උතුරු-නැගෙනහිර බෞද්ධ උරුමයන් විනාශ කිරීමේ සැලසුමක් ගැන චන්න ජයසුමනගෙන් අනාවරණයක්..

Sep 1, 2026 at 09:48 AM

|

Lanka Leader

ශ්‍රී ලංකාවේ උතුරු සහ නැගෙනහිර පළාත්වල පිහිටි බෞද්ධ පුරාවිද්‍යා උරුමයන් මකා දැමීම සඳහා නව මෙහෙයුමක් ක්‍රියාත්මක වන බවට මහාචාර්ය චන්න ජයසුමන මහතා චෝදනා කරයි.

සිය ෆේස්බුක් ගිණුමේ සටහනක් තබමින් ඔහු පෙන්වා දෙන්නේ, වසර 100කට අධික කාලයක් තිස්සේ ගැසට් නිවේදන මගින් ප්‍රකාශයට පත්කර තිබූ පුරාවිද්‍යා ස්ථාන බහුතරයක් "සමාලෝචනය කිරීම" යන නාමයෙන් ඉවත් කිරීමට සැරසෙන බවයි.

මේ සඳහා පුරාවිද්‍යා දෙපාර්තමේන්තුව අහෝසි කර, ඒ වෙනුවට "ජාතික උරුම දෙපාර්තමේන්තුවක්" බිහිකිරීමේ සුදානමක් පවතින බවද ඔහු සඳහන් කරයි.

වත්මන් ආණ්ඩුව බලයට පත් කිරීමට මෙන්ම පාලනය කිරීමටද මැදිහත්ව සිටින අන්තවාදී බලවේග විසින් මෙම ක්‍රියාවලිය මෙහෙයවන බවටද ඔහු වැඩිදුරටත් අදහස් දක්වා ඇත.

අදාළ සටහන පහළින්..

"ශ්‍රී ලංකාවේ උතුරු සහ නැගෙනහිර පළාත්වල බෞද්ධ පුරාවිද්‍යා උරුම මකා දැමීම සඳහා නවතම මෙහෙයුමක් දියත්ව ඇත. මේ යටතේ පුරාවිද්‍යා දෙපාර්තමේන්තුව අහෝසිකර ඒ වෙනුවට ඊනියා ජාතික උරුම දෙපාර්තමේන්තුවක් බිහිකර, වසර 100කට වැඩි කාලයක් තිස්සේ ක්‍රමානුකූලව පුරාවිද්‍යා ස්ථාන ලෙස ගැසට් මගින් ප්‍රකාශ කර තිබූ ස්ථාන බහුතරය "සමාලෝචනය කිරීම" නමින් හකුලා, ඉවත් කිරීමට සැරසෙන බව දැනගන්නට ඇත. ⁣

වත්මන් ආණ්ඩුව පත්කර ගැනීමට මෙන්ම හැසිරවීමට ද සක්‍රීයව මැදිහත්ව සිටින අන්තවාදී බලවේග මේ සඳහා කටයුතු කරන බව පෙනෙන්නට ඇත. යමක් මතුපිටන් පමණක් දකින, ආණ්ඩුවේ සුරංගනා කතා සහ බටර් ආලේපනවලට රැවටෙන අවිචාරවත් සිංහලයන්ට සිදුවන දෑ ගැන තේරැමක් ඇතැයි සිතිය නොහැකිය.

අප " ශ්‍රී ලංකාවේ උතුරු පළාතේ පෞරාණික බෞද්ධ උරුමය" නමින් කෘතියක් පළ කරන්නට කටයුතු යෙදුවේ ද මේ අවදානම කල්තියා දුටු හෙයිනි. 

එම පොත මේ දිනවල ලංකාවට පැමිණ සිටින විශ්‍රාමික මහාචාර්ය තමරා ද සිල්වා මැතිණියට පිළිගැන්වීම පසුගියදා සිදු කෙරිණි. ඒ මහත්මිය වසර 43 ක් ශ්‍රී ලංකාවේ ජාතික විශ්වවිද්‍යාල පද්ධතියේ සේවය කළ අතර කිහිප වතාවක් ශ්‍රී ජයවර්ධනපුර විශ්වවිද්‍යාලයේ ගණිත අධ්‍යයන අංශයේ අංශ ප්‍රධාන තනතුර ද දැරීය.

එතුමිය, යමක් මතුපිටින් පමණක් නොදැක විචක්ෂණශීලීව බැලීමට සිංහලයාට කියා දීමට මහත් වෙහෙසක් ගත් දිවංගත නලින් ද සිල්වා ආචාර්යතුමාගේ දයාබර බිරිඳයි."