අයිස් කන්ටේනරය වැටලීම ගැන DIG රන්මල්ගෙන් ප්‍රකාශ ගනී..

Sep 9, 2026 at 10:31 AM

|

Lanka Leader

කොළඹ වරායේ බහලුමක තිබූ රුපියල් බිලියනයක් පමණ වටිනා අයිස් මත්ද්‍රව්‍ය තොගය වැටලීම සම්බන්ධයෙන් අපරාධ දිසාව භාර ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කුගෙන් පොලිස් විශේෂ විමර්ශන ඒකකය (08) අයිස් පැයක කාලයක් ප්‍රකාශ සටහන් කරගෙන තිබේ.

ඒ අදාළ වැටලීම සම්බන්ධයෙන් විමර්ශනයක් සිදුකරන ලෙසට පොලිස්පති ප්‍රියන්ත වීරසුරිය විසින් කළ නියෝගයකට අනුව ආරම්භ කර ඇති විමර්ශනයට අනුවය.

කොළඹ වරායේ බහලුම් අංගණයක තිබූ කන්ටේනරයක් තුළ තුවා තුළ සඟවා තිබූ අයිස් මත්ද්‍රව්‍ය කිලෝග්‍රෑම් 472 ක් සොයාගෙන තිබුණේ පොලිස් මධ්‍යම අපරාධ විමර්ශන කාර්යාංශයේ උප පොලිස් පරීක්ෂකවරයකුට ලද තොරතුරකට අනුවය.

එම නිලධාරියාට අදාළ කන්ටේනරය ගෙන්වූ දේශීය නියෝජිතයා, කන්ටේනරයේ සීරියල් අංකය, කන්ටේනරයේ ඇති මත්ද්‍රව්‍ය ප්‍රමාණය සම්බන්ධයෙන් තොරතුරු ලැබී තිබෙන අතර ඒ සම්බන්ධයෙන් අධිකරණයට කරුණු වාර්තා කර අධිකරණ අවසරය මත කොළඹ වරායේ තිබූ එම කන්ටේනරයේ මුද්‍රා බිඳ පරීක්ෂා කිරීමේදි මත්ද්‍රව්‍ය තොගය සොයාගෙන තිබිණි.

ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කගේ ඍජු අධීක්ෂණය යටතේ මධ්‍යම අපරාධ විමර්ශන කාර්යාංශයේ අධ්‍යක්ෂ ජ්‍යෙෂ්ඨ පොලිස් අධීකාරී කමල් ආරියවංශගේ මෙහෙයවීමෙන් එම කාර්යාංශයේ නිලධාරිහු එම විමර්ශනය සිදුකළහ.

මෙම තොරතුරම අපරාධ දිසාව භාර ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කුටද ලැබී තිබුණු අතර ඒ සම්බන්ධයෙන් විමර්ශන පොලිස් මත්ද්‍රව්‍ය නාශක කාර්යාංශය වෙත යොමුකර තිබුණද ඔවුන්ට ඒ සම්බන්ධයෙන් විමර්ශන සාර්ථක කිරීමට නොහැකි වී තිබිණි.

කෙසේ වෙතත් වැටලීම සිදුවූ ආකාරය වැරැදි බව කියමින් පොලිස්පතිවරයා විසින් ගොඩබිමෙන් සොයාගත් විශාලතම මත්ද්‍රව්‍ය තොගය වන මෙම වැටලූ නිලධාරීන්ට එරෙහිව පරීක්ෂණ ආරම්භ කර තිබීම හේතුවෙන් පොලිස් දෙපාර්තුමේන්තුව තුළ දැඩි විරෝධයක්ද පළවී ඇති බව පොලිස් ආරංචි මාර්ග කියා සිටිියි.

- එෆ්. අස්ලම්

(Aruna)