20ට අවශ්‍ය වූ ජනමත විචාරණය 22ට කැප නැත්තේ ඇයි?.. – සජිත් අසයි..

Sep 7, 2026 at 07:34 AM

|

Lanka Leader

විසිවැනි ආණ්ඩුක්‍රම ව්‍යවස්ථා සංශෝධනය සඳහා ජනමත විචාරණයක් අවශ්‍ය බවට එදා විපක්ෂයේ සිටි ජනාධිපති අනුර කුමාර දිසානායක ප්‍රකාශ කළේ නම්, අද ඉදිරිපත් කර ඇති 22 වැනි සංශෝධනය සඳහා ජනමත විචාරණයක් අවශ්‍ය නොවන්නේ ඇයි දැයි විපක්ෂ නායක සජිත් ප්‍රේමදාස ප්‍රශ්න කරයි.

ඔහු මේ බව සඳහන් කළේ, සමගි වනිතා බලවේගයේ රත්තොට ආසන බල මණ්ඩලය පිහිටුවීමේ රැස්වීමට එක්වෙමින්.

එහිදී විපක්ෂ නායකවරයා සඳහන් කළේ, එදා 20 වැනි ආණ්ඩුක්‍රම ව්‍යවස්ථා සංශෝධනය ගෙන ආ අවස්ථාවේ ජනමත විචාරණයක් අවශ්‍ය බවට ජනාධිපති අනුර කුමාර දිසානායක ප්‍රකාශ කළ බවයි.

එසේ නම්, අද 22 වැනි සංශෝධනය සම්බන්ධයෙන් ජනමත විචාරණයක් අවශ්‍ය නොවන බවට ආණ්ඩුවේ පාර්ශ්වයෙන් ප්‍රකාශ සිදුකරන්නේ කෙසේදැයි ඔහු ප්‍රශ්න කළේය.

මේ අතර ජනාධිපතිවරයා මේ දිනවල රට පුරා යමින් සිදුකරන වැඩසටහන් "පච චාරිකා" බවට විපක්ෂ නායකවරයා චෝදනා කරයි.

ජනතාවගේ සැබෑ හදගැස්ම හඳුනා ගැනීමට අවශ්‍ය නම් එවැනි චාරිකා වෙනුවට පළාත් සභා මැතිවරණය පවත්වන ලෙසද ඔහු ජනාධිපතිවරයාට අභියෝග කළේය.

ජනාධිපතිවරයාගේ බේරුවල පැවැත්වෙන රැස්වීම හේතුවෙන් මුහුදු ගිය ධීවරයන්ට බේරුවල වරායට පැමිණීමට බාධා වන ආකාරයේ පොලිස් නිවේදනයක් නිකුත් කර ඇති බවටද ජනතාවට හිරිහැරයක් නොවන ආකාරයෙන් රැස්වීමක් පැවැත්වීමට පවා ජනාධිපතිවරයාට නොහැකි වී ඇති බවයි ඔහු කියා සිටියේ.

ජනාධිපති අනුර කුමාර දිසානායක මහතා ප්‍රමුඛ වත්මන් ආණ්ඩුවේ ප්‍රධාන මූලධර්මය කෘරත්වය, හිංසනය සහ ජනතා අයිතිවාසිකම් කප්පාදු කිරීම බවටද විපක්ෂ නායකවරයා චෝදනා කළේය.

ජනතාවගේ දුක නිවාලීම වෙනුවට එය තවදුරටත් වර්ධනය කරමින් සිටින බවත්, මේ හේතුවෙන් මැතිවරණ සමයේ ලබාදුන් පොරොන්දු රජයට අමතක වී ඇති බවත් ඔහු සඳහන් කළේය.

ආණ්ඩුවේ දෙවසර සැමරුම්වල ප්‍රධාන තේමාව "අවුරුදු දෙකයි – රටට සුබයි" වුවද, එය ජනතාවට සුබදායක වී නොමැති බව විපක්ෂ නායකවරයා ප්‍රකාශ කළේය.

දිට්වා සුළි කුණාටුවෙන් අවතැන් වූ ජනතාවට ලබාදෙන බවට පොරොන්දු වූ සහන තවමත් නොලැබුණු බවත්, වරායෙන් ගොඩබාන මිලට ඉන්ධන ලබාදීම සහ විදුලි බිල සියයට 32කින් අඩු කිරීම වැනි පොරොන්දු ද ඉටු කර නොමැති බවත් ඔහු සඳහන් කළේය.