EPF සහ ETF එකතු කිරීමේ කැබිනට් තීන්දුවට වෘත්තීය සමිතිවලින් ප්‍රබල විරෝධයක්!..

Aug 8, 2026 at 01:14 PM

|

Lanka Leader

සේවක අර්ථ සාධක අරමුදල (EPF) සහ සේවක භාරකාර අරමුදල (ETF) ඒකාබද්ධ කර ත්‍රෛපාර්ශ්වික පාලන ව්‍යුහයක් යටතට ගෙන ඒමේ ප්‍රායෝගික ශක්‍යතාව අධ්‍යයනය කිරීම සඳහා කමිටුවක් පත් කිරීමට අමාත්‍ය මණ්ඩලය ගත් තීරණයත් සමඟ පෞද්ගලික සහ අර්ධ රාජ්‍ය අංශයේ සේවකයන් අතර සංවාදයක් මතු වී තිබේ.

මෙම ව්‍යුහාත්මක වෙනස හරහා සේවක අර්ථ සාධක අරමුදල ශ්‍රී ලංකා මහ බැංකු පාලනයෙන් ඉවත් කිරීමට පවතින සූදානමට එරෙහිව ස්වාධීන වෘත්තීය සමිති සහ බහුජන සංවිධාන එකමුතුව විසින් සංවිධානය කරන ලද විශේෂ මාධ්‍ය හමුවක් පසුගියදා කොළඹදී පැවැත්විණි.

එහිදී අදහස් දක්වමින් 'ස්ටෑන්ඩ් අප්' සේවක සංගමයේ ප්‍රධාන ලේකම් අශිලා දන්දෙණිය සඳහන් කළේ, අදාළ කැබිනට් යෝජනාව පිළිබඳව වෘත්තීය සමිති පාර්ශ්වයෙන් තොරතුරු සහ සාකච්ඡා ඉල්ලා සිටියද ආණ්ඩුවෙන් මෙතෙක් නිසි ප්‍රතිචාරයක් ලැබී නොමැති බවයි.

ලක්ෂ 25කට ආසන්න සේවක සංඛ්‍යාවකගේ අයිතිවාසිකම් සහ වරප්‍රසාද රැඳී ඇති මෙම අරමුදල් පාලනය වෙනත් පාර්ශ්වයන්ගේ මැදිහත්වීමට යටත් කිරීම පිළිබඳව වෘත්තීය සමිති නියෝජිතයෝ දැඩි අභියෝග එල්ල කරති.

"අපි මෙම අරමුදල බිස්නස්කාරයන්ගේ අතට පත්කිරීමේ බරපතල අවදානමක් මේ ක්‍රියාවලිය තුළ තියෙන බව පැහැදිලිව දකිනවා. ඒ නිසා මූලික වශයෙන් මෙම මුදල මහ බැංකුවෙන් ගැලවීම සම්බන්ධව අපි තදින්ම විරුද්ධ වෙනවා. ඒ වගේම මේ ත්‍රෛපාර්ශ්වික ක්‍රමය සම්බන්ධවත් අපට බරපතල ගැටලු පවතිනවා," යනුවෙන් අශිලා දන්දෙණිය පැවසුවාය.

රුපියල් බිලියන 637කට ආසන්න මුදලක් පාලනය වන සේවක භාරකාර අරමුදලේ (ETF) දැනට පවතින ත්‍රෛපාර්ශ්වික පාලන ක්‍රමවේදයෙහි ප්‍රායෝගික ගැටලු පවතිද්දී, රුපියල් ට්‍රිලියන 4.9කට ආසන්න අතිවිශාල EPF අරමුදලක් එවැනිම ව්‍යුහයකට යටත් කිරීම අතිශය අවදානම් සහගත බව ඇය වැඩිදුරටත් අවධාරණය කළාය.

EPF සහ ETF අරමුදල් ඒකාබද්ධ කිරීමේ යෝජනාවේ සාරාංශය    

• රජයේ පියවර: EPF සහ ETF එකමුතු කර ත්‍රෛපාර්ශ්වික පාලනයකට ගැනීමේ ශක්‍යතා අධ්‍යයන කමිටුවක් පත්කිරීම                        
• EPF අරමුදල් වටිනාකම: රුපියල් ට්‍රිලියන 4.9කට ආසන්න අතිවිශාල මුදලක් (ශ්‍රී ලංකා මහ බැංකු පාලනය යටතේ පවතින)            
• ETF අරමුදල් වටිනාකම: රුපියල් බිලියන 637කට ආසන්න මුදලක්                                                              
• බලපෑමට ලක්වන පිරිස: ලක්ෂ 25කට ආසන්න පෞද්ගලික සහ අර්ධ රාජ්‍ය අංශයේ සේවකයන්                                          
• වෘත්තීය සමිති ස්ථාවරය: මහ බැංකු පාලනයෙන් ඉවත් කිරීමට විරෝධය දැක්වීම සහ සේවකයන් දැනුවත් කිරීමේ ව්‍යාපාර ඇරඹීම     

අතීතයේදී ද සේවක අර්ථ සාධක අරමුදලට හානිකර වන අයුරින් ගැනීමට තැත් කළ තීරණ සේවක ප්‍රජාවගේ මැදිහත්වීම මත වෙනස් කිරීමට හැකි වූ බව මතක් කර දුන් වෘත්තීය සමිති නියෝජිතයෝ, ඉදිරියේදී සමස්ත සේවක ප්‍රජාව මේ පිළිබඳව දැනුවත් කිරීමට කටයුතු කරන බව ප්‍රකාශ කළහ.

සේවකයන්ගේ අයිතිවාසිකම්වලට සහ අනාගත ආරක්ෂාවට බලපෑම් එල්ල වන මෙවැනි ප්‍රතිසංස්කරණ ක්‍රියාවලීන් පිළිබඳව වෘත්තීය සමිති සහ නියෝජිතයන් සමඟ පුළුල් සංවාදයකට එළඹීමේ වැදගත්කම ද මෙහිදී අවධාරණය කෙරිණි.