රේගු අංගනවල වසර 8ක් සිරවූ වාහන 437ක් විනාශ වෙයි.. රජයට විශාල ආදායමක් අහිමි වන ලකුණු!

Aug 30, 2026 at 05:16 AM

|

Lanka Leader

ශ්‍රී ලංකා රේගුව භාරයට ගන්නා ලද වාහන 437ක් වසර අටකට අධික කාලයක් තිස්සේ නිසි කළමනාකරණයකින් තොරව විවිධ අංගනවල රඳවා තැබීම නිසා ඒවා දැඩි ලෙස දිරාපත්ව ඇති බවත්, එමගින් රජයට ලැබීමට තිබූ විශාල වෙන්දේසි ආදායමක් අහිමි වී ඇති බවත් නවතම විගණන වාර්තාවකින් හෙළි වේ.

රේගු දෙපාර්තමේන්තුවේ 2025 වාර්ෂික කාර්යසාධන වාර්තාවට ඇතුළත් විගණන නිරීක්ෂණවලට අනුව, මෙසේ දීර්ඝ කාලයක් තිස්සේ එළිමහන් බිම්වල ගාල් කර තිබූ වාහනවලින් වැඩි ප්‍රමාණයක් මේ වන විට ධාවන තත්ත්වයෙන් සම්පූර්ණයෙන්ම බැහැර වී තිබේ.

මෙම වාහන 437 ප්‍රධාන ස්ථාන දෙකක රඳවා තබා ඇති අතර, ඉන් වාහන 329ක් රේගුව විසින් පෞද්ගලික සමාගමකින් ලබාගත් මට්ටක්කුලිය පරිශ්‍රයේද, ඉතිරි වාහන 108 හම්බන්තොට රුහුණුපුර ජාත්‍යන්තර වරාය භූමියේද ගාල් කර ඇත. වසර ගණනාවක් මුළුල්ලේ අව්වට සහ වැස්සට නිරාවරණය වීම හේතුවෙන් මේවායේ ලෝහ කොටස් විඛාදනය වී අභ්‍යන්තර උපාංග විනාශ වීමෙන් දැඩි භෞතික හානියක් සිදුව ඇති බව විගණන වාර්තාව පෙන්වා දෙයි.

රේගු ආඥා පනතේ 109 වන වගන්තියට අනුව භාරයට ගත් හෝ රාජසන්තක කළ භාණ්ඩ සම්බන්ධයෙන් නියමිත කාලසීමාවන් තුළ සුදුසු නීතිමය හා පරිපාලනමය ක්‍රියාමාර්ග ගැනීම අනිවාර්ය වේ. කෙසේ වෙතත්, අදාළ නීතිමය విධිවිධාන නිසි වේලාවට ක්‍රියාත්මක නොකිරීම නිසා මෙම වාහන සම්බන්ධයෙන් තීන්දු ගැනීම ප්‍රමාද වී ඇති අතර, එහි ප්‍රතිඵලයක් ලෙස රජයට ලැබීමට තිබූ සාධාරණ වෙන්දේසි ආදායම අහිමි වෙමින් පවතින බව ජාතික විගණන කාර්යාලය පෙන්වා දෙයි. එබැවින් අනාගතයේදී මෙවැනි අලාභයන් වළක්වා ගැනීමටත්, රාජ්‍ය ආදායම් සුරක්ෂිත කිරීමටත් කඩිනම් නීතිමය නිරවුල් කිරීම් සහ විනිවිදභාවයෙන් යුත් වෙන්දේසි ක්‍රියාවලියක් හඳුන්වා දීමේ අවශ්‍යතාව ද විගණන වාර්තාව මගින් අවධාරණය කර ඇත.