විදුලි බිල වැඩිවීමේ අවදානමක්! - ඩී.වී. චානකගෙන් අනාවරණයක්..

Sep 1, 2026 at 08:11 AM

|

Lanka Leader

ඉදිරි කාලයේදී ප්‍රමාණවත් වර්ෂාපතනයක් නොලැබුණහොත් මෙරට විදුලි ගාස්තු නැවත වරක් ඉහළ යාමේ අවදානමක් පවතින බව ශ්‍රී ලංකා පොදුජන පෙරමුණේ ජාතික කැඳවුම්කරු, පාර්ලිමේන්තු මන්ත්‍රී ඩී.වී. චානක මහතා පවසයි. 

දෙරණ 360 වැඩසටහනට එක්වෙමින් මන්ත්‍රීවරයා සඳහන් කළේ පවතින රජය විදුලි ගාස්තු තුනෙන් එකකින් අඩු කරන බවට පොරොන්දු වුවද, මේ වන විට සිදුව ඇත්තේ ඊට හාත්පසින්ම වෙනස් ලෙස කලින් පැවැති මට්ටමට වඩා තුනෙන් එකකින් පමණ ගාස්තු වැඩි වීම බවයි.

පසුගිය සමයේ ලැබුණු අහඹු වර්ෂාපතනය නිසා ජල විදුලි උත්පාදනයට යම් සහනයක් ලැබුණු අතර, දහවල් කාලයේදී සූර්ය බලශක්තිය භාවිත කරමින් විදුලි පද්ධතිය යම් තාක් දුරට ස්ථාවරව පවත්වා ගැනීමට හැකි විය. නමුත් ඉදිරියේදී නැවතත් විදුලි ගාස්තු ඉහළ ගියහොත් එළඹෙන සංචාරක සමය හමුවේ සංචාරක කර්මාන්තයට මෙන්ම සාමාන්‍ය ජනතාවටද එය දරාගැනීමට නොහැකි වනු ඇති බවට ඔහු අවධාරණය කරයි.

මීට අමතරව, පසුගිය විදුලි ගාස්තු සංශෝධනයේදී ගල් අඟුරු පාඩුවෙන් ඇතුළත් කරනු ලැබුවේ සියයට 10ක පමණ ප්‍රමාණයක් බැවින්, අලුතින් ගල් අඟුරු නැව් පැමිණ ඒවායින් විදුලිය නිපදවන තෙක් එම පාඩුවෙන් මිදීමට නොහැකි වනු ඇත. එම අලාභය බදු මුදල් මගින් හෝ කෙළින්ම පාරිභෝගිකයාගෙන් අයකර ගැනීමට සිදුවන බව පෙන්වා දෙන මන්ත්‍රීවරයා, යම් හෙයකින් මෙම ගල් අඟුරු අක්‍රමිකතාව සිදු නොවූයේ නම් පවතින කාලගුණයත් සමග අධික පිරිවැයක් දැරීමට සිදුවන ෆර්නස් තෙල් හෝ ඩීසල් භාවිතයෙන් විදුලිය නිපදවීමේ අවශ්‍යතාවයක් මතු නොවන්නේ යැයිද වැඩිදුරටත් අදහස් දක්වමින් පැවසීය.