අගවිනිසුරුවරයාව තවත් වසර දෙකක් තනතුරේ රඳවාගෙන, 'අපිට අවශ්‍ය නඩු තීන්දු දුන්නේ නැත්නම් තමුන්ටයි, පුතාටයි හිරේ තමයි ඉන්න වෙන්නේ' කියමින් ඔහුව බිත්තියට හේත්තු කර බ්ලැක්මේල් කිරීමේ නින්දිත උත්සාහයක් මෙතන තිබෙන්නේ. තමන්ට අවශ්‍ය නඩු තීන්දු ලබාගෙන, තමන්ට ඕනෑ කරන කතාව රට තුළ ස්ථාපිත කිරීමට නීතිය අතට ගැනීමේ මෙම උත්සාහය නිසා අධිකරණයේ ස්වාධීනත්වය මුළුමනින්ම බිඳ වැටෙනවා."