නාමල් අත්අඩංගුවට ගැනීම දේශපාලන පළිගැනීමක්.. ජන රැළිය නවත්වන්නේ නෑ.. - පොහොට්ටුවෙන් මාධ්‍ය නිවේදනයක්

Sep 6, 2026 at 05:13 AM

|

Lanka Leader

ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ අල්ලස් හෝ දූෂණ විමර්ශන කොමිෂන් සභාව මගින් අත්අඩංගුවට ගෙන රක්ෂිත බන්ධනාගාරගත කිරීම, ආණ්ඩුව විසින් ප්‍රජාතන්ත්‍රවාදී ප්‍රවාහයට එල්ල කළ දැඩි ප්‍රහාරයක් සහ දේශපාලන පළිගැනීමක් බව ශ්‍රී ලංකා පොදුජන පෙරමුණ පවසයි.

පක්ෂයේ මහලේකම්, නීතිඥ සාගර කාරියවසම්ගේ අත්සනින් යුතුව අද (05) නිකුත් කළ මාධ්‍ය නිවේදනයක් මගින් ඔවුන් සඳහන් කරන්නේ, එළඹෙන සැප්තැම්බර් 12 වැනිදා අනුරාධපුර නගරයේ පැවැත්වීමට සියලු කටයුතු යොදා තිබූ දැවැන්ත ජන රැළිය නාමල් රාජපක්ෂගේ මූලිකත්වයෙන් සංවිධානය වෙමින් තිබූ බවත්, එම ජන රැළියට ලැබෙමින් පැවති ඉහළ ජනප්‍රසාදය හමුවේ බියට පත් ආණ්ඩුව මෙම අත්අඩංගුවට ගැනීම සිදුකර ඇති බවයි.

අත්අඩංගුවට ගැනීමට පදනම් වී ඇත්තේ මීට පෙර අවස්ථා කිහිපයකදී පොලිසියට සහ අධිකරණයට පරස්පර ප්‍රකාශ ලබාදුන්, අපරාධ චෝදනා එල්ල වී ඇති පුද්ගලයෙකුගෙන් ඕස්ට්‍රේලියාවේදී ලබාගත් විශ්වාසනීයත්වයකින් තොර ප්‍රකාශයක් බව සඳහන් කරන ශ්‍රී ලංකා පොදුජන පෙරමුණ, නාමල් රාජපක්ෂට එරෙහි සියලු චෝදනා සම්පූර්ණයෙන් ප්‍රතික්ෂේප කරන බව සඳහන් කරයි.

තමන් බලයේ සිටියදී දූෂණ විරෝධී නීති සම්මත කළේ දූෂණය පිටුදැකීමට මිස, රාජ්‍ය ආයතන අවභාවිත කරමින් දේශපාලන ප්‍රතිවාදීන් මර්දනය කිරීමට නොවන බවද ඔවුන් නිකුත් කළ නිවේදනයේ සඳහන්.

කෙසේ වෙතත්, නායකයෙකු සිරගත කළද ඔහුගේ දර්ශනය සහ ජනතා බලවේගය මර්දනය කළ නොහැකි බව පවසන පොදුජන පෙරමුණ, සැප්තැම්බර් 12 වැනිදා පැවැත්වීමට නියමිත අනුරාධපුර මහ ජන රැළිය සැලසුම් කළ පරිදිම වඩාත් ශක්තිමත්ව පවත්වන බවත්, එබැවින් ආණ්ඩුවේ ප්‍රජාතන්ත්‍ර විරෝධී ක්‍රියාකලාපයට එරෙහිව සාමකාමීව හඬ නැගීම සඳහා සැප්තැම්බර් 12 වැනිදා අනුරාධපුරයට රැස්වන ලෙසත් එම නිවේදනය මගින් සඳහන් කර තිබේ.