නාමල් අත්අඩංගුවට ගැනීමෙන් ඔහු විපක්‍ෂයේ ලොකුම චරිතය වුණා..- නිර්මාල් රංජිත් දේවසිරි

Sep 9, 2026 at 02:21 PM

|

Lanka Leader

පාර්ලිමේන්තු මන්ත්‍රී නාමල් රාජපක්ෂ මහතා අත්අඩංගුවට ගැනීම සාමාන්‍ය නීතිමය ක්‍රියාවලියකට එහා ගිය සංකීර්ණ දේශපාලන තත්ත්වයක් නිර්මාණය කර ඇති බව ආචාර්ය නිර්මාල් රංජිත් දේවසිරි මහතා පවසයි. 

සිය යූ ටියුබ් නාලිකාව ඔස්සේ විශ්ලේෂණයක නිරත වෙමින් ඔහු පෙන්වා දෙන්නේ, මෙම සිදුවීම හරහා නොදැනුවත්වම මෙන් නාමල් රාජපක්ෂ මහතා විපක්ෂයේ ප්‍රධාන දේශපාලන ප්‍රතිවාදියා බවට පත්වීමේ ඉඩකඩ නිර්මාණය වී ඇති බවයි.

මෙම තත්ත්වය හේතුවෙන් ආණ්ඩුවට වඩා අර්බුදයකට මුහුණ දී සිටින්නේ විපක්ෂයේ සෙසු කණ්ඩායම් බවත්; සජිත් ප්‍රේමදාස, රනිල් වික්‍රමසිංහ, පාඨලී චම්පික රණවක සහ දිලිත් ජයවීර වැනි නායකයන්ගේ දේශපාලන භූමිකාව යටපත් වීමේ අවදානමක් මතුව ඇති බවත් ඔහු සඳහන් කරයි. මෙහි ප්‍රතිඵලයක් ලෙස විපක්ෂය තුළ අභ්‍යන්තර ගැටුම්කාරී තත්ත්වයක් ගොඩනැගෙමින් පවතින බවද ඔහු වැඩිදුරටත් පෙන්වා දෙයි.

ශ්‍රී ලංකාවේ දේශපාලන ඉතිහාසය දෙස බැලීමේදී මෙවැනි අත්අඩංගුවට ගැනීම් සහ සිරගත කිරීම් මගින් අදාළ දේශපාලනඥයන්ට මහජන අනුකම්පාව සහ දේශපාලන වාසි හිමිවූ අවස්ථා බහුල බවත්, 2015 යහපාලන ආණ්ඩු සමයේදී ද මෙවැනිම ප්‍රවණතාවයක් දක්නට ලැබුණු බවත් ආචාර්ය දේවසිරි මහතා මතක් කර දෙයි.

කෙසේ වෙතත්, මෙම සිදුවීම මාලිමා ආණ්ඩුවේ කඩාවැටීමට හේතුවනු ඇතැයි යන මතය ඔහු ප්‍රතික්ෂේප කරයි. සාමාන්‍ය ඡන්දදායකයන් ආණ්ඩුවක පැවැත්ම තීරණය කරන්නේ දේශපාලනඥයන්ගේ අත්අඩංගුවට ගැනීම් හෝ ආණ්ඩුක්‍රම ව්‍යවස්ථා සංශෝධන වැනි කරුණු මත නොව, දෛනික ජීවන වියදම, ආදායම් මාර්ග සහ ආර්ථික ස්ථාවරත්වය වැනි මූලික සාධක මත පදනම්ව බව ඔහු අවධාරණය කරයි. 

එමෙන්ම, විපක්ෂයෙන් විශ්වාසදායක සහ ඒකාබද්ධ විකල්ප බලවේගයක් ගොඩනැගෙන තෙක් මහජනතාව පහසුවෙන් ආණ්ඩුවෙන් ඉවත් නොවන බවද ඔහු වැඩිදුරටත් සඳහන් කරයි.