අධිකරණයට අපහාස කිරීමේ චෝදනාව ගැන දිලිත්ගේ රිට් පෙත්සම කැඳවයි..

Sep 10, 2026 at 04:55 PM

|

Lanka Leader

පාර්ලිමේන්තු මන්ත්‍රී දිලිත් ජයවීර මහතා රූපවාහිනී සම්මුඛ සාකච්ඡාවකදී කරන ලද ප්‍රකාශයක් මගින් බැලූ බැල්මට අධිකරණයට අපහාසයක් සිදුව ඇතැයි නිගමනය කරමින්, කොටුව මහේස්ත්‍රාන්වරයා විසින් අභියාචනාධිකරණය වෙත කරන ලද යොමු කිරීම අභියෝගයට ලක්කරමින් ගොනුකළ රිට් පෙත්සම අද (10) දින අභියාචනාධිකරණ සභාපති විනිසුරු රොහාන්ත අබේසූරිය සහ විනිසුරු ප්‍රියන්ත ප්‍රනාන්දු ඉදිරියේ කැඳවන ලදී.

එහිදී පෙත්සම්කාර දිලිත් ජයවීර මහතා වෙනුවෙන් පෙනී සිටි ජනාධිපති නීතිඥ අලි සබ්රි මහතා කරුණු දක්වමින් කියා සිටියේ, අදාළ යොමු කිරීම සිදුකර ඇත්තේ අපරාධ පරීක්ෂණ දෙපාර්තමේන්තුව (CID) විසින් මහේස්ත්‍රාත්වරයා වෙත ඉදිරිපත් කරන ලද අසම්පූර්ණ තොරතුරු පදනම් කරගෙන බවයි.

ප්‍රශ්නගත රූපවාහිනී සාකච්ඡාවේ කොටස් පමණක් උපුටා දක්වමින් පෙත්සම්කරු අධිකරණයට අපහාස කර බවට වන වැරදි අදහසක් ඇතිවන ආකාරයෙන් හිතාමතාම අපරාධ පරීක්ෂණ දෙපාර්තමේන්තුව විසින් තොරතුරු මහේස්ත්‍රාත්වරයා වෙත ඉදිරිපත් කර ඇති බවද වැඩි දුරටත් පැවසීය.

අදාළ සම්මුඛ සාකච්ඡාවේදී පෙත්සම්කරු විසින් අපරාධ පරීක්ෂණ දෙපාර්තමේන්තුවේ ක්‍රියාකලාපය විවේචනයට ලක්කිරීම කර ඇති බවත්, අධිකරණයට අපහාස කිරීමේ කිසිදු චේතනාවක් ඔහු තුළ නොතිබූ බවත් ජනාධිපති නීතිඥවරයා අවධාරණය කළේය.

අපරාධ පරීක්ෂණ දෙපාර්තමේන්තුව විසින් මහේස්ත්‍රාත්වරයා වෙත ඉදිරිපත් නොකළ, අදාළ සාකච්ඡාවේ සෙසු කොටස් පරිශීලනය කිරීමේදී ඒ බව මනාව පැහැදිලි වන බව ද හෙතෙම පෙන්වා දුන්නේය.

මෙම සිද්ධියට සම්බන්ධිත නඩු කටයුත්තක් එළඹෙන සැප්තැම්බර් මස 14 වනදා කැඳවීමට නියමිතව ඇති බැවින්, මෙම රිට් පෙත්සමද එදිනට කැඳවීමට අභියාචනාධිකරණ සභාපති විනිසුරුවරයා නියෝග කළේය.