අගවිනිසුරුගේ වත්කම් සහ X-Press Pearl වන්දිය ගැන අල්ලස් කොමිසමට පැමිණිල්ලක්..

Aug 25, 2026 at 12:39 PM

|

Lanka Leader

වර්තමාන අගවිනිසුරු ප්‍රීතිපත්මන් සූරසේන මහතා ඇතුළු කිහිපදෙනෙකුට එරෙහිව එල්ල වී ඇති චෝදනා සම්බන්ධයෙන් විධිමත් පරීක්ෂණයක් පවත්වන ලෙස ඉල්ලමින් ජාතික වෘත්තීය සහ සිවිල් පෙරමුණ අල්ලස් හෝ දූෂණ විමර්ශන කොමිෂන් සභාවට පැමිණිල්ලක් බාරදී තිබේ. 

පාර්ලිමේන්තු මන්ත්‍රීවරුන් වන රෝහිනී කවිරත්න, දයාසිරි ජයසේකර සහ අජිත් පෙරේරා යන මහත්ම මහත්මීන් විසින් මෑතකදී පාර්ලිමේන්තුවේදී අනාවරණය කළ තොරතුරු පදනම් කරගනිමින් මෙම පැමිණිල්ල ඉදිරිපත් කර ඇත.

මෙම පැමිණිල්ල මගින් අගවිනිසුරුවරයා සහ ඔහුගේ පවුලේ සාමාජිකයන් වත්කම් උපයාගත් ආකාරය පිළිබඳව මෙන්ම, ශ්‍රී ලංකා මුහුදු තීරයේදී අනතුරට පත් X-Press Pearl නෞකාවෙන් සිදු වූ දැවැන්ත හානිය වෙනුවෙන් ලැබිය යුතු වන්දි මුදල් අයකර ගැනීම ප්‍රමාද වීම පිටුපස ඇති කරුණු පිළිබඳව විමර්ශනය කරන ලෙස ඉල්ලා සිටියි.

ඊට අමතරව මහත් ආන්දෝලනයට තුඩු දුන් කන්ටේනර් වංචාව, ගල් අඟුරු වංචාව සහ භාණ්ඩාගාර මුදල් වංචාව සම්බන්ධයෙන්ද, කථානායකවරයාට සහ වර්තමාන ජනාධිපති ලේකම්වරයාට එරෙහිව එල්ල වී ඇති චෝදනා පිළිබඳවද කඩිනම් පරීක්ෂණ පවත්වා එහි ප්‍රගතිය අධිකරණයට වාර්තා කරන ලෙස එම පෙරමුණ වැඩිදුරටත් ඉල්ලා තිබේ.

මේ පිළිබඳව අදහස් දක්වමින් සමාජ ක්‍රියාකාරී අචල දිවාකර මහතා සඳහන් කළේ, X-Press Pearl නෞකාවේ වන්දි ලබා ගැනීම ප්‍රමාද වීම සම්බන්ධයෙන් ජනාධිපතිවරයාට සහ අගවිනිසුරුවරයාට එල්ල වන චෝදනා සුළුකොට තැකිය නොහැකි බවයි. එම නිසා වහාම විමර්ශනයක් පවත්වා සත්‍යය අනාවරණය කරමින් රජයට හිමිවිය යුතු අදාළ වන්දි මුදල් කඩිනමින් අයකර ගැනීමට කටයුතු කළ යුතු බවද ඔහු වැඩිදුරටත් අවධාරණය කළේය.